Protezzjoni konsulari
Għajnuna liċ-ċittadini tal-UE barra l-UE
Jekk għandek bżonn assistenza konsulari barra minn pajjiżek, l-ewwel trid tikkuntattja lill-ambaxxata jew lill-konsolat lokali tal-pajjiż tal-UE tan-nazzjonalità tiegħek, jew lill-ministeru għall-affarijiet barranin tiegħek.
Jekk għandek bżonn l-assistenza f’pajjiż barra l-UE li l-pajjiż tal-UE tiegħek m’għandux ambaxxata jew konsolat fih, tista’ titlob l-assistenza lill-ambaxxata jew lill-konsolat ta’ kwalunkwe pajjiż ieħor tal-UE. Int intitolat tirċievi l-istess appoġġ bħaċ-ċittadini tal-pajjiż tal-UE li tikkuntattja lill-ambaxxata jew lill-konsolat tiegħu.
F’dan il-każ, trid tagħti prova tal-identità tiegħek (permezz ta’ passaport jew karta tal-identità). Jekk id-dokumenti tal-ivjaġġar tiegħek jintilfu jew jinsterqu, in-nazzjonalità tiegħek tkun trid tiġi ċċekkjata b’mezzi oħra (permezz ta’ verifika mal-awtoritajiet tal-pajjiż tal-UE tan-nazzjonalità tiegħek).
F’xi każijiet, il-pajjiż tal-UE tiegħek ikun ikkonkluda arranġament ma’ pajjiż speċifiku ieħor tal-UE biex jipprovdi assistenza konsulari. F’dan il-każ, jaf tintalab tikkuntattja lil dak il-pajjiż tal-UE sakemm is-sitwazzjoni ma tkunx teħtieġ assistenza urġenti.
Tipi ta’ assistenza
L-ambaxxata jew il-konsolat jistgħu jgħinuk jekk pereżempju, titlef id-dokument tal-ivjaġġar tiegħek, f’każ ta’ inċidenti serji jew mard, jekk tkun vittma ta’ reat jew jarrestawk, jew jekk ikollok bżonn ta’ ripatrijazzjoni f’każ ta’ emerġenza.
Jekk titlef id-dokumenti tal-ivjaġġar tiegħek, jinħariġlek Dokument provviżorju tal-ivjaġġar tal-UE en li bih tkun tista’ tmur lura pajjiżek.
Il-persunal tal-ambaxxata jew tal-konsolat jista’ jipprovdi wkoll appoġġ u jgħin jekk imut xi ħadd mill-maħbubin tiegħek (reġistrazzjoni, jinforma lill-qraba, ripatrijazzjoni tal-fdalijiet).
Kun af li l-ambaxxati u l-konsolati għandhom limitu ta’ x’jistgħu jagħmlu għalik, b’mod partikolari f’sitwazzjonijiet ta’ kriżi.
Qabel tivvjaġġa
Qabel tivvjaġġa, iċċekkja jekk il-pajjiż tal-UE tiegħek għandux ambaxxata jew konsolat fil-pajjiż mhux tal-UE fejn se tivjaġġa. Jekk pajjiżek mhux rappreżentat, iċċekkja d-dettalji tal-ambaxxati u l-konsolati ta’ pajjiżi oħra tal-UE en u żomm din l-informazzjoni lesta f’każ li jkollok bżonnha.
Trid ukoll tiċċekkja r-rekwiżiti tad-dħul (pereżempju, il-validità tal-passaport, il-viża) u kwalunkwe restrizzjoni oħra li tista’ tapplika fil-pajjiż li qed tivvjaġġa fih kif ukoