Ħaddiema stazzjonati — xogħol temporanju barra mill-pajjiż
L-impjegatur jista’ jibagħtek taħdem temporanjament f'pajjiż ieħor tal-UE. Matul dan il-perjodu, se takkwista l-istatus ta’ ħaddiem stazzjonat u se tibbenefika mill-istess kundizzjonijiet u drittijiet tax-xogħol bħall-ħaddiema fil-pajjiż ospitanti tiegħek.
Stazzjonar jista’ jdum sakemm ikun meħtieġ biex jitwettaq kompitu speċifiku. Meta l-istazzjonar tiegħek jintemm, għandek tirritorna lejn il-post tax-xogħol tiegħek fil-pajjiż tal-UE li minnu kont stazzjonat.
Informazzjoni li l-impjegaturi għandhom jipprovdu qabel l-istazzjonar
Skont ir-regoli tal-UE, qabel ma jibdielek l-istazzjonar, l-impjegaturi għandhom l-obbligi li jipprovdu lilek u lill-awtoritajiet kompetenti tal-pajjiż ospitanti b’ċerta informazzjoni.
Informazzjoni li l-impjegatur tiegħek għandu jipprovdilek
Jekk l-istazzjonar idum aktar minn erba’ ġimgħat konsekuttivi, l-impjegatur tiegħek irid jipprovdilek bil-miktub, qabel it-tluq tiegħek, l-informazzjoni li ġejja:
- il-pajjiż jew il-pajjiżi fejn se taħdem (il-pajjiż ospitanti)
- id-durata mistennija tal-istazzjonar barra mill-pajjiż
- il-munita tar-remunerazzjoni
- kwalunkwe benefiċċji (fi flus konanti jew ieħor) relatat mal-assenjament tax-xogħol
- informazzjoni dwar ir-ripatrijazzjoni: jekk hix ipprovduta u, jekk iva, skont liema kundizzjonijiet
- ir-remunerazzjoni skont il-liġi applikabbli tal-pajjiż ospitanti
- kwalunkwe provvedimenti speċifiċi relatati mal-istazzjonar
- arranġamenti għar-rimborż tal-ispejjeż tal-ivvjaġġar, tal-ikel u tal-akkomodazzjoni
- il-link għas-sit web uffiċjali nazzjonali tal-pajjiż ospitanti dwar il-ħaddiema stazzjonati.
Twissija
Huwa f’idejn l-Istati Membri tal-UE biex jiddeċiedu kif l-impjegatur jagħtik din l-informazzjoni. Madankollu, normalment dan isir billi jinkiteb anness għall-kuntratt eżistenti tiegħek.Stazzjonament jista’ jdum sa 12-il xahar, jew 18 jekk tiġi sottomessa notifika motivata lill-pajjiż ospitanti. Madankollu, jekk l-istazzjonar ikun itwal minn 12–18-il xahar, dan jibda jitqies bħala stazzjonar fit-tul.
Twissija
Ftakar, jekk l-istazzjonar idum aktar minn 24 xhar, ix-xogħol tiegħek jista’ jkompli iżda l-istituzzjonijiet kompetenti tas-sigurtà soċjali jistgħu jieqfu jqisuk bħala ħaddiem stazzjonat, u sakemm ma tingħatax estensjoni, x’aktarx ikollok bżonn tingħaqad mas-sistema tas-sigurtà soċjali barra mill-pajjiż.Informazzjoni li l-impjegatur għandu jipprovdi lill-pajjiż ospitanti
Fil-biċċa l-kbira tal-każijiet l-impjegatur tiegħek irid jibgħat notifika (“dikjarazzjoni ta’ stazzjonar”) lill-awtoritajiet kompetenti fil-pajjiż ospitanti qabel (jew mhux aktar tard minn meta) jibda l-istazzjonar, bid-dettalji li ġejjin:
- l-identità tal-impjegatur
- in-numru ta’ ħaddiema stazzjonati
- indirizz tal-post tax-xogħol tal-istazzjonar
- it-tul ta’ żmien mistenni tal-istazzjonar, inklużi d-dati tal-bidu u tat-tmiem
- it-tip ta’ servizz ipprovdut matul l-istazzjonar
- il-persuna ta’ kuntatt li tikkoopera mal-awtoritajiet fil-pajjiż ospitanti.
L-impjegatur tiegħek għandu jinforma wkoll lill-istituzzjoni kompetenti tal-pajjiż ospitanti jekk iseħħu xi bidliet, bħal jekk l-istazzjonar ma jseħħx jew jiġi interrott. Aqra aktar dwar l-obbligi ta’ dikjarazzjoni fis-sit web tal-pajjiż ospitanti.
