Għodod tas-servizz

Selettur tal-lingwa

Il-bandiera tal-UE

Mogħdija tan-navigazzjoni

Menu

Aġġornat : 12/01/2018

Prezzijiet u pagamenti

Meta tixtri oġġetti jew servizzi fl-UE, trid tkun infurmat b'mod ċar dwar il- prezz totali , inklużi t-taxxi u l-miżati addizzjonali kollha.

Għal xiri online, trid tirrikonoxxi espliċitament - pereżempju billi tagħfas buttuna - li inti konxju li meta tagħmel l-ordni tiegħek għandek l-obbligu li tħallas.

Soprataxxi: tariffi għall-użu ta' kards

In-negozjanti fl-UE mhumiex permessi li jitolbuk tħallas aktar jekk tuża l-kard ta' kreditu jew ta' debitu tiegħek. L-uniċi eċċezzjonijiet għal din ir-regola huma l-kards American Express/Diners Club u l-kards tal-kreditu tan-negozju jew korporattivi, fejn min iħaddmek huwa fatturat minflokok. Jekk tuża dawn il-kards, jista' jagħti l-kas li xorta tiġi ċċarġjat tariffa iżda t-tariffa ma tistax tkun ogħla milli fil-fatt tiġi tiswa lin-negozjant biex jipproċessa l-pagament tiegħek.

Għandek tkun taf li jekk tħallas f'muniti tal-UE li mhumiex euros, xorta tista' tiġi ċċarġjat tariffa għall-konverżjoni tal-valuta mill-provveditur tal-kard tiegħek meta tuża l-kard tiegħek f'pajjiż ieħor tal-UE.

Miżati għal servizzi addizzjonali

Trid tagħti l-kunsens tiegħek għal kwalunkwe pagament addizzjonali mitlub min-negozjant, pereżempju kunsinna express, tgeżwir f'karta tar-rigali jew assigurazzjoni tal-ivvjaġġar.

Negozjant ma jistax jitolbok ħlas għal dawn is-servizzi sakemm inti ma tagħażilhomx espliċitament. L-użu ta' kaxxa ttikkjata minn qabel fis-sit web tan-negozjant ma tikkostitwixxix kunsens ta' din ix-xorta, għalhekk se tkun intitolat għal rimborż ta' kwalunkwe pagament li jkun inġabar b'dan il-mod.

Storja bħala eżempju

In-negozjanti jridu jgħidulek il-prezz sħiħ (inklużi taxxi u miżati) qabel tħallas

Ewa mill-Polonja xtrat xi kotba minn negozjant online. Madankollu, il-kard tal-kreditu tagħha ġiet iċċarġjata iktar mill-ammont totali muri fil-punt tal-bejgħ tas-sit web tan-negozjant. Ewa ndunat li l-kumpanija ma kinitx inkludiet l-ispejjeż għall-posta, u żidithom wara li lestiet ix-xirja tagħha.

Minħabba li r-regoli tal-UE jobbligaw lin-negozjanti juru l-informazzjoni dwar il-prezz korrett u totali qabel ma konsumatur jagħmel akkwist online, Ewa rrapportat il-kwistjoni kemm lill-kumpanija kif ukoll lill-awtoritajiet Pollakki. Wara intervent mill-awtoritajiet, ingħatat lura d-differenza.

Diskriminazzjoni fil-prezz

Bħala ċittadin tal-UE ma tistax tiġi ċċarġjat prezz ogħla meta tixtri prodotti jew servizzi sempliċiment minħabba n-nazzjonalità jew il-pajjiż ta' residenza tiegħek. Xi differenzi fil-prezzijiet jistgħu jkunu ġustifikati, sakemm dawn ikunu bbażati fuq kriterji oġġettivi minbarra n-nazzjonalità.

Storja bħala eżempju

Xi drabi d-differenzi fil-prezzijiet jistgħu jkunu ġustifikati

Bart, min-Netherlands, żar lil sieħbu l-Ġermanja u mar il-pixxina. Hu kellu jħallas prezz ogħla mir-residenti ta' hemm u ħaseb li din hija diskriminazzjoni illegali tal-prezz.

F'dan il-każ, id-differenza fil-prezz hija ġustifikata. Il-pixxina hija mmexxija minn awtorità u ffinanzjata mit-taxxi lokali, għalhekk ir-residenti lokali diġà taw il-kontribut tagħhom għat-tmexxija tal-pixxina u għalhekk igawdu minn prezz irħas tad-dħul.

Storja bħala eżempju

Ma jistgħux jitolbuk tħallas aktar sempliċiment minħabba l-pajjiż ta' residenza tiegħek

Hilda mid-Danimarka riedet tikri karozza fi Spanja għall-vaganzi tas-sajf. Hija għażlet il-karozza li xtaqet tibbukkja fuq is-sit web ta' kumpanija tal-kiri tal-karozzi fi Spanja. Madankollu, meta daħlet l-indirizz tagħha biex tiffinalizza l-prenotazzjoni, hija rat li l-prezz totali tagħha għall-kiri tal-karozza żdied b'EUR 140.

Hilda kkuntattja iċ-Ċentru tal-Konsumatur Ewropew lokali tagħha biex tilmenta dwar din id-diskriminazzjoni fil-prezz. Huma talbu lill-kumpanija tal-kiri tal-karozzi biex tallinja s-sit web tagħha mar-regoli tal-UE.

Ir-regoli tal-prezzijiet tal-biljetti tal-ivvjaġġar

Ir-regoli tal-UE dwar il-prezzijiet japplikaw ukoll meta tixtri biljetti tal-ivvjaġġar, bħal titjiriet jew biljetti tal-ferrovija, online jew personalment. Dan ifisser li meta tixtri l-biljetti tiegħek, it-taxxi, it-tariffi u l-miżati kollha għandhom ikunu inklużi u jidhru fil-prezz totali mill-bidu tal-proċess tal-ibbukkjar. Dan jagħmilha aktar faċli għalik biex tqabbel il-prezzijiet ma' operaturi oħra tal-ivvjaġġar. 

Kwalunkwe suppliment fakultattiv (bħall-assigurazzjoni tal-ivvjaġġar) għandu jkun indikat b'mod ċar u rrikkmandat biss bħala għażla ħielsa.

Għall-akkwist ta' biljetti tal-ajru, jekk tiskopri prezzijiet online li ma jkunux ċari meta tibbukkja titjira, tista' tirrapporta għand l- awtoritajiet nazzjonali fil-pajjiż ta' residenza tal-UE tiegħek.

Konsultazzjonijiet pubbliċi
    Teħtieġ l-għajnuna mis-servizzi ta’ assistenza?
    Sib għajnuna u pariri