Oibrithe ar postú

Is féidir le d’fhostóir tú a chur ag obair go sealadach i dtír eile den Aontas Eorpach. Le linn na tréimhse sin, gheobhaidh tú an stádas oibrí ar postú agus beidh na bundálaí oibre agus na bunchearta oibre céanna agat agus atá ag oibrithe i do thír óstach.

Féadfaidh postú maireachtáil chomh fada agus is gá chun tasc ar leith a chur i gcrích. Nuair a bheidh do phostú críochnaithe, ba cheart duit filleadh ar d’ionad oibre sa tír den Aontas ónar postaíodh thú.

Dálaí oibre

Is faoi théarmaí agus coinníollacha fostaíochta do thíre óstaí a bheidh tú más buntáistí iad ná na cinn i do thír bhaile. Sa chás sin tá sé de dhualgas ar d’fhostóir cloí le bunrialacha na tíre sin maidir le cosaint fostaithe agus téarmaí fostaíochta a bhaineann leis an méid seo a leanas:

• Gnéithe bunúsacha uile an luacha saothair mar atá sainithe sa dlí náisiúnta nó i gcomhaontuithe comhchoiteanna is infheidhme go huilíoch
• Cúiteamh ragoibre
• Liúntais nó aisíocaíocht speansas chun costais taistil, béilí agus lóistín a chumhdach sa tír óstach le linn an phostaithe (más gá duit taisteal le linn an tsannacháin postaithe)
• Tréimhsí uasta oibre
• Tréimhsí íosta sosa
• Saoire bhliantúil íoctha íosta
• Sláinte, sábháilteacht agus sláinteachas ag an obair
• Aon choinníoll a bhaineann go sonrach le daoine a fhostú trí ghníomhaireachtaí a chuireann foireann shealadach ar fáil
• Bearta cosanta do mhná torracha, mná ar rugadh leanbh dóibh le déanaí, agus daoine óga (faoi bhun 18 mbliana d’aois)
• Cóir chomhionann d’fhir agus do mhná agus rialacha eile chun idirdhealú a chosc
• Cóiríocht, má chuireann d’fhostóir sin ar fáil

Do chearta agus d’oibleagáidí mar oibrí ar postú

Agus tú ar postú i dtír eile san Aontas:

• ní bheidh cead oibre de dhíth ort
• ní bheidh ort aitheantas a fháil do do cháilíochtaí gairmiúla ; mar sin féin, d’fhéadfadh sé go mbeadh ort dearbhú i scríbhinn a dhéanamh le haghaidh roinnt gairmeacha áirithe: tuilleadh eolais faoi aitheantas frithpháirteach do cháilíochtaí gairmiúla
• ní gá duit clárú leis na húdaráis slándála sóisialta sa tír inar postaíodh thú, ós rud é go bhfanann tú faoi árachas sa tír ina bhfuil tú fostaithe de ghnáth. Dá bhrí sin, le linn do phostaithe, ní charnann tú aon chearta slándála sóisialta breise amhail cearta pinsin nó an ceart chun sochar dífhostaíochta sa tír inar postaíodh thú.
• ní mór duit d’áit chónaithe a chlárú leis na húdaráis más faide ná 3 mhí a bheidh tú ar postú
• ní charnfaidh tú an ceart chun buanchónaithe i do thír óstach.

Postú fadtéarmach

Más faide ná 12 mhí a bheidh tú ar postú (nó 18 mí má chuireann d’fhostóir fógra réasúnaithe faoi bhráid údaráis náisiúnta do thíre óstaí) beidh feidhm ag téarmaí agus coinníollacha fostaíochta ábhartha uile do thíre óstaí, cé is moite díobh siúd a bhaineann le foirceannadh conarthaí agus pinsin oibre fhorlíontacha.

Má phostaítear thú chuig tír eile san Aontas go ceann tréimhse fhada, b’fhéidir go dteastódh uait go mbeadh do theaghlach in éineacht leat ansin. Is féidir le do theaghlach sin a dhéanamh de bhun a gceart féin mar shaoránaigh den Aontas, ach ní mar chleithiúnaithe agat.

Cáin ioncaim

Má tá tú ag obair i do thír óstach ar feadh níos lú ná sé mhí, níor cheart go mbeifeá faoi dhliteanas cáin ioncaim a íoc ansin. Mar sin féin, níl aon rialacha uile-Aontais ann lena leagtar amach cén tír a fhéadfaidh cáin a ghearradh ar d’ioncam le linn postaithe. D’fhéadfaí é sin a leagan amach i ndlíthe náisiúnta nó i gcomhaontuithe cánach idir na tíortha san Aontas.

