Pointí eolais le haghaidh cúram sláinte trasteorann

Pointí Teagmhála Náisiúnta

Tá Pointe Teagmhála Náisiúnta amháin ar a laghad ag gach Ballstát ar féidir leis cabhrú leat le ceisteanna faoi chóir leighis i mBallstát eile den Aontas. Tá pointí teagmhála réigiúnacha nó áitiúla ag roinnt tíortha freisin.

Féach liosta de Phointí Teagmhála Náisiúnta in aghaidh na tíre.

An méid is féidir leo a dhéanamh (i do thír dhúchais):

Is féidir le do Phointe Teagmhála Náisiúnta eolas a thabhairt duit faoin gceart atá agat cúram sláinte a fháil i dtíortha eile den Aontas, an méid seo a leanas san áireamh

• do chearta chun cóireáil riachtanach a fháil leis an gCárta Eorpach um Árachas Sláinte
• do cheart go n-aisíocfaí do chostais ar fad nó cuid díobh
• roghanna éagsúla chun na costais a bhaineann leis an gcóir leighis atá beartaithe agat i mBallstát eile a chumhdach
• cé na cineálacha cóireála a aisíoctar agus cé mhéad is féidir leat a bheith ag súil leis mar aisíocaíocht
• má tá réamhúdarú uait agus conas iarratas a dhéanamh air
• nósanna imeachta riaracháin maidir le haisíocaíocht costas
• conas achomharc a dhéanamh mura n-urramaítear do chearta

An méid is féidir leo a dhéanamh (sa tír inar mian leat go gcaithfí leat):

Is féidir leis an bPointe Teagmhála Náisiúnta eolas a thabhairt duit faoin méid seo a leanas

• na soláthraithe cúraim sláinte a chumhdaítear leis an Scéim Eorpach um Árachas Sláinte
• córas cúraim sláinte na tíre sin agus an chaoi a gcinntíonn siad cáilíocht, sábháilteacht agus comhlíonadh na gcaighdeán náisiúnta
• cé acu atá nó nach bhfuil soláthraí áirithe cláraithe agus údaraithe chun cóireálacha leighis sonracha a sholáthar, agus cén córas cáilíochta agus sábháilteachta a chumhdaíonn an soláthraí sin
• inrochtaineacht ar ospidéil do dhaoine faoi mhíchumas
• cearta othar sa tír sin, eolas faoi do roghanna má théann rud éigin amú nó mura bhfuil tú sásta leis an gcóireáil leighis a fhaigheann tú san áireamh

Institiúidí árachais sláinte

Is féidir le do sholáthraí árachais sláinte eolas a thabhairt duit freisin faoin gceart atá agat cóir leighis riachtanach nó cóir leighis atá beartaithe a fháil i mBallstát eile. Go háirithe, is féidir leo tuilleadh eolais a thabhairt duit maidir le conas Cárta Eorpach um Árachas Sláinte (EHIC) a fháil, aisíocaíochtaí, réamhúdarú agus aon fhoirmiúlachtaí riaracháin agus cóir leighis á lorg agat i dtír eile.

Soláthraithe cúraim sláinte

Ní mór do sholáthraithe cúraim sláinte, cuir i gcás ospidéal, clinic nó bunaíocht leighis eile, insint duit faoi na nithe seo a leanas:

• roghanna cóireála éagsúla, cáilíocht agus sábháilteacht, stádas údaraithe/clárúcháin an tsoláthraí cúraim sláinte etc., chun go mbeidh tú in ann rogha eolasach a dhéanamh faoi do chóir leighis
• praghsanna cóireála sula gcuirtear ort í, agus sonrasc soiléir a chur ar fáil duit ina dhiaidh sin chun aisíocaíocht a éascú
• a n-árachas dliteanais nó a choibhéis

Ba cheart do sholáthraithe cúraim sláinte cóip de do thaifead leighis scríofa nó leictreonach a thabhairt duit, má lorgaíonn tú cúram sláinte i dtír eile nó má cuireadh cóir ort i dtír eile.

SOLVIT

Má cheapann tú nár chloígh na húdaráis náisiúnta le do chearta san Aontas maidir le cúram sláinte trasteorann, is féidir leat teagmháil a dhéanamh le SOLVIT en chun cúnamh a fháil.

Is seirbhís í SOLVIT arna cur ar fáil ag an údarás riaracháin náisiúnta i ngach tír san Aontas agus san Iorua, san Íoslainn agus i Lichtinstéin. Tá SOLVIT saor in aisce agus tá sé d’aidhm aige réitigh a fháil laistigh de 10 seachtaine – ag tosú ar an lá a nglacann ionad SOLVIT sa tír inar tharla an fhadhb le do chás.