Dikjarazzjoni dwar in-nutrizzjoni

Skont il-liġi tal-UE, ikel ippakkjat minn qabel li jinbiegħ fl-UE għandu jkollu tikketta li tinforma lill-konsumaturi dwar il-kontenut tal-enerġija u n-nutrijenti tiegħu. Din tissejjaħ "dikjarazzjoni dwar in-nutrizzjoni" u trid tidher direttament fuq il-pakkett jew fuq it-tikketta mwaħħla miegħu. Id-dikjarazzjoni dwar in-nutrizzjoni għandha tinkludi din l-informazzjoni:

• il-valur enerġetiku
• l-ammonti ta' xaħam, saturati, karboidrati, zokkor, proteini u melħ

Fid-dikjarazzjoni dwar in-nutrizzjoni jistgħu jiġu indikati b'mod volontarju n-nutrijenti li ġejjin:

• il-monoinsaturati
• il-poliinsaturat
• il-polioli
• il-lamtu
• il-fibra alimentari
• kwalunkwe vitamina jew minerali permessi bil-liġi

L-ikel li MA JKUNX jeħtieġ dikjarazzjoni dwar in-nutrizzjoni hu elenkat fl-anness 5 tar-regolament.

Kif jiġu kkalkulati l-valuri tal-enerġija u l-ammonti ta' nutrijenti

Il-valuri fid-dikjarazzjoni dwar in-nutrizzjoni huma medji, ibbażati jew fuq l-analiżi tal-ikel mill-manifattur jew fuq kalkolu li juża wieħed minn dawn li ġejjin:

• il-valuri magħrufin jew medja attwali tal-ingredjenti użati
• id-data stabbilita b'mod ġenerali u aċċettata.

Il-valur enerġetiku u l-ammonti ta' nutrijenti fuq il-pakkett iridu jirriflettu l-valur u l-ammonti tal-ikel kif jinbiegħ. Jekk il-prodott jeħtieġ preparazzjoni qabel ma jiġi kkunsmat, tista' tipprovdi l-informazzjoni li tirrifletti l-valuri tan-nutrizzjoni tal-ikel bħala lest biex jittiekel.

Il-valur enerġetiku jrid ikun:

• ikkalkulat bl-użu tal-fatturi ta' konverżjoni pprovduti fl-anness 14 tar-regolament
• indikat f'kilo joules (kJ) u kilo kaloriji (kcal) għal kull 100 g jew għal kull 100 ml

L-ammonti tan-nutrijenti jridu jiġu indikati għal kull 100 g jew għal kull 100 ml.

F'xi każijiet, il-valuri tal-enerġija u l-ammonti ta' nutrijenti jistgħu jiġu espressi wkoll għal kull porzjon u/jew għal kull unità ta' konsum. Ara l- artikolu 33 tar-regolament .

Vitamini u minerali awtorizzati

L-ammonti tagħhom iridu jiġu espressi:

• għal kull 100 g jew għal kull 100 ml
• bħala perċentwal tal-konsum referenzjali

Il-vitamini u l-minerali awtorizzati fid-dikjarazzjoni dwar in-nutrizzjoni huma elenkati fl-anness 13 parti A.1 tar-regolament tal-UE.

Kif turi d-dikjarazzjoni dwar in-nutrizzjoni

Jekk jippermetti l-ispazju, għandek turi d-dikjarazzjoni dwar in-nutrizzjoni f'forma ta' tabella. Jekk il-pakkett ikun żgħir wisq, uri d-dikjarazzjoni f'format lineari. L-informazzjoni kollha trid tkun tidher faċilment, tinqara b'mod ċar u tinkiteb b'ittri twal mill-anqas 1.2 mm.