Ceanglais táirgí a shainaithint

Tá caighdeáin agus sonraíochtaí teicniúla uile-Aontais ann le haghaidh roinnt catagóirí táirgí. Ní mór duit a chinntiú go gcomhlíonann do tháirgí aon rialacha ábhartha de chuid an Aontais sular féidir iad a thrádáil gan bhac san Aontas.

I gcás nach ann do rialacha uile-Aontais, d’fhéadfadh feidhm a bheith ag sonraíochtaí éagsúla i dtíortha éagsúla an Aontais. I gcásanna den sórt sin, ní mór duit cloí leis na rialacha atá bailí i do Bhallstát féin, agus na rialacha sin amháin.

Cad iad na ceanglais táirgí?

Leagtar síos i ndlí an Aontais Eorpaigh ceanglais riachtanacha lena chinntiú go gcomhlíonann táirgí a thrádáiltear san Aontas caighdeáin arda sláinte, sábháilteachta agus comhshaoil.

Is féidir an méid seo a leanas a chumhdach leis na ceanglais:

• an táirge féin: mar shampla, inadhainteacht, airíonna leictreachais nó sláinteachas
• próiseas monaraíochta an táirge
• feidhmíocht an táirge: mar shampla, an éifeachtúlacht fuinnimh a bhaineann leis.

I bhformhór cásanna, sainítear sa dlí na torthaí a bheidh le baint amach nó na guaiseacha a gcaithfear déileáil leo, ach ní shonraítear na réitigh theicniúla sa dlí.

Uaireanta is féidir le caighdeáin cuidiú leat comhréireacht leis an dlí a léiriú.

An áit le ceanglais táirgí an Aontais a aimsiú

Faoi láthair, is ar dhlí an Aontais atá formhór na rialacha maidir le táirgí bunaithe. Ciallaíonn sé sin go bhfuil feidhm ag na rialacha céanna i ngach Ballstát. Cuirtear rialacha i bhfeidhm maidir le grúpaí táirgí, amhail bréagáin, nó saintréithe táirgí, amhail comhoiriúnacht leictreamaighnéadach.

Is faoin rialachán maidir le sábháilteacht ghinearálta táirgí a thagann táirgí nach bhfuil faoi réir reachtaíocht an Aontais, nó rioscaí.

Is féidir leat na ceanglais le haghaidh do tháirge a sheiceáil ar Access2Markets. Cuireann an bunachar sonraí sin eolas ar fáil faoin méid seo a leanas:

• rialacha agus rialacháin le haghaidh do tháirge
• údaráis inniúla ar féidir teagmháil a dhéanamh leo maidir le ceanglais shonracha táirgí
• CBL agus rátaí dleachta máil a chuirtear i bhfeidhm ar do tháirge i dtír a dhíola san Aontas.

Is ar chóid chustaim atá bunachar sonraí Access2Markets bunaithe: chun na riachtanais maidir le do tháirge a fheiceáil, beidh ort a chód custaim a shainaithint ar dtús. Mura bhfuil an cód custaim ar eolas agat, is féidir leat a chuardach ach ainm do tháirge a úsáid san inneall cuardaigh ionsuite.

An áit le ceanglais náisiúnta táirgí a aimsiú

Tá rialacha maidir le táirgí ann freisin nach bhfuil comhchuibhithe san Aontas, rud a chiallaíonn go bhféadfadh sonraíochtaí a bheith éagsúil i ngach Ballstát. Sna cásanna sin, ní mór duit cloí leis na rialacha is infheidhme sa Bhallstát ina bhfuil sé beartaithe agat do tháirge a chur ar an margadh, agus na rialacha sin amháin.

Má chomhlíonann do tháirgí na ceanglais sin i do thír féin san Aontas, ní féidir le tíortha eile den Aontas an méid seo a leanas a dhéanamh:

• cosc a chur ar do chuid táirgí a dhíol
• iallach a chur ort iad a mhodhnú
• iallach a chur ort tástáil bhreise a dhéanamh

ach amháin más féidir leo a chruthú nach gcomhlíonann do tháirgí ceanglais theicniúla agus cháilíochta do thíre agus nach mbaineann leibhéal comhchosúil sábháilteachta leo. Prionsabal an aitheantais fhrithpháirtigh a thugtar air sin.

Má tá fadhb agat a bhaineann le rialacha táirgí i dtír eile den Aontas a bheith ar neamhréir le prionsabal an aitheantais fhrithpháirtigh, féadfaidh tú cúnamh a iarraidh ar SOLVIT.

Rialacha náisiúnta

Tá sé d’oibleagáid ar rialtais na mBallstát a rialacha náisiúnta a fhoilsiú. Is féidir leat tuilleadh a léamh faoi rialacha náisiúnta agus faoi phrionsabal an ‘aitheanta fhrithpháirtigh’ i mbunachar sonraí TRIS le haghaidh rialacha táirgí neamh-chomhchuibhithe.

Go háirithe, d’fhéadfadh na ceanglais faoi rialacha náisiúnta a bheith éagsúil maidir leis an méid seo a leanas:

• méid/toisí
• meáchan
• comhdhéanamh
• lipéadú
• pacáistiú
• tástáil.

Chun a fháil amach cé na rialacha teicniúla a bhfuil feidhm acu maidir le táirgí sonracha i ngach tír den Aontas nó sonraí na n-údarás inniúil laistigh den Bhallstát sin, is féidir leat teagmháil a dhéanamh leis na Pointí Teagmhála do Tháirgí.

Srianta bunaithe ar rialacha náisiúnta

Má tá riosca ag baint le do tháirgí do leas an phobail, bunaithe ar na dlíthe atá i bhfeidhm i dtíortha eile den Aontas a dhéanann difear don mhéid seo a leanas:

• sláinte agus beatha daoine, ainmhithe nó plandaí
• cosaint an chomhshaoil
• an tslándáil phoiblí nó an mhoráltacht phoiblí

d’fhéadfadh sé nach mbeadh cead agat iad a easpórtáil gan bhac.

D’fhéadfaí do tháirgí a thoirmeasc más féidir leis an tír den Aontas ar mian leat iad a easpórtáil chuici a chruthú go bhfuil a riachtanais theicniúla féin riachtanach nó éigeantach, agus nach bhfuil do tháirgí coibhéiseach ó thaobh an leibhéil sábháilteachta atá ag teastáil de.

Chun a fháil amach cé na rialacha náisiúnta a bhfuil feidhm acu maidir le táirgí sonracha i ngach tír den Aontas nó sonraí na n-údarás inniúil laistigh den tír sin, is féidir leat teagmháil a dhéanamh leis na Pointí Teagmhála do Tháirgí.