Dokumenti tal-ivvjaġġar għal membri tal-familja li mhumiex ċittadini tal-UE
Deċiżjoni tar-Renju Unit li tinvoka l-Artikolu 50 tat-TUE: Aktar informazzjoni
Għalissa, ir-Renju Unit għadu membru sħiħ tal-UE u d-drittijiet u l-obbligi għadhom japplikaw bis-sħiħ fir-Renju Unit:
- Mistoqsijiet u Tweġibiet ibbażati fuq ir-Rapport Konġunt tat-8 ta' Diċembru 2017 mill-UE u r-Renju Uniten
- Pubblikazzjonijiet tal-UE dwar il-Brexit
- Informazzjoni u gwida tal-gvern tar-Renju Unit dwar il-Brexiten
Il-membri tal-familja tiegħek għandhom bżonn viża?
Jekk int ċittadin tal-UE iżda għandek membri tal-familja li mhumiex, jistgħu jakkumpanjawk jew jingħaqdu miegħek f'pajjiż ieħor tal-UE.
Dawn għandhom iġorru fuqhom passaport validu l-ħin kollu u, skont pajjiżhom, jista' jkun li jeħtiġilhom juru viża ta' dħul mal-fruntiera.
Biex jiġu evitati l-problemi, ikkuntattja l-konsulat jew l-ambaxxata tal-pajjiż li se tkunu qed tivvjaġġaw fih ħafna qabel iż-żmien biex tkun taf x'dokumenti l-membru tal-familja tiegħek li mhuwiex ċittadin tal-UE se jintalab jippreżenta mal-fruntiera.
Eżenzjoni tal-viża
Martek/żewġek, il-ġenituri, nannietek, uliedek jew neputijietek li mhumiex ċittadini tal-UE ma jeħtiġilhomx jakkwistaw viża mill-pajjiż li qed jivvjaġġaw fih jekk:
- Għandhom karta ta' residenza bħala membru tal-familja tal-UE, maħruġa skont ir-regoli tal-UE minn kwalunkwe pajjiż tal-UE (ħlief il-pajjiż li tiegħu għandek iċ-ċittadinanza), u se jivvjaġġaw flimkien miegħek jew biex jingħaqdu miegħek f'pajjiż ieħor tal-UE. Il-karta ta' residenza għandha tindika b'mod ċar li d-detentur hu membru ta' familja ta' ċittadin mill-UE.
jew
- Għandhom permess ta' residenza nazzjonali jew viża minn pajjiż ieħor fiż-żona ta' Schengen bla fruntieri (ara l-lista hawn taħt) u l-pajjiż li qed jivvjaġġaw fih jappartjeni għal dik iż-żona.
|
Iż-żona bla fruntieri ta' Schengen tinkludi: |
Iż-żona mhux ta' Schengen tinkludi: |
|---|---|
|
l-Awstrija, il-Belġju, ir-Repubblika Ċeka, id-Danmarka, l-Estonja, il-Finlandja, Franza, il-Ġermanja, il-Greċja, l-Ungerija, l-Iżlanda, l-Italja, il-Latvja, il-Liechtenstein, il-Litwanja, il-Lussemburgu, Malta, in-Netherlands, in-Norveġja, il-Polonja, il-Portugall, is-Slovakkja, is-Slovenja, Spanja, l-Iżvezja, l-Iżvizzera. |
il-Bulgarija, il-Kroazja, Ċipru, l-Irlanda, ir-Rumanija, ir-Renju Unit. |
Permessi ta' residenza maħruġa minn pajjiżi barra ż-żona ta' Schengen ma jippermettux lill-membri tal-familja li mhumiex ċittadini tal-UE jivvjaġġaw mingħajr viża lejn pajjiż taż-żona ta' Schengen.
Storja bħala eżempju
Anke jekk għandek permess ta' residenza nazzjonali, hija meħtieġa viża tad-dħul għal vjaġġ lejn pajjiż li ma jagħmlix parti mill-ftehim ta' Schengen
Joyce, Niġerjana, tgħix in-Netherlands mar-raġel Olandiż tagħha Luuk. Bħala membru tal-familja ta' ċittadin Olandiż, Joyce inħarġilha permess ta' residenza Olandiż fin-Netherlands. Joyce tixtieq issiefer ma' Luuk fuq il-vjaġġ ta' negozju tiegħu li jmiss lejn Dublin. Peress li l-Irlanda mhijiex parti miż-żona ta' Schengen, Joyce trid tikseb viża tad-dħul biex tivvjaġġa lejn l-Irlanda ma' Luuk.
Storja bħala eżempju
Id-detenturi ta' karta ta' residenza ta' membru tal-familja ta' ċittadin tal-UE m'għandhomx bżonn li jiksbu viża jekk jivvjaġġaw ma' ċittadin tal-UE
Ying, il-mara Ċiniża ta' ċittadin Ġermaniż fil-Finlandja, kienet inħarġitilha karta ta' residenza ta' membru tal-familja tal-UE fil-Finlandja. Ying u żewġha jixtiequ jivvjaġġaw lejn ir-Rumanija fil-ħarifa. Peress li Ying għandha passaport validu u karta ta' residenza ta' membru tal-familja tal-UE, hi mhix meħtieġa li tikseb viża ta' dħul biex tivvjaġġa lejn ir-Rumanija ma' żewġha.