Cumhdach slándála sóisialta agus tú thar lear

Mar oibrí ar postú, chun leanúint de bheith cumhdaithe ag an gcóras slándála sóisialta i do thír bhaile, ní mór do d’fhostóir Doiciméad Iniompartha A1 (foirm PD A1) a iarraidh ar an institiúid slándála sóisialta i do thír bhaile agus údaráis na tíre óstaí a chur ar an eolas. Más faide ná 2 bhliain do phostú, féadfaidh tú ceann díobh seo a leanas a dhéanamh:

• aistriú chuig córas slándála sóisialta na tíre ina bhfuil tú ar postú, sin nó
• iarraidh ar d’fhostóir iarratas a dhéanamh ar shíneadh a chur le bailíocht do thréimhse ar postú ar d’fhoirm slándála sóisialta chun fanacht faoi chumhdach i do thír bhaile. Deonófar an síneadh má thagtar ar chomhaontú frithpháirteach idir na húdaráis sa dá thír agus más chun do leasa é.

Tuilleadh eolais faoin gcumhdach slándála sóisialta atá agat agus tú ar postú chuig tír eile den Aontas.

Eolas nach mór don fhostóir a chur ar fáil don tír óstach

Sa chuid is mó de chásanna, ní mór do d’fhostóir fógra (dearbhú maidir le postú) a sheoladh chuig na húdaráis sa tír óstach sula dtosaíonn an postú (nó nuair a thosaíonn sé, ar a dhéanaí) agus na sonraí seo a leanas san áireamh ann:

• céannacht an fhostóra
• líon na n-oibrithe ar postú
• seoladh ionad oibre an phostaithe
• fad measta an phostaithe, dátaí tosaigh agus deiridh san áireamh
• an cineál seirbhíse atá á chur ar fáil le linn an phostaithe
• teagmhálaí a dhéanfaidh idirchaidreamh leis na húdaráis sa tír óstach

Ina theannta sin, ba cheart do d’fhostóir institiúid inniúil na tíre óstaí a chur ar an eolas má bhíonn aon athrú ann, cuir i gcás mura dtarlaíonn an postú nó má chuirtear isteach ar an bpostú. Léigh tuilleadh faoi na hoibleagáidí maidir le dearbhú ar shuíomh gréasáin na tíre óstaí.

Eolas nach mór do d’fhostóir a chur ar fáil duitse

Má mhaireann do phostú go ceann tréimhse níos faide ná ceithre seachtaine as a chéile, ní mór do d’fhostóir an t-eolas seo a leanas a chur ar fáil duit i scríbhinn sula n-imí tú:

• an tír nó na tíortha ina mbeidh tú ag obair (tír óstach)
• fad measta na hoibre thar lear
• an t-airgeadra a úsáidfear chun an pá a íoc
• aon sochair (in airgead tirim nó sochair eile) a bhaineann leis an sannachán oibre
• eolas faoi aisdúichiú: an bhfuil sé ar fáil agus, má tá, cé na coinníollacha atá ann
• pá de réir dhlí infheidhme na tíre óstaí
• aon liúntais shonracha a bhaineann leis an bpostú
• socruithe maidir le speansas taistil, béilí agus cóiríochta a aisíoc
• nasc chuig suíomh gréasáin oifigiúil náisiúnta na tíre óstaí maidir le hoibrithe ar postú

Suíomhanna gréasáin náisiúnta maidir le postú

Déan seiceáil ar shuíomh gréasáin náisiúnta do thíre óstaí chun téarmaí agus coinníollacha oibre na n-oibrithe ar postú a fháil amach, chomh maith le sonraí teagmhála na n-údarás áitiúil.

Suíomhanna gréasáin náisiúnta maidir le postú

Oifigigh Idirchaidrimh Náisiúnta

Tá údarás inniúil ag gach tír a fhéadfaidh ceisteanna a fhreagairt maidir le hoibrithe a phostú. Tá sonraí teagmhála na nOifigí Idirchaidrimh Náisiúnta seo ar fáil faoin gcnaipe ‘Cuir ceist ar údaráis riaracháin náisiúnta’ thíos.

Tuilleadh eolais

Chun tuilleadh eolais a fháil féach treoir ghearr an Aontais maidir le hoibrithe a phostú

Féach chomh maith treoir phraiticiúil an Aontais maidir le postú

An bhfuil tú féinfhostaithe agus an bhfuil sé i gceist agat oibriú thar lear go ceann cúpla mí? Léigh na ceisteanna coitianta chun a fháil amach cé na foirmiúlachtaí is gá a dhéanamh.