Kundizzjonijiet tax-xogħol
Bħala ħaddiem stazzjonat, int intitolat għall-kundizzjonijiet tal-impjieg tal-pajjiż ospitanti kull meta dawn ikunu aktar favorevoli minn dawk ta’ pajjiżek.
Iċċekkja liema kundizzjonijiet u drittijiet bażiċi tax-xogħol japplikaw
- l-elementi bażiċi kollha tar-remunerazzjoni kif definiti fil-liġi nazzjonali jew fi ftehimiet kollettivi applikabbli b’mod universali
- il-kumpens għas-sahra
- l-allowances jew ir-rimborż tal-ispejjeż biex jiġu kopertil-ispejjeż tal-ivvjaġġar, l-ikel u l-akkomodazzjoni fil-pajjiż ospitanti matul l-istazzjonar (jekk tkun meħtieġ tivvjaġġa matul l-istazzjonar)
- il-perjodi ta’ xogħol massimi
- il-perjodi minimi ta’ mistrieħ
- il-leave minimu annwali mħallas
- is-saħħa, is-sigurtà u l-iġjene fuq il-post tax-xogħol
- kwalunkwe kundizzjoni speċifika għar-reklutaġġ permezz ta’ aġenziji li jipprovdu staff temporanju
- il-miżuri protettivi għan-nisa tqal, in-nisa li reċentement welldu u ż-żgħażagħ (taħt it-18-il sena)
- it-trattament ugwali għall-irġiel u għan-nisa u regoli oħrajn biex tiġi evitata d-diskriminazzjoni
- il-kundizzjonijiet tal-akkomodazzjoni waqt li tkun qed taħdem’ il bogħod mill-post tax-xogħol regolari tiegħek, jekk ipprovduti mill-impjegatur tiegħek.
Twissija
Jekk it-termini u l-kundizzjonijiet f’pajjiżek ikunu aktar favorevoli minn dawk tal-pajjiż ospitanti, l-impjegatur tiegħek irid iżomm il-kundizzjonijiet ta’ pajjiżek matul l-istazzjonar.Kopertura tas-sigurtà soċjali meta tkun f'pajjiż barrani
Bħala ħaddiem stazzjonat, tibqa’ kopert taħt is-sistema tas-sigurtà soċjali ta’ pajjiżek. Biex tiżgura li tkompli tkun kopert, l-impjegatur tiegħek irid jikseb Dokument Portabbli A1 (formola PD A1) mill-istituzzjoni tas-sigurtà soċjali f’pajjiżek. Pajjiżek jinforma lill-awtoritajiet kompetenti tal-pajjiż ospitanti.
Iċċekkja kif taħdem is-sigurtà soċjali matul l-istazzjonar tiegħek
- m’għandekx għalfejn tirreġistra mal-awtoritajiet tas-sigurtà soċjali fil-pajjiż ospitanti.
- inti ma takkumula ebda dritt addizzjonali ta’ sigurtà soċjali bħal drittijiet tal-pensjoni jew id-dritt għal benefiċċji tal-qgħad fil-pajjiż fejn tkun ġejt stazzjonat.
- l-impjegatur tiegħek irid jitlob formola PD A1 mill-istituzzjoni tas-sigurtà soċjali f’pajjiżek.
Twissija
L-impjegatur tiegħek se jinnotifika t-tul tad-data tal-bidu u tat-tmiem tal-istazzjonar tiegħek fil-PD A1 tiegħek lis-sistema tas-sigurtà soċjali ta’ pajjiżek. Il-perjodu massimu permess fuq il-PD A1 huwa ta’ 24-il xahar.Madankollu, jekk l-istazzjonar idum aktar minn 24 xahar, tista’ jew:
- taqleb għas-sistema tas-sigurtà soċjali tal-pajjiż fejn tinsab stazzjonat. Għalkemm xogħlok jista’ jkompli, ma tibqax titqies bħala ħaddiem stazzjonat skont ir-regoli tal-koordinazzjoni tas-sigurtà soċjali.
- Itlob lill-impjegatur biex japplikalek għal estenzjoni tal-validità tal-formola PD A1rigward il-perjodu ta’ stazzjonar tiegħek biex tibqa’ kopert fil-pajjiż ta’ oriġini. L-estensjoni tingħata jekk jintlaħaq ftehim reċiproku bejn l-awtoritajiet kompetenti fiż-żewġ pajjiżi u jkun fl-interess tiegħek.
Skopri aktar dwar il-kopertura tas-sigurtà soċjali tiegħek waqt stazzjonar f’pajjiż ieħor tal-UE.
Stazzjonar fit-tul
Jekk il-perjodu standard tal-istazzjonar jinqabeż (12–18-il xahar), l-istazzjonar jibda jitqies fit-tul. Minn dak il-mument, il-kundizzjonijiet tax-xogħol u d-drittijiet bażiċi kollha se jiġu ggarantiti lilek, bl-eċċezzjoni ta’ dawk relatati mat-terminazzjoni tal-kuntratti; u pensjonijiet supplimentari tax-xogħol.
