Jekk qed tiċċaqlaq għal żmien twil lejn pajjiż tal-UE ieħor u tixtieq tipprattika l-professjoni regolata tiegħek fih, se jkollok tapplika għal rikonoxximent professjonali.
Twissija
Jekk int tabib, infermiera responsabbli għal kura ġenerali, qabla, dentist, farmaċist, arkitett jew kirurgu veterinarju, int tgawdi minn rikonoxximent awtomatiku tal-kwalifiki tiegħek.
Dak li jeħtieġlek tissottometti
Jeħtieġlek tissottometti d-dokumenti li ġejjin flimkien mal-applikazzjoni tiegħek għar-rikonoxximent professjonali:
- evidenza tan-nazzjonalità tiegħek
- kopja taċ-ċertifikat professjonali tiegħek (għandu mnejn jeħtieġlek tissottometti traduzzjoni ċertifikata)
- prova tal-esperjenza professjonali tiegħek (għandu mnejn jeħtieġlek tissottometti traduzzjoni ċertifikata)
- prova li qatt ma kont misjub ħati ta' offiża kriminali
- ċertifikat mediku li m'intix marid
- prova tal-mezzi finanzjarji tiegħek
- prova ta' assigurazzjoni ta' responsabbiltà professjonali
X'jiġri mill-applikazzjoni tiegħek
Meta tibgħat l-applikazzjoni tiegħek u d-dokumenti ta' sostenn, l-awtoritajiet:
- jibagħtulek li rċevewha fi żmien xahar (fi żmien ġimgħa jekk għandek id-dritt li tapplika bl-użu tal- Karta Professjonali Ewropea). Jekk ikun hemm problema bil-fajl tiegħek jista' jieħu sa 4 xhur qabel tisma' lura mingħand l-awtoritajiet.
- għandhom jinfurmawk kemm se tiswa l-proċedura
- jistgħu jistaqsu għal dokumenti addizzjonali
- għandhom jiddeċiedu fi żmien 4 xhur (sa 3 xhur jekk għandek id-dritt li tapplika bl-użu tal-Karta Professjonali Ewropea) wara li jirċievu l-applikazzjoni tiegħek.
- għandhom jagħtuk spjegazzjoni jekk jiddeċiedu li jirrifjutaw l-applikazzjoni tiegħek.
Jekk l-awtoritajiet jiddeċiedu li hemm differenzi sostanzjali bejn ir-rekwiżiti għall-irċevar tal-kwalifiki tiegħek fil-pajjiż domiċiljarju tiegħek u f'dawk tal-pajjiż ospitanti, jistgħu jitolbuk li tgħaddi minn test ta' aptitudni jew li twettaq traineeship. F'dan il-każ, huma ma jiħdux deċiżjoni finali qabel ma tkun issodisfajt dawn il-kundizzjonijiet addizzjonali.
Twissija
Jekk tintalab li tissodisfa kundizzjonijiet addizzjonali biex tipprova l-validità tal-kwalifiki tiegħek, għandek tkun tista' tagħżel bejn testijiet ta' aptitudni jew traineeship ta' adattament. Madankollu, għal xi wħud mill-professjonijiet, l-awtoritajiet jistgħu b'mod speċifiku jeħtieġu kemm testijiet ta' aptitudni jew traineeship ta' adattament.
Jekk l-awtoritajiet ma jiħdux deċiżjoni fiż-żmien 4 xhur, tista' wkoll tikkonsulta lis- servizzi ta' assistenza tagħna jew il- punti ta' kuntatt nazzjonali għar-rikonoxximent tal-kwalifiki professjonali . Jekk dawn ma jistgħux jgħinuk, tista' wkoll tieħu l-każ tiegħek fil-qrati nazzjonali.