L-impjegatur jista’ jibagħtek taħdem temporanjament f'pajjiż ieħor tal-UE. Matul dan il-perjodu, se takkwista l-istatus ta’ ħaddiem stazzjonat u se tibbenefika mill-istess kundizzjonijiet u drittijiet tax-xogħol bħall-ħaddiema fil-pajjiż ospitanti tiegħek.
Stazzjonar jista’ jdum sakemm ikun meħtieġ biex jitwettaq kompitu speċifiku. Meta l-istazzjonar tiegħek jintemm, għandek tirritorna lejn il-post tax-xogħol tiegħek fil-pajjiż tal-UE li minnu kont stazzjonat.
Kundizzjonijiet tax-xogħol
Se taqa’ taħt it-termini u l-kundizzjonijiet ta’ impjieg tal-pajjiż li qed jospitak jekk ikunu aktar vantaġġużi minn dawk tal-pajjiż ta’ oriġini tiegħek. Dawn il-kundizzjonijiet u t-termini tal-impjieg huma relatati ma’:
- L-elementi bażiċi kollha tar-remunerazzjoni kif definiti fil-liġi nazzjonali jew fi ftehimiet kollettivi applikabbli b’mod universali
- L-allowances jew ir-rimborż tal-ispejjeż biex jiġu koperti l-ispejjeż tal-ivvjaġġar, l-ikel u l-akkomodazzjoni fil-pajjiż ospitanti matul l-istazzjonar (jekk tkun meħtieġ tivvjaġġa matul l-istazzjonar)
- Il-perjodi ta’ xogħol massimi
- Il-perjodi minimi ta’ serħan
- Is-saħħa u s-sigurtà fuq ix-xogħol
- Il-kundizzjonijiet dwar ir-reklutaġġ ta’ ħaddiema, b’mod partikolari permezz ta’ aġenziji li jipprovdu staff temporanju
- Il-kundizzjonijiet tax-xogħol għal nisa tqal, nisa li għadhom kif welldu reċentement u żgħażagħ (taħt it-18-il sena)
- It-trattament ugwali għall-irġiel u għan-nisa u regoli oħrajn biex tiġi evitata d-diskriminazzjoni
- L-akkomodazzjoni, jekk ipprovduta mill-impjegatur
Drittijiet oħrajn
Waqt li tkun stazzjonat f'pajjiż ieħor tal-UE:
- ma jkunx jeħtieġlek permess tax-xogħol
- m’intix se tkun meħtieġ tikseb rikonoxximent tal-kwalifiki professjonali tiegħek; madankollu, għandu mnejn ikollok bżonn dikjarazzjoni bil-miktub għal ċerti professjonijiet: skopri aktar dwar ir-rikonoxximent tal-kwalifiki professjonali
- m’għandekx bżonn tirreġistra mal-awtoritajiet tas-sigurtà soċjali fil-pajjiż fejn ġejt stazzjonat, minħabba li inti tibqa’ assigurat fil-pajjiż fejn int normalment impjegat. Għalhekk, matul l-istazzjonar tiegħek, inti ma takkumula ebda dritt addizzjonali ta’ sigurtà soċjali bħal drittijiet tal-pensjoni jew id-dritt għal benefiċċji tal-qgħad fil-pajjiż fejn tkun ġejt stazzjonat.
- għandek tirreġistra r-residenza tiegħek mal-awtoritajiet jekk l-istazzjonar tiegħek hu itwal minn 3 xhur
- m’intix se takkumula d-dritt għar-residenza permanenti fil-pajjiż ospitanti
Stazzjonar fit-tul
Jekk tintbagħat għal aktar minn 12-il xahar (jew 18-il xahar jekk l-impjegatur jissottometti notifika motivata lill-awtoritajiet nazzjonali ta’ pajjiżek) it-termini u l-kundizzjonijiet kollha rilevanti tal-impjieg tal-pajjiż ospitanti japplikaw, bl-eċċezzjoni ta’ dawk relatati mat-terminazzjoni ta’ kuntratti u l-pensjonijiet tax-xogħol supplimentari.
Jekk int stazzjonat f’pajjiż ieħor tal-UE għal perjodu twil ta' żmien għandu mnejn tixtieq li l-familja tiegħek tingħaqad miegħek bis-saħħa tad-drittijiet taċ-ċittadini tal-UE tagħhom, iżda mhux bħala d-dipendenti tiegħek.
Taxxa fuq l-introjtu
Jekk taħdem fil-pajjiż ospitanti għal anqas minn sitt xhur, m’għandekx tkun suġġett għat-taxxa fuq id-dħul fih. Madankollu, ma teżisti ebda regola applikabbli għall-Ewropa kollha li tistabbilixxi liema pajjiż jista' jintaxxak fuq l-introjtu meta tkun stazzjonat. Dan jeħtieġlu jkun stabbilit fil-liġijiet nazzjonali jew fil-ftehimiet dwar it-taxxa bejn il-pajjiżi tal-UE.
Kopertura tas-sigurtà soċjali meta tkun f'pajjiż barrani
Bħala ħaddiem stazzjonat, biex tkompli tkun kopert mis-sistema tas-sigurtà soċjali fil-pajjiż ta’ oriġini, l-impjegatur tiegħek għandu jitlob il-formola PD A1 en mill-istituzzjoni tas-sigurtà soċjali fil-pajjiż ta’ oriġini tiegħek u jinforma l-awtoritajiet tal-pajjiż ospitanti. Jekk l-istazzjonar idum aktar minn sentejn, tista’ jew:
- taqleb għas-sistema tas-sigurtà soċjali tal-pajjiż fejn tinsab stazzjonat jew
- titlob lill-impjegatur biex tapplika biex tiġi estiża l-validità tal-perjodu ta’ stazzjonar tal-formola ta’ sigurtà soċjali tiegħek biex tibqa’ kopert fil-pajjiż ta’ oriġini. L-estensjoni tingħata jekk jintlaħaq ftehim reċiproku bejn l-awtoritajiet fiż-żewġ pajjiżi u jkun fl-interess tiegħek.
Skopri aktar dwar il-kopertura tas-sigurtà soċjali tiegħek waqt stazzjonar f'pajjiż ieħor tal-UE.
Qabel l-istazzjonar tiegħek
L-impjegatur jista’ wkoll ikollu bżonn jibgħat notifika bil-quddiem lill-awtoritajiet tal-pajjiż ospitanti bid-dettalji li ġejjin dwar:
- il-post tax-xogħol tiegħek
- it-tul ta’ żmien tal-istazzjonar tiegħek
- l-informazzjoni ta’ kuntatt tiegħek, u
- kwalunkwe dettall rilevanti ieħor.
Għal aktar informazzjoni ċċekkja l-gwida qasira tal-UE dwar l-istazzjonar tal-ħaddiema en
Ara wkoll il-gwida prattika tal-UE dwar l-istazzjonar en .
Siti web dwar l-istazzjonar
Iċċekkja s-sit web nazzjonali tal-pajjiż ospitanti biex issib kemm it-termini u l-kundizzjonijiet tax-xogħol għall-ħaddiema stazzjonati, kif ukoll l-informazzjoni ta’ kuntatt tal-awtoritajiet lokali.
Uffiċċji Nazzjonali ta’ Kollegament
Kull pajjiż għandu awtorità kompetenti li tista’ twieġeb mistoqsijiet dwar l-istazzjonar tal-ħaddiema. Id-dettalji ta’ kuntatt ta’ dawn l-Uffiċċji Nazzjonali ta’ Kollegament huma taħt il-buttuna Staqsi l-amministrazzjonijiet nazzjonali hawn taħt.