Réiteach neamhfhoirmiúil/malartach díospóidí le haghaidh tomhaltóirí
Díospóidí a réiteach lasmuigh den chúirt
Ní gá dul chun na cúirte i gcónaí chun díospóid maidir le conradh nó ceannachán a réiteach. Tá roghanna eile ann ar féidir triail a bhaint astu ar dtús:
- Iarracht a dhéanamh an díospóid a réiteach go díreach leis an trádálaí
- Teagmháil a dhéanamh le seirbhís um réiteach malartach díospóidí
- Teagmháil a dhéanamh leis an Lárionad Eorpach do Thomhaltóirí.
Iarracht a dhéanamh an díospóid a réiteach go díreach leis an trádálaí
Ar an gcéad dul síos, déan iarracht an díospóid a réiteach go díreach leis an trádálaí. Is é seo an chéad chéim riachtanach sula ndéanfaí teagmháil le haon seirbhís/comhlacht um réiteach malartach díospóidí lasmuigh den chúirt. Cuardaigh sonraí roinn seirbhíse custaiméara an trádálaí ar a shuíomh gréasáin.
Tacaigh le d’éileamh le fianaise amhail d’admháil, do shonrasc, do chonradh, etc.
Mura n-oibríonn sé sin, is féidir leat cabhair a iarraidh ó sheirbhís neodrach um réiteach malartach díospóidí lasmuigh den chúirt. Tá na seirbhísí sin ar fáil i leith díospóidí i ngach earnáil den mhargadh, i do thír féin nó i dtír eile den Aontas.
Teagmháil a dhéanamh le seirbhís um réiteach malartach díospóidí
Má rinne tú iarracht, agus murar éirigh leat, teacht ar réiteach ar d’fhadhb go díreach leis an trádálaí, is féidir leat teagmháil a dhéanamh le seirbhís/comhlacht um réiteach malartach díospóidí. Chun a fháil amach cé leis ar cheart teagmháil a dhéanamh, ní mór a fhios a bheith agat cén áit a bhfuil an trádálaí lonnaithe. De ghnáth is féidir an méid sin a fháil amach ach amharc ar a shuíomh gréasáin. Cé acu atá nó nach bhfuil oibleagáid ar an trádálaí a bheith rannpháirteach, nó cé acu atá nó nach bhfuil táille i gceist, is ar an reachtaíocht náisiúnta a bhraitheann sé sin.
1. Is i do thír féin atá an trádálaí
Is féidir leat teagmháil a dhéanamh le seirbhís um réiteach malartach díospóidí i do thír féin. Tá comhlacht neodrach um réiteach malartach díospóidí (RMD) lasmuigh den chúirt ag gach Ballstát a bunaíodh chun
- cuidiú leat teacht ar réiteach ar do dhíospóid maidir le ceannachán nó conradh
- réiteach a mholadh, nó a fhorchur, b’fhéidir
- cuidiú leat ar chostas íseal
- teacht ar thoradh laistigh de 90 lá.
Comhlacht um réiteach malartach díospóidí a aimsiú i do thír féin.
2. Is i dtír eile san Aontas (nó san Íoslainn nó san Iorua) atá an trádálaí
Is féidir leat teagmháil a dhéanamh le seirbhís um réiteach malartach díospóidí sa tír ina bhfuil an trádálaí lonnaithe. Comhlacht um réiteach malartach díospóidí a aimsiú sa tír lena mbaineann.
Teagmháil a dhéanamh leis an Lárionad Eorpach do Thomhaltóirí
Is féidir leat teagmháil a dhéanamh leis an Lárionad Eorpach do Thomhaltóirí freisin i do thír féin (ach ní sa tír ina bhfuil an trádálaí lonnaithe). Tá Lárionaid Eorpacha do Thomhaltóirí ann i dtíortha uile an Aontais, san Iorua agus san Íoslainn.
