Impjegar ta’ ħaddiema tat-trasport bit-triq: ħin ta' sewqan u perjodi ta' mistrieħ

Ħin tax-xogħol fil-ġimgħa

Jekk timpjega ħaddiema involuti f’attivitajiet tat-trasport bit-triq, trid tiżgura li dawn jikkonformaw mar-regoli tal-UE dwar il-medja tal-ħin tax-xogħol fil-ġimgħa ta’ 48 siegħa.

Impjegat huwa kkunsidrat bħala ħaddiem tat-trasport meta:

• iwettaq attivitajiet ta’ trasport bit-triq (bħal sewqan, tagħbija u ħatt, għajnuna lill-passiġġieri biex jirkbu u jinżlu minn fuq il-vettura, tindif u manteniment tekniku, monitoraġġ tat-tagħbija u l-ħatt, formalitajiet amministrattivi)
• ma jkollu l-ebda ħin liberu u hu meħtieġ jistenna fl-istazzjon tax-xogħol/fil-vettura tiegħu, pereżempju matul il-perjodi ta’ tagħbija jew ħatt

Bħala impjegatur, ftakar li l-impjegati tiegħek jistgħu jsuqu biss sa massimu ta’ 9 sigħat kuljum. Madankollu, tista’ testendi l-ħin tas-sewqan ta’ kuljum għal massimu ta’ 10 sigħat u mhux aktar minn darbtejn fil-ġimgħa. Ix-xufiera tiegħek ma jistgħux isuqu aktar minn 56 siegħa fil-ġimgħa u s-sewqan totali tagħhom ma jistax jaqbeż 90 siegħa f’ġimagħtejn.

Tista’ testendi l-ħin tax-xogħol, jekk meħtieġ, għal massimu ta’ 60 siegħa f’ġimgħa waħda. Din l-estensjoni hi possibbli biss jekk l-impjegati tiegħek jaħdmu medja ta’ 48 siegħa fil-ġimgħa fuq perjodu ta’ 4 xhur.

Waqfiet ta’ mistrieħ matul ġurnata tax-xogħol

L-impjegati tiegħek m’għandhomx jaħdmu aktar minn 6 sigħat konsekuttivi mingħajr waqfa ta’ mistrieħ. Jekk l-impjegati tiegħek jaħdmu bejn 6 u 9 sigħat, huma intitolati għal waqfa ta’ mistrieħ ta’ mhux inqas minn 30 minuta. Jekk jaħdmu aktar minn 9 sigħat, huma intitolati għal waqfa ta’ mistrieħ ta’ mhux inqas minn 45 minuta.

Wara perjodu ta’ sewqan ta’ 4.5 sigħat, trid tiżgura li x-xufiera tiegħek jagħmlu waqfa ta’ mistrieħ bla interruzzjoni ta’ mhux inqas minn 45 minuta, sakemm ma jiħdux perjodu ta’ mistrieħ. Alternattivament, din il-waqfa ta’ mistrieħ tista’ tinqasam f’żewġ partijiet: l-ewwel waqfa ddum mill-inqas 15-il minuta, segwita mit-tieni waqfa ta’ mill-inqas 30 minuta.

Xogħol ta' billejl

Xogħol ta' billejl ifisser kwalunkwe xogħol imwettaq matul il-ħin tal-lejl. Skont ir-regoli tal-UE, ix-xogħol ta' billejl jirreferi għal perjodu ta’ mill-inqas 4 sigħat bejn 00:00 u s-07:00. Madankollu, dan il-perjodu jvarja bejn il-pajjiżi tal-UE.

Jekk l-impjegati tiegħek jaħdmu f’perjodu speċifiku ta’ mill-inqas 4 sigħat bejn 00:00 u s-07:00, huma jitqiesu bħala ħaddiema ta’ billejl. Jekk jagħmlu xogħol ta’ billejl, l-impjegati tiegħek ma jistgħux jagħmlu aktar minn 10 sigħat ta’ ħin tax-xogħol f’kull perjodu ta’ 24 siegħa.

