Díolúintí VAT:

D’fhéadfadh roinnt earraí agus seirbhísí a bheith díolmhaithe ó CBL, amhail oideachas, cúram sláinte agus seirbhísí airgeadais.

Tá na díolacháin sin díolmhaithe ó CBL, gan an ‘ceart asbhainte’. Ciallaíonn sé sin nach féidir leat an CBL a d’íoc tú a asbhaint ar cheannacháin a bhaineann le díolacháin den sórt sin.

Gnólacht a chlárú le haghaidh CBL

De ghnáth, agus díolacháin á ndéanamh agat i gcúrsa gnó, ní mór duit do ghnólacht a chlárú le haghaidh CBL. Nuair a chláraíonn tú do ghnólacht le haghaidh CBL, tabharfar uimhir aitheantais CBL duit.

Má dhíolann tú earraí nó seirbhísí a mheastar a bheith díolmhaithe ó CBL, ní gá duit do ghnólacht a chlárú le haghaidh CBL i gcónaí.

Díolúintí CBL do ghnólachtaí beaga

Má tá gnólacht beag (FBM) á reáchtáil agat san Aontas, is féidir leat iarratas a dhéanamh ar scéim díolúine speisialta CBL lenar féidir leat gnó a dhéanamh faoi choinníollacha sonracha gan CBL a ghearradh. Má dhéanann do FBM earraí nó seirbhísí inchánacha faoi bhun teorainn bhliantúil áirithe agus má cháilíonn sé don scéim, d’fhéadfadh sé go mbeifeá díolmhaithe ó CBL. Ciallaíonn sé sin nach n-íocfaidh tú CBL leis an údarás cánach i do thír féin. Sa chás sin, áfach, ní bheidh tú in ann CBL ar ionchur a asbhaint ná CBL a chur in iúl ar shonraisc. Is féidir leat na gnáthshocruithe CBL a roghnú go deonach, agus sa chás sin ní mór duit CBL a íoc agus, dá bhrí sin, is féidir leat CBL ar ionchur a asbhaint.

Níl feidhm ag an scéim díolúine CBL seo ach amháin maidir leis na hearraí agus na seirbhísí a sholáthraíonn tú do do chustaiméirí, seachas an CBL atá dlite agat (más infheidhme) do sholáthróir na n-earraí agus na seirbhísí a úsáideann tú.

Tá dhá chineál rialacha ann maidir leis an díolúine ó CBL sin: intíre (laistigh den Bhallstát ina bhfuil tú) agus trasteorann (nuair a dhéanann tú gnó i mBallstát eile):

Rialacha CBL intíre

Más láimhdeachas bliantúil faoi bhun €85,000 atá ag do FBM, nó níos ísle ná sin más amhlaidh atá socraithe ag an mBallstát, is féidir leat iarratas a dhéanamh ar dhíolúine ó CBL ar dhíolacháin intíre.

Is féidir le gach Ballstát tairseacha earnáilsonracha a leagan síos freisin agus coinníollacha breise a shainiú a bhaineann le clárú, tuairisciú agus monatóireacht. Chun tuilleadh eolais a fháil, ina measc sin na tairseacha atá leagtha síos ag gach Ballstát, féach na rialacha náisiúnta CBL do FBManna.

Rialacha trasteorann CBL

Má fhanann do láimhdeachas iomlán ar fud an Aontais faoi bhun €100,000 agus mura sáraíonn sé an tairseach náisiúnta in aon Bhallstát ina mbíonn tú ag oibriú freisin, is féidir leat an díolúine ó CBL ar dhíolacháin trasteorann a chur i bhfeidhm laistigh den Aontas. Níor cheart an tairseach náisiúnta sin a bheith sáraithe sa bhliain féilire roimhe sin.

Má úsáideann tú an scéim seo, ní gá duit clárú ach uair amháin i do thír dhúchais. Gheobhaidh tú uimhir aitheantais (uimhir EX) le húsáid i ngach Ballstát ar féidir leat an scéim CBL a chur i bhfeidhm ina leith. Níor cheart go nglacfadh an próiseas clárúcháin sin níos mó ná 35 lá oibre.

Beidh ort do ghníomhaíochtaí gnó uile san Aontas a thuairisciú le tuairisc ráithiúil amháin don riarachán cánach i do thír bhaile ina bhfuil an gnólacht cláraithe.

Chun tuilleadh eolais a fháil, déan teagmháil le pointe teagmhála do thairsí náisiúnta FBM.

Eisceachtaí eile CBL do ghnólachtaí beaga

Ag brath ar do ghníomhaíocht ghnó, tá scéimeanna speisialta CBL ann a d’fhéadfadh feidhm a bheith acu maidir leatsa. Orthu sin tá an méid seo a leanas:

• scéim ráta chomhréidh d’fheirmeoirí
• Gníomhaire taistil
• Earraí athláimhe
• Ceantanna poiblí
• Ór infheistíochta

D’fhéadfadh an dóigh a gcuirtear na scéimeanna CBL sin i bhfeidhm a bheith éagsúil ó Bhallstát go chéile. Téigh i dteagmháil le pointe teagmhála na tairsí náisiúnta FBM chun tuilleadh eolais a fháil.

Faigh amach faoi dhíolúintí CBL i do thír féin: