Reġistrazzjoni, permessi u liċenzji
Bħala ċittadin jew negozju tal-UE, għandek il-jedd:
- Tistabbilixxi u tiġġestixxi negozji fi kwalunkwe pajjiż tal-UE bl-istess kundizzjonijiet bħaċ-ċittadini lokali.
- Toħloq negozju ġdid jew sussidjarju ta’ negozju eżistenti bbażat f’pajjiż ieħor tal-UE.
Sabiex tagħmel dan se jkollok bżonn tifhem ir-rekwiżiti tar-reġistrazzjoni, tal-permessi u tal-liċenzjar involuti, filwaqt li żżomm f’moħħok li dawn spiss ikunu speċifiċi għall-pajjiż. Skont ir-regoli tal-UE, ġew stabbiliti l-Punti Uniċi ta’ Kuntatt (PSC) f’kull pajjiż tal-UE li jgħinu jħaffulek il-proċess.
Twissija
Minkejja li l-PSCs jiffokaw prinċipalment fuq il-kumpaniji li jipprovdu s-servizzi, dawn jistgħu jkunu utli wkoll għal tipi oħra ta’ kumpaniji. Barra minn hekk, xi PSCs jagħmlu parti mill-portali tal-gvern elettroniku li jaqdu l-kumpaniji kollha.Peress li kull pajjiż tal-UE jistabbilixxi r-regoli tiegħu stess, il-permessi u l-liċenzji jistgħu jvarjaw, skont it-tip ta’ negozju jew industrija. Il-permessi/liċenzji komuni jinkludu:
- Reġistrazzjoni tan-negozju: Reġistrazzjoni mal-qrati kummerċjali lokali jew mal-awtoritajiet kummerċjali lokali.
- Permessi speċifiċi skont is-settur: Skont is-settur, jista’ jkun hemm permessi addizzjonali (eż. il-kostruzzjoni: il-permessi tal-bini u l-konformità mal-liġijiet tal-ippjanar urban lokali).
- Liċenzji ambjentali: In-negozji li jkollhom impatt fuq l-ambjent jista’ jkollhom bżonn ta’ permessi speċjali.
- Konformità max-xogħol u mal-impjiegi: Is-sidien tan-negozji jridu jikkonformaw ukoll mal-liġijiet tax-xogħol lokali, mal-permessi tal-impjiegi, u mal-obbligi tas-sigurtà soċjali meta jwessgħu n-negozji tagħhom jew jimpjegaw.
Punt Uniku ta’ Kuntatt (PSCs)
Permezz tal-Punt Uniku ta’ Kuntatt (PSC) wieħed isibha eħfef jifhem u jissodisfa r-rekwiżiti lokali għal-liċenzjar, għall-permessi u għall-konformità. Il-PSCs huma portali online stabbiliti minn kull pajjiż tal-UE fejn tista’ tikseb l-informazzjoni u tlesti l-formalitajiet meħtieġa biex:
- Tistabbilixxi jew tkabbar negozju.
- Tikseb il-liċenzji, il-permessi, u l-approvazzjonijiet meħtieġa.
- Tifhem ir-regolamenti tan-negozju lokali u l-obbligi ta’ konformità.
Il-karatteristiċi ewlenin tal-PSCs jinkludu:
- Aċċessibbiltà: Il-PSCs huma disponibbli online, sabiex tkun tista’ taċċessahom b’mod remot, bil-lingwa tiegħek stess jew b’lingwi oħra mitkellma b’mod mifrux bħall-Ingliż.
- Proċessi simplifikati: Permezz tal-PSCs tista’ tressaq l-applikazzjonijiet għall-permessi, għal-liċenzji u għall-awtorizzazzjonijiet mingħajr ma jkollok għalfejn tmur fid-diversi aġenziji lokali.
- Ċentru ta’ informazzjoni: Tista’ ssib informazzjoni dettaljata dwar ir-rekwiżiti legali, bħar-regolamenti dwar ir-reġistrazzjoni, it-tassazzjoni, is-saħħa u s-sikurezza, u kwistjonijiet oħra ta’ konformità fil-pajjiż ospitanti.
- Komunikazzjoni elettronika: Bosta PSCs joffru trattament diġitali sħiħ tal-proċeduri amministrattivi.
Storja bħala eżempju
Il-PSC qiegħed hemm biex jgħinek
Sophia, konsulenta Spanjola tad-disinn intern, xtaqet iżżid is-servizzi tagħha fil-Ġermanja. Bl-użu tal-Punt Uniku ta’ Kuntatt (PSC), hija aċċessat portal online li ggwidaha fil-passi meħtieġa biex toffri s-servizzi ta’ disinn tagħha f’Berlin.
Permezz tal-PSC, Sophia rreġistrat in-negozju tagħha mal-awtoritajiet lokali u lestiet id-dokumentazzjoni biex tissodisfa l-kwalifiki professjonali u r-rekwiżiti tar-reġistrazzjoni tan-negozju. Kollox ġie ttrattat online, u fi żmien ftit ġimgħat, kienet kompletament awtorizzata biex toffri s-servizzi tagħha fil-Ġermanja.
Biex issib il-Punti Uniċi ta’ Kuntatt uża l-għodda tagħna għas-Sejbien tas-Servizzi tal-Assistenza.
Ġib l-aċċess għall-informazzjoni nazzjonali hawn taħt.