Perjodi ta’ mistrieħ

Perjodi ta' mistrieħ ta' kuljum

Għandek tiggarantixxi lill-impjegati tiegħek perjodu regolari ta’ mistrieħ ta’ kuljum ta’ mill-inqas 11-il siegħa konsekuttivi. Tista’ tnaqqas il-perjodu ta’ mistrieħ għal 9 sigħat għal massimu ta’ 3 darbiet bejn kwalunkwe żewġ perjodi ta’ mistrieħ fil-ġimgħa. Ix-xufier jista’ jaqsam perjodu ta’ mistrieħ regolari ta’ kuljum f’żewġ partijiet: l-ewwel parti trid tkun mill-inqas 3 sigħat, it-tieni parti mill-inqas 9 sigħat, sabiex it-total taż-żewġ partijiet ikun mill-inqas 12-il siegħa.

Ix-xufiera jridu jlestu l-perjodu ta’ mistrieħ ta’ kuljum fi żmien 24 siegħa mill-bidu tal-jum tax-xogħol.

Serħan ta’ kull ġimgħa

Ix-xufiera li jieħdu perjodi ta’ mistrieħ mhux interrotti ta’ 45 siegħa jew aktar iridu jistrieħu f’akkomodazzjoni adatta li tirrispetta l-ġeneru b’faċilitajiet tal-irqad u sanitarji adegwati, u mhux fil-vettura. Bħala impjegatur, trid tkopri l-ispejjeż ta’ akkomodazzjoni bħal din.

L-impjegati tiegħek għandu jkollhom perjodu ta’ mistrieħ mhux interrott ta’ 45 siegħa fil-ġimgħa, li tista’ tnaqqas għal 24 siegħa kull tieni ġimgħa. Jekk tnaqqas il-perjodu ta’ mistrieħ fil-ġimgħa, trid tiftiehem mal-impjegati tiegħek dwar perjodu ta’ mistrieħ kumpensatorju.

Meta timmaniġġja l-iskeda tax-xogħol tal-impjegat tiegħek, trid tiżgura li jkollhom 45 sigħat kontinwi ta’ mistrieħ wara 6 ijiem ta’ sewqan u mill-inqas 24 siegħa kull tieni ġimgħa.

L-impjegati tiegħek jistgħu jieħdu perjodu mnaqqas ta’ mistrieħ kull tieni ġimgħa biss jekk tikkumpensahom għat-tnaqqis b’perjodu ta’ mistrieħ uniku ekwivalenti qabel tmiem it-tielet ġimgħa ta’ wara. Għandek tehmeż dan il-kumpens ma’ perjodu ieħor ta’ mistrieħ ta’ mill-inqas 9 sigħat.

Regoli speċjali għax-xufiera li jġorru l-merkanzija

Japplikaw regoli eċċezzjonali għal xufiera li huma involuti fit-trasport internazzjonali tal-merkanzija:

• Ix-xufiera jistgħu jieħdu żewġ perjodi mnaqqsa konsekuttivi ta’ mistrieħ fil-ġimgħa barra mill-pajjiż, dment li fi kwalunkwe 4 ġimgħat konsekuttivi jieħdu mill-inqas 4 perjodi ta’ mistrieħ fil-ġimgħa. Mill-inqas tnejn minn dawk il-perjodi ta’ mistrieħ iridu jkunu perjodi regolari ta’ mistrieħ fil-ġimgħa.
• Wara żewġ perjodi mnaqqsa konsekuttivi ta’ mistrieħ fil-ġimgħa, trid torganizza r-ritorn tax-xufier tiegħek matul it-tielet ġimgħa.
• Fit-tielet ġimgħa, il-ħin ta’ mistrieħ kumpensatorju għandu jippreċedi u jittieħed flimkien mal-perjodu regolari ta’ mistrieħ ta’ kull ġimgħa.

