Iarratas a dhéanamh ar sholáthar sealadach seirbhísí

Má tá tú ag bogadh go tír eile san Aontas agus más mian leat do sheirbhísí rialáilte a chur ar fáil go sealadach sa tír sin, beidh ort dearbhú i scríbhinn a chur isteach roimh ré. Ba cheart an dearbhú a chur isteach i scríbhinn agus ag am ar bith sula gcuireann tú do sheirbhísí ar fáil den chéad uair. Ón uair a chuirtear isteach é, bíonn an dearbhú bailí ar feadh bliana.

An méid is gá duit a chur isteach

Má theastaíonn dearbhú, is féidir leat é a chur isteach go díreach chuig údarás na tíre óstaí atá freagrach as do ghairm (chun an t-údarás cuí a fháil amach, cuir ceist ar an bpointe teagmhála náisiúnta ansin).

Ba chóir go mbeadh an méid seo a leanas i do dhearbhú:

• do chéadainm, do shloinne agus do shonraí teagmhála
• do náisiúntacht
• ainm na gairme sa tír ina n-oibríonn tú de ghnáth
• ainm na gairme is mian leat a chleachtadh sa tír óstach
• eolas faoi d’árachas dliteanais ghairmiúil: árachóir, uimhir chonartha (iarr ar d’fhostóir)
• tagairt d’aon dearbhuithe a tíolacadh roimhe sin sa tír chéanna

Má chuireann tú dearbhú isteach den chéad uair nó má thagann aon athrú ar do chás, ba cheart duit na doiciméid tacaíochta seo a leanas a chur san áireamh:

• cruthúnas ar do náisiúntacht
• cruthúnas go bhfuil tú bunaithe go dleathach i dtír den Aontas agus nach bhfuil cosc ort do ghairm rialáilte a chleachtadh, fiú ar bhonn sealadach
• fianaise ar cháilíochtaí gairmiúla (d’fhéadfadh sé go mbeadh ort aistriúchán deimhnithe a chur isteach)
• cruthúnas nár ciontaíodh riamh thú i gcion coiriúil má oibríonn tú i réimse na slándála

D’fhéadfadh na doiciméid is gá duit a chur isteach a bheith éagsúil ag brath ar do ghairm agus ar an tír den Aontas inar mian leat í a chleachtadh. Téigh i dteagmháil le húdarás na tíre óstaí atá freagrach as do ghairm chun na cineálacha doiciméad a bheidh ort a chur isteach a sheiceáil (féadfaidh an bpointe teagmhála náisiúnta cuidiú leis sin).

An méid a tharlaíonn le do dhearbhú

I bhformhór na gcásanna, is féidir leat do dhearbhú a chur isteach am ar bith sula dtosaíonn tú ag obair sa tír óstach (fiú mura bhfuil tú cinnte go mbeidh tú ag obair). Nuair a bheidh do dhearbhú curtha isteach agat, is féidir leat tosú láithreach ar do ghairm a chleachtadh.

B’fhéidir go mbeidh ort do dhearbhú a athnuachan uair sa bhliain má tá sé ar intinn agat leanúint de sheirbhísí sealadacha a sholáthar i do thír óstach.