Drittijiet tal-passiġġieri fuq bastiment

Drittijiet f'każ ta' dewmien u kanċellazzjoni

Ir-regoli tal-UE dwar id-drittijiet tal-passiġġieri fuq bastiment normalment japplikaw meta tivvjaġġa fuq il-biċċa l-kbira tal-laneċ u l-bastimenti tal-kruċiera bil-baħar jew fuq passaġġi tal-ilma interni (xmajjar, lagi jew kanali) u jekk int:

• tbaħħar minn port tal-UE
• tbaħħar lejn port tal-UE minn port barra l-UE, jekk is-servizz ikun operat minn kumpanija tat-trasport tal-UE
• tbaħħar minn port tal-UE fuq kruċiera tad-divertiment/rikreattiva jekk l-akkomodazzjoni tkun offruta flimkien ma' faċilitajiet oħra, b'aktar minn 2 iljieli abbord.

Dawn ir-regoli ma jgħoddux:

• għal bastimenti li jistgħu jġorru sa 12-il passiġġier
• għal bastimenti li ma għandhomx aktar minn 3 membri tal-ekwipaġġ
• għal bastimenti li jkopru distanza ta' anqas minn 500 metru – f'direzzjoni waħda
• għall-biċċa l-kbira tal-bastimenti storiċi
• għal bastimenti tal-eskursjonijiet u taż-żjarat turistiċi, jekk ma jkollhomx faċilitajiet ta' akkomodazzjoni jew jekk il-passiġġieri ma jorqdux abbord għal aktar minn żewġt iljieli.

Matul il-vjaġġ, l-operatur għandu jipprovdi informazzjoni ċara u korretta dwar is-servizz u d-drittijiet tal-passiġġier, inklużi l-kundizzjonijiet tal-aċċess għall- persuni b'diżabbiltà jew b'mobbiltà mnaqqsa. Din l-informazzjoni għandha tkun disponibbli f'format aċċessibbli għall-persuni b'diżabbiltà.

Drittijiet f'każ ta' inċidenti fuq il-baħar

Ir-regoli tal-UE jkopru wkoll lilek, il-luggage tiegħek, il-vettura tiegħek u jekk rilevanti, it-tagħmir ta' mobbiltà tiegħek f'każ ta' inċident fuq il-baħar. Dawn ir-regoli jistabbilixxu wkoll l-obbligazzjonijiet tat-trasportaturi f'dan ir-rigward. Dawn ir-regoli jistgħu japplikaw għall-vjaġġi bil-baħar domestiċi kif ukoll għall-vjaġġi internazzjonali kollha fejn:

• il-bastiment hu rreġistrat f'pajjiż tal-UE
• il-kuntratt għall-vjaġġ ġie konkluż f'pajjiż tal-UE

• il-bastiment jitlaq u/jew jasal f'port tal-UE

Qabel ma tivvjaġġa, it-trasportatur irid jipprovdilek informazzjoni ċara u xierqa dwar drittijietek jekk tixtri l-biljett tiegħek f'pajjiż tal-UE jew mhux aktar tard minn meta titlaq minn pajjiż li mhux fl-UE.

X'mar ħażin?

• Il-qsim tal-bastiment tiegħek ġie kkanċellat
• Il-qsim tal-bastiment tiegħek kellu dewmien fit-tluq
• Il-bastiment tiegħek wasal b'dewmien
• Il-luggage tiegħek intilef, ittardja jew ġratlu l-ħsara waqt vjaġġ fuq il-baħar
• Korrejt f'inċident fuq il-baħar
• Int id-dipendenti ta' vittma ta' inċident fatali fuq il-baħar

Il-qsim tal-bastiment tiegħek ġie kkanċellat

Jekk il-lanċa jew il-kruċiera li tkun ibbukkjajt fuqha tiġi ttardjata jew ikkanċellata, it-trasportatur jew il-korp li jmexxi t-terminal għandu jinformak dwar il-ħinijiet stmati l-ġodda tat-tluq u tal-wasla fi żmien 30 minuta mill-ħin tat-tluq oriġinarjament skedat. Iridu jipprovdu wkoll informazzjoni dwar id-drittijiet tal-passiġġieri tiegħek.

Jekk is-servizz ikun ikkanċellat, it-trasportatur għandu joffrilek għażla bejn:

• rimborż għall-biljett u, fejn ikun il-każ, vjaġġ b'xejn lura lejn il-punt tat-tluq tal-bidu nett tas-servizz – pereżempju, jekk id-dewmien ma jħallikx tissodisfa l-għan tal-vjaġġ tiegħek

jew

• bdil tar-rotta b'kundizzjonijiet simili sad-destinazzjoni finali tiegħek mal-ewwel opportunità bla ebda spejjeż żejda

Jekk titlef servizz ta' trasport ta' konnessjoni minħabba kanċellazzjoni, it-trasportatur għandu jagħmel kull sforz biex jinformak dwar konnessjonijiet alternattivi.