Regoli speċjali għax-xufiera li jġorru l-passiġġieri

Jekk ix-xufiera tal-kowċ tiegħek okkażjonalment iġorru lill-passiġġieri u jsuqu tal-anqas 24 siegħa konsekuttivi f’pajjiż ieħor tal-UE jew f’pajjiż mhux tal-UE, ikunu jistgħu jipposponu l-perjodu ta’ mistrieħ fil-ġimgħa. Huma jistgħu jistennew sa 12-il jum biex jeħduh, li jibda mit-tmiem tal-aħħar perjodu ta’ mistrieħ fil-ġimgħa meħud. Din ir-regola hija magħrufa wkoll bħala r-“regola ta’ 12-il jum” u tapplika biss meta l-vettura tkun mgħammra b’takografu diġitali jew intelliġenti.

Ix-xufiera tiegħek jistgħu jieħdu l-perjodi mnaqqsa ta’ mistrieħ fil-ġimgħa tagħhom kif ġej:

• mill-inqas 45 siegħa qabel il-vjaġġ
• mill-inqas perjodu wieħed regolari u perjodu wieħed imnaqqas ta’ mistrieħ fil-ġimgħa wieħed wara l-ieħor (69 siegħa), jew żewġ perjodi regolari ta’ mistrieħ fil-ġimgħa (45 siegħa + 45 siegħa), wara l-vjaġġ

L-impjegati tiegħek jistgħu jieħdu perjodu mnaqqas ta’ mistrieħ kull tieni ġimgħa biss jekk tikkumpensahom b’perjodu ta’ mistrieħ uniku ekwivalenti qabel tmiem it-tielet ġimgħa ta’ wara. Għandek tehmeż dan il-kumpens ma’ perjodu ieħor ta’ mistrieħ ta’ mill-inqas 9 sigħat.

Jekk il-vetturi tiegħek għandhom ekwipaġġ ta’ wieħed, ix-xufier tiegħek irid jieħu pawża kull 3 sigħat meta jsuq bejn l-22:00 u s-6:00.

Ritorn tax-xufier

Bħala impjegatur, trid torganizza x-xogħol u l-ħin frank tax-xufier sabiex ma jkunx barra fuq xogħol għal aktar minn 4 ġimgħat konsekuttivi.

Skont ir-regoli tal-UE, il-post tar-ritorn tax-xufier jista’ jkun jew:

• ir-residenza uffiċjali tax-xufier
• iċ-ċentru operazzjonali tal-impjegatur

Huwa f’idejn ix-xufier li jagħżel il-post tar-ritorn. Jekk ix-xufier ma jagħmilx għażla, l-impjegatur jista’ jieħu dik id-deċiżjoni.

Takografu

Takografu huwa apparat li jirreġistra:

• il-ħinijiet ta' sewqan
• il-waqfiet ta’ mistrieħ u l-perjodi ta’ mistrieħ
• il-veloċità tal-vettura u d-distanza mwettqa
• xogħol jew kompiti oħra mwettqa mix-xufier (bħat-tagħbija u l-ħatt tal-merkanzija)

Bħala impjegatur, trid tiżgura li x-xufiera tiegħek ikunu mħarrġa biex jużaw it-takografu b’mod korrett. Trid iżżomm ir-rekords tat-takografu għal mill-inqas sena. Jistgħu jiġu pprovduti kopji lix-xufier jew lill-awtoritajiet lokali fuq talba.

Mistoqsijiet u tweġibiet dwar ir-reġistrazzjoni manwali tal-qsim tal-fruntieri fit-takografi en

L-awtoritajiet lokali jistgħu jispezzjonaw it-takografu fi kwalunkwe ħin matul il-kontrolli mal-ġenb tat-triq. Ir-reġistrazzjoni tal-irregolaritajiet tista’ tkun soġġetta għal penali.

Japplikaw regoli speċjali meta l-impjegati tiegħek ikunu posted drivers.