Responsabbiltà għall-prodott
Int responsabbli għad-difetti fil-prodotti tiegħek. Jekk jikkawżaw dannu lill-konsumaturi tiegħek: mewt, korriment personali jew ħsara materjali lill-oġġetti personali (aktar minn EUR 500), il-kumpanija tiegħek tista’ tinżamm responsabbli.
Kemm ikunu difettużi l-prodotti tiegħek jiġi ddeterminat skont kemm tkun nieqsa s-sikurezza li l-konsumaturi għandhom id-dritt jistennew, mhux skont kemm ikunu tajbin għall-użu.
Kun prudenti meta:
- timmanifattura prodott finali
- timmanifattura partijiet biex jiġu inkorporati fi prodott ieħor
- timporta fl-UE prodott maħsub biex jerġa’ jinbiegħ.
Jekk ikun hemm aktar minn negozju wieħed li jkun responsabbli għas-sikurezza tal-istess prodott, min ikun sofra d-dannu jista’ jtella’ l-qorti lil kwalunkwe wieħed minnhom.
Ir-regoli dwar ir-responsabbiltà japplikaw ukoll għall-prodotti tal-elettriku u agrikoli. Il-kuntratt tal-bejgħ tiegħek ma jistax ikun fih klawżoli li jnaqqsu mir-responsabbiltà tiegħek għal prodott difettuż.
Talbiet għal kumpens
Biex jitlob kumpens għad-dannu, min ikun sofra d-dannu jrid jagħti prova li:
- ikun seħħ dannu
- il-prodott tiegħek kien difettuż
- kien hemm rabta bejn id-difett u d-dannu.
Storja bħala eżempju
Talba għal kumpens fil-każ ta’ scooters difettużi
Zephir hija proprjetarja ta’ kumpannija li timmanifattura scooters elettriċi. Klijent wieħed indarab meta l-brejkijiet tal-iscooter ma ħadmux waqt li kien qiegħed jużah. Wara li ppreżenta talba għall-kumpens, il-klijent ta prova li seħħ il-korriment, li l-brejkijiet kienu difettużi, u li d-difett kien il-kawża diretta tal-inċident. Saret investigazzjoni li kkonfermat li d-difett kien jeżisti meta l-prodott tqiegħed fis-suq, u l-kumpanija Zephir inżammet responsabbli għall-kumpens.
Biex jitlob kumpens, min ikun ġarrab id-dannu għandu żmien 3 snin, li jibdew jgħoddu minn dakinhar li jsir jaf:
- bid-dannu;
- bid-difett;
- bl-identità tal-produttur.
Inti ma tibqax responsabbli għad-dannu kkawżat mill-prodott tiegħek kemm-il darba jkun ilu fis-suq għal 10 snin, sakemm xi ħadd ma jkunx talab kumpens mingħandek matul dak il-perjodu.
Każijiet meta m’intix responsabbli
M’intix responsabbli jekk tista’ turi li:
- ma kontx int li poġġejt il-prodott fis-suq
- ma kontx int li mmanifatturajt il-prodott għall-bejgħ
- id-difett li kkawża d-dannu ma kienx jeżisti meta l-prodott tqiegħed fis-suq
- id-difett irriżulta biss minħabba li l-prodott tiegħek kellu jissodisfa rekwiżiti tekniċi obbligatorji
- skont l-aħħar standards xjentifiċi u tekniċi, ħadd ma seta’ jbassar id-difett fil-mument meta poġġejt il-prodott fis-suq
- immanifatturajt biss element wieħed, u d-difett kien ikkaġunat mid-disinn tal-prodott finali.
Storja bħala eżempju
Prova ta’ nuqqas ta’ responsabbiltà: Meta difett ma jkunx tort tiegħek
Anaïs timmanifattura komponenti taċ-ċinturin tas-sikurezza. Wara inċident bil-karozza, is-sewwieq li weġġa’ afferma li ċ-ċinturin tas-sikurezza ma ħadimx kif suppost.
L-investigaturi sabu li d-difett kien ikkawżat mid-disinn tal-karozza, u mhux mill-komponent ta’ Anaïs. Hija tat prova li l-prodott tagħha ma kienx difettuż meta tqiegħed fis-suq, u d-difett irriżulta minn fatturi lil hinn mill-kontroll tagħha. B’riżultat ta’ dan, Anaïs ma nżammitx responsabbli.
Ikseb aċċess għall-informazzjoni nazzjonali hawn taħt.