L-istazzjonar fit-tul ma għandux limitu ta’ żmien, u r-regoli kollha tiegħu se jkollhom japplikaw waqt li jkun għaddej l-istazzjonar.
Jekk int stazzjonat fit-tul f’pajjiż ieħor tal-UE għandu mnejn tixtieq li l-familja tiegħek tingħaqad miegħek bis-saħħa tad-drittijiet taċ-ċittadini tal-UE tagħhom, iżda mhux bħala d-dipendenti tiegħek.
Taxxa fuq l-introjtu
Ġeneralment titqies bħala resident taxxabbli, u tħallas it-taxxa fuq l-introjtu fil-pajjiż ospitanti tiegħek, jekk taħdem hemm għal aktar minn sitt xhur. Madankollu, xorta tista’ tiġi ntaxxat minn pajjiżek jekk:
- iżżomm id-dar permanenti tiegħek f’pajjiżek;
- ir-rabtiet personali u ekonomiċi tiegħek ma’ dak il-pajjiż huma aktar b’saħħithom.
Ma jeżistux regola applikabbli għall-Ewropa kollha li tistabbilixxi liema pajjiż jista' jintaxxak fuq l-introjtu meta tkun stazzjonat. Dan jeħtieġlu jkun stabbilit fil-liġijiet nazzjonali jew fil-ftehimiet dwar it-taxxa bejn il-pajjiżi tal-UE. Dejjem iċċekkja liema regoli japplikaw għalik, billi tikkuntattja lill-awtoritajiet tat-taxxa kemm tal-pajjiż ta’ oriġini tiegħek kif ukoll ta’ dak ospitanti.
Twissija
Iċċekkja informazzjoni aġġornata dwar it-tassazzjoni doppja biex tevita li l-introjtu tiegħek jiġi ntaxxat darbtejn.Storja bħala eżempju
Pere huwa infermier impjegat minn sptar fi Spanja. Huwa ntbagħat jaħdem fl-Iżvezja għal 11-il xhar fuq inkarigu temporanju. Se jżomm ir-residenza permanenti f’pajjiżu.
Qabel jitlaq, l-impjegatur ta’ Pere japplika għal formola PD A1 mal-awtorità kompetenti Spanjola biex juri li Pere se jibqa’ kopert mis-sigurtà soċjali Spanjola matul l-istazzjonar. L-awtoritajiet Spanjoli mbagħad jikkomunikaw mal-awtoritajiet Żvediżi dwar l-istazzjonar.
Filwaqt li Pere jaħdem fl-Iżvezja, huwa jibqa’ assigurat fi Spanja għall-kontribuzzjonijiet u l-benefiċċji tas-sigurtà soċjali. Fl-istess ħin, irid jirċievi l-kundizzjonijiet tax-xogħol li japplikaw fl-Iżvezja, bħar-regoli dwar il-paga, il-ħin tax-xogħol u s-saħħa u s-sikurezza, jekk dawn ikunu aktar favorevoli.
Normalment, Pere jkollu jħallas it-taxxa fuq l-introjtu tiegħu fl-Iżvezja, peress li se joqgħod għal aktar minn sitt xhur. Madankollu, xorta jista’ jkun meħtieġ iħallas it-taxxa fuq l-introjtu fi Spanja, peress li qed iżomm ir-residenza permanenti tiegħu hemm. Peress li dawn ir-regoli huma speċifiċi għall-pajjiż, Pere jmissu jiċċekkja mal-awtoritajiet tat-taxxa Żvediżi u dawk Spanjoli biex ikun jaf fejn għandu jħallas it-taxxa fuq l-introjtu u jevita t-tassazzjoni doppja.
Siti web dwar l-istazzjonar
Iċċekkja s-sit web nazzjonali tal-pajjiż ospitanti biex issib kemm it-termini u l-kundizzjonijiet tax-xogħol għall-ħaddiema stazzjonati, kif ukoll l-informazzjoni ta’ kuntatt tal-awtoritajiet lokali.
Uffiċċji Nazzjonali ta’ Kollegament
Kull pajjiż għandu awtorità kompetenti li tista’ twieġeb mistoqsijiet dwar l-istazzjonar tal-ħaddiema. Id-dettalji ta’ kuntatt ta’ dawn l-Uffiċċji Nazzjonali ta’ Kollegament huma taħt il-buttuna Staqsi l-amministrazzjonijiet nazzjonali hawn taħt.
Aktar informazzjoni
Għal aktar informazzjoni ċċekkja l-gwida qasira tal-UE dwar l-istazzjonar tal-ħaddiema
Ara wkoll il-gwida prattika tal-UE dwar l-istazzjonar.