Lipéad DTLL

Cad é an lipéad WEEE?

Cuireann an tsiombail in iúl nár cheart fáil réidh leis an táirge mar a bheadh dhramhaíl neamhshórtáilte ann, agus nach mór é a sheoladh chuig saoráidí bailithe ar leithligh lena aisghabháil agus lena athchúrsáil. Ní mór an mharcáil DTLL a bheith ar aon trealamh leictreach agus leictreonach a chuirtear ar mhargadh an Aontais.

An bhfuil sé éigeantach?

Cé is moite de roinnt eisceachtaí, ní mór marcáil shonrach a bheith ar an gcuid is mó den trealamh leictreach agus leictreonach a dhíoltar san Aontas. Tá lipéid DTLL éigeantach le haghaidh na gcatagóirí táirgí seo a leanas:

• trealamh malartaithe teochta, amhail cuisneoirí agus aonaid aerchóiriúcháin
• scáileáin, monatóirí agus trealamh ina bhfuil scáileáin ar mó ná 100 cm² a ndromchla
• lampaí
• trealamh mór (aon toise seachtrach ar mó ná 50 cm é) amhail meaisíní níocháin, meaisíní cóipeála, grianphainéil ar an díon
• trealamh beag (toise seachtrach ar lú ná 50 cm é) amhail folúsghlantóirí, brathadóirí deataigh, cloig agus uaireadóirí
• trealamh beag TF agus teileachumarsáide (gan aon toise seachtrach ar mó ná 50 cm é)

Tá liosta mionsonraithe de na fearais a thagann faoi gach catagóir táirge ar fáil san iarscríbhinn a ghabhann leis an treoir de chuid an Aontais.

Cén dóigh a ngreamaítear an lipéad?

Ní mór an méid seo a leanas a bheith ar do threalamh leictreach agus leictreonach:

• siombail den araid rothaí agus líne tríthi
• do mharc aitheantais, amhail an t-ainm branda nó trádmharc

Má cuireadh do tháirge ar an margadh tar éis an 13 Lúnasa 2005, féadfaidh tú ceachtar díobh seo a leanas a dhéanamh:

• barra a chur faoin tsiombail den araid rothaí agus líne tríthi, sin nó
• an dáta a cuireadh an táirge ar an margadh a shonrú

Ní mór na hinscríbhinní sin a phriontáil ar an táirge féin agus ba cheart iad a bheith buan sofheicthe inléite. Is féidir an lipéad a phriontáil ar an bpacáistiú, ar na treoracha nó ar an mbileog bharánta seachas ar an táirge féin más amhlaidh atá méid an táirge ró-bheag nó dá gcuirfeadh an mharcáil isteach ar a fheidhm.

Cé na costais a bhaineann leis an lipéad DTLL?

Tá clárú agus tuairisciú don chlár náisiúnta saor in aisce. Mar sin féin, tá oibleagáidí airgeadais ann a bhaineann le freagrachtaí i leith na dramhaíola, agus d’fhéadfadh siad a bheith éagsúil ó thír go tír san Aontas.

Freagrachtaí i leith na dramhaíola

Chomh maith leis an lipéad DTLL a chlárú agus a ghreamú, baineann do chuid oibleagáidí freisin le céim dheireadh ré do tháirgí.

Tuilleadh eolais faoin bpróiseas clárúcháin agus faoi do fhreagrachtaí i leith dramhaíola i gcás trealamh leictreach agus leictreonach.

Is féidir eolas náisiúnta a rochtain thíos.