Is féidir leo cuidiú leat má bhí fadhb agat tar éis duit táirge nó seirbhís a cheannach sna tíortha sin, in aon earnáil den mhargadh (iompar, baincéireacht, teileachumarsáid, fuinneamh, earraí leictreonacha, fearais tí, carr ar cíos, tirimghlanadh, etc.).
Is féidir leis an Lárionad Eorpach do Thomhaltóirí i do thír féin
- d’fhiosrú a fhreagairt i do theanga féin
- do chearta mar thomhaltóir faoi dhlí an Aontais agus faoin reachtaíocht náisiúnta maidir le tomhaltóirí a chur in iúl duit
- comhairle a chur ort maidir le bealaí a d’fhéadfadh a bheith ann chun dul ar aghaidh le do ghearán
- cuidiú leat teacht ar réiteach cairdiúil le trádálaí i dtír eile
- tú a atreorú chuig an gcomhlacht ceart mura féidir leis an Lárionad Eorpach do Thomhaltóirí cuidiú leat.
Teagmháil a dhéanamh leis an Lárionad Eorpach do Thomhaltóirí i do thír féin.
Warning
Seiceálfaidh an Lárionad Eorpach do Thomhaltóirí ar dtús cé acu a chuaigh nó nach ndeachaigh tú i dteagmháil leis an trádálaí cheana féin chun iarracht a dhéanamh an díospóid a réiteach. Mura ndeachaigh, molfar duit déanamh amhlaidh.Scéal samplach
Do dhíospóid leis an trádálaí a réiteach
Ní raibh Jutta, arb as an Iodáil di, sásta le luas a naisc idirlín, arbh ísle é ná an luas a luadh sa chonradh. Chuaigh sí i dteagmháil lena soláthraí idirlín chun gearán a dhéanamh, rud a spreag iad chun luas a naisc a mhéadú. Níorbh éigean do Jutta aon ghníomhaíocht eile a dhéanamh ina dhiaidh sin.
Scéal samplach
Teagmháil a dhéanamh le seirbhís um réiteach malartach díospóidí
Fuair Armin, arb as an nGearmáin dó, bille óna sholáthraí idirlín a bhí níos airde ná mar a luadh sa chonradh. Tar éis dó iarracht gan rath a dhéanamh an fhadhb leis an trádálaí a réiteach, chuaigh Armin i dteagmháil leis an gcomhlacht ábhartha um réiteach malartach díospóidí sa Ghearmáin, áit a raibh sé in ann teacht ar réiteach ar a laghad míchaoithiúlachta dó.
Scéal samplach
Déan teagmháil leis an Lárionad Eorpach do Thomhaltóirí
Cheannaigh Sofia, arb as an bPortaingéil di, ríomhaire glúine ó mhiondíoltóir Spáinneach ar líne. Ar an drochuair, nuair a tháinig an ríomhaire glúine, fuair sí amach nach raibh sé ag feidhmiú i gceart. Mhol an trádálaí di é a sheoladh ar ais chuig an monaróir lena dheisiú. Rinne sí amhlaidh, ach níorbh fhada go raibh an fhadhb chéanna aici.
Chuaigh Sofia i dteagmháil leis an trádálaí arís chun aisíocaíocht a iarraidh, ach dúradh léi nach dtabharfaí aon aisíocaíocht go dtí go ndéanfaí an ríomhaire glúine a dheisiú faoi thrí. Chinn sí dul i dteagmháil leis an Lárionad Eorpach do Thomhaltóirí sa Phortaingéil chun cuidiú a iarraidh. Chomhroinn an oifig sa Phortaingéil an cás lena contrapháirt sa Spáinn, agus chuaigh siadsan i dteagmháil leis an trádálaí. Tar éis don Lárionad Eorpach do Thomhaltóirí sa Spáinn idirghabháil a dhéanamh, bhailigh an trádálaí an ríomhaire glúine agus thug sé aisíocaíocht iomlán do Sofia.