Jekk għandek karta ta' residenza ta' membru tal-familja tal-UE u qed tivvjaġġa lejn pajjiż ieħor tal-UE/ŻEE mingħajr martek jew żewġek, trid tapplika għal viża biex tidħol f'dak il-pajjiż.
Tista' tistaqsi lil pajjiż tal-UE biex jirrikonoxxi b'mod uffiċjali lis- sieħeb/sieħba rreġistrat/a u l-familja estiża - aħwa, kuġini, żijiet, u oħrajn - bħala membri tal-familja ta' ċittadin tal-UE. Il-pajjiżi tal-UE mhumiex marbutin li jirrikonoxxuhom bħala membri tal-familja tiegħek iżda għandhom tal-anqas jikkunsidraw it-talba.
Applikazzjoni għall-viża
Jekk il-membri tal-familja tiegħek li mhumiex mill-UE tinħtiġilhom viża tad-dħul, għandhom japplikaw għal waħda minn qabel mingħand il-konsulat jew l-ambaxxata tal-pajjiż li jixtiequ jivvjaġġaw fih. Jekk dawn se jkunu qed jivvjaġġaw miegħek, jew se jingħaqdu miegħek f'pajjiż ieħor tal-UE, l-applikazzjoni tagħhom għandha tkun ipproċessata malajr u bla ħlas:
- Il-pajjiżi li huma membri taż-żona bla fruntieri ta' Schengen għandhom jipprovdu l-viżi fi żmien 15-il ġurnata, ħlief f'każijiet rari, meta l-awtoritajiet jiġġustifikaw id-deċiżjonijiet tagħhom.
- Il-pajjiżi l-oħrajn kollha (il-Bulgarija, il-Kroazja, Ċipru, l-Irlanda, ir-Rumanija, ir-Renju Unit) għandhom joħorġu l-viżi mill-aktar fis possibbli.
Id-dokumenti li l-membri ta' familtek jeħtiġilhom jinkludu fl-applikazzjoni tal-viża tagħhom jistgħu jvarjaw minn pajjiż għal ieħor. Qabel ma tivvjaġġa, iċċekkja liema huma mal-konsulat jew l-ambaxxata tal-pajjiż ta' destinazzjoni fejn huma meħtieġa d-dokumenti.
Il-viżi maħruġin minn pajjiż li jappartjeni għaż-żona bla fruntieri ta' Schengen huma validi għall-pajjiżi kollha f'dik iż-żona.
Jekk tgħix barra l-UE u l-membri tal-familja tiegħek li mhumiex ċittadini tal-UE jakkumpanjawk jew jivvjaġġaw lejn il- pajjiż tal-UE tan-nazzjonalità tiegħek, ir-regoli transfruntiera tal-UE mhux bilfors japplikaw u l-membri tal-familja tiegħek li mhumiex ċittadini tal-UE jistgħu jkollhom iħallsu t-tariffi tal-viża.
Storja bħala eżempju
Ċertifikat taż-żwieġ biżżejjed biex tingħata viża
Thomas hu Irlandiż u jgħix il-Belarus ma' martu Delia, ċittadina Belarussa. Meta xtaqu jżuru lill-omm Thomas, li issa qed tgħix fi Spanja, huma applikaw għall-viża ta' dħul għal Delia.
Hi inkludiet iċ-ċertifikat taż-żwieġ fl-applikazzjoni, iżda l-awtoritajiet Spanjoli talbu wkoll prova tal-akkomodazzjoni fil-lukanda fi Spanja u tal-assigurazzjoni kontra l-mard qabel ma joħorġulha l-viża.
Madankollu, meta Delia qaltilhom li ma kinux meħtieġa aktar dokumenti ta' din ix-xorta skont il-liġi tal-UE, l-awtoritajiet Spanjoli skużaw ruħhom għall-iżball tagħhom u immedjatament ħarġulha l-viża ta' dħul.
Mal-fruntiera mingħajr viża ta' dħul
L-aħjar dejjem hu li l-membri tal-familja tiegħek li mhumiex ċittadini tal-UE jkunu mgħarrfin dwar dan minn qabel u jkollhom id-dokumenti meħtieġa kollha qabel ma jibdew il-vjaġġ tagħhom.
Madankollu, jekk jaslu mal-fruntiera mingħajr ma jkollhom viża ta' dħul, l-awtoritajiet tal-fruntieri għandhom jagħtuhom l- opportunità li juru b'mezzi oħra li huma membri tal-familja tiegħek. Jekk jirnexxilhom juru dan, għandha tinħarġilhom viża ta' dħul fil-post.
Jekk il-membri tal-familja tiegħek qed ikollhom diffikultajiet biex jiksbu viża, tista' tikkuntattja lis- servizzi ta' assistenza
tagħna.
Rifjut ta' dħul
F'każijiet rari ħafna, pajjiż tal-UE jista' jirrifjuta d-dħul tiegħek jew ta' membri tal-familja tiegħek minħabba "politika pubblika, sigurtà pubblika u saħħa pubblika".
Jekk dan iseħħ, l-awtoritajiet għandhom juru li int jew il-membri tal-familja tiegħek huma "ta' theddida ġenwina, preżenti u biżżejjed serja".
Int intitolat li tingħata din id-deċiżjoni bil-miktub, fejn ikunu ddikjarati r-raġunijiet kollha, u li fiha jiġi speċifikat kif tista' tappella u ż-żmien li għandek biex tkun tista' tagħmel dan.
Aqra aktar dwar il-proċeduri ta' dħul tal-UEen