Inti intitolat ukoll għall-assistenza fil-forma ta':

• snacks, ikel jew xorb, skont il-ħin ta' stennija, sakemm ikunu disponibbli jew jistgħu jiġu fornuti b'mod raġonevoli fuq il-bastiment jew fit-terminal
• akkomodazzjoni jekk ikollok tgħaddi llejl hemm – sa tlitt iljieli, b'rata massima ta' €80 kull lejl – u trasport lejn l-akkomodazzjoni u ritorn għat-terminal

M'intix intitolat għal akkomodazzjoni jekk il-kanċellazzjoni kienet ikkawżata minn kundizzjonijiet tat-temp severi.

Il-qsim tal-bastiment tiegħek kellu dewmien fit-tluq

Jekk il-lanċa jew il-kruċiera li tkun ibbukkjajt fuqha tiġi ttardjata jew ikkanċellata, it-trasportatur jew il-korp li jmexxi t-terminal għandu jinformak dwar il-ħinijiet stmati l-ġodda tat-tluq u tal-wasla fi żmien 30 minuta mill-ħin tat-tluq oriġinarjament skedat. Iridu jipprovdu wkoll informazzjoni dwar id-drittijiet tal-passiġġieri tiegħek.

Jekk is-servizz jiddawwar għal aktar minn 90 minuta, tingħata għażla bejn:

• rimborż għall-biljett u, fejn ikun il-każ, vjaġġ b'xejn lura lejn il-punt tat-tluq tal-bidu nett tas-servizz – pereżempju, jekk id-dewmien ma jħallikx tissodisfa l-għan tal-vjaġġ tiegħek

jew

• bdil tar-rotta b'kundizzjonijiet simili sad-destinazzjoni finali tiegħek mal-ewwel opportunità bla ebda spejjeż żejda

Inti intitolat ukoll għall-assistenza fil-forma ta':

• snacks, ikel jew xorb, skont il-ħin ta' stennija, sakemm ikunu disponibbli jew jistgħu jiġu fornuti b'mod raġonevoli fuq il-bastiment jew fit-terminal
• akkomodazzjoni - jekk ikollok tgħaddi llejl hemm (sa tlitt iljieli, b'rata massima ta' €80 kull lejl) - u trasport lejn l-akkomodazzjoni u ritorn għat-terminal

M'intix intitolat għal akkomodazzjoni jekk il-kanċellazzjoni kienet ikkawżata minn kundizzjonijiet tat-temp severi.

Il-bastiment tiegħek wasal b'dewmien

Jekk hemm dewmien ta' aktar minn siegħa fil-wasla tiegħek fid-destinazzjoni, tkun intitolat għal kumpens. L-ammont li tirċievi jiddependi fuq it-tul tad-dewmien - il-livell minimu ta' kumpens hu 25% sa massimu ta' 50% tal-prezz tal-biljett.

Il-luggage tiegħek intilef, ittardja jew ġratlu l-ħsara f'inċident fuq il-baħar

Jekk il-luggage u/jew il-vettura tiegħek jintilfu, jaslu tard jew issirilhom il-ħsara minħabba inċident tat-tbaħħir, għandek id-dritt għal kumpens mingħand it-trasportatur sa madwar €2,700 għall-luggage tal-kabina u €15,500 għall-vettura tiegħek – dan ikopri kwalunkwe luggage fil-vettura. M'intix intitolat għal kumpens jekk it-trasportatur jista' juri li ma kellux tort. Għat-telf jew ħsara lil oġġetti oħra ta' valur (pereżempju flus, ġojjellerija, xogħlijiet ta' arti, eċċ.) inti għandek dritt għal kumpens ta' madwar €4,100 bil-kundizzjoni li tpoġġihom mat-trasportatur biex jinżammu fis-sigurtà.

Jekk il-wheelchair jew xi apparat ieħor ta' għajnuna għall-mobbiltà ssirlu l-ħsara jew jintilef, int intitolat għal kumpens biex tkopri l-ispiża tas-sostituzzjoni jew tat-tiswija tiegħu.

Korrejt f'inċident fuq il-baħar

Jekk tkorri f'inċident fuq il-baħar, tkun intitolat għal kumpens ta' madwar €300,000 mingħand it-trasportatur jew mingħand l-assiguratur tiegħu. F'każijiet fejn it-telf jew il-ħsara jaqbżu dan l-ammont, il-kumpens jista' jiżdied għal limitu massimu ta' madwar €490,000. Għandek ukoll id-dritt għal ħlas bil-quddiem, fi proporzjon mad-danni sofferti, biex tkopri kull ħtieġa immedjata jekk il-korriment tiegħek kien ikkawżat minn nawfraġju, qlib, ħabta, inkaljar tal-bastiment, splużjoni jew nar fuq il-bastiment, jew difett fil-bastiment.

Int dipendenti ta' vittma ta' inċident fatali fuq il-baħar

Jekk int dipendenti ta' vittma ta' inċident fatali fuq il-baħar, għandek id-dritt għal kumpens ta' madwar €300,000 mingħand it-trasportatur jew mingħand l-assiguratur tiegħu. F'xi każijiet, il-kumpens jista' jiżdied għal limitu massimu ta' madwar €490,000. Għandek ukoll id-dritt għal pagament bil-quddiem ta' mhux anqas minn €21,000 biex ikopru kwalunkwe ħtieġa immedjata jekk il-mewt tal-vittma kienet ikkawżat minn nawfraġju, qlib, ħabta, inkaljar tal-bastiment, splużjoni jew nar fuq il-bastiment, jew difett fil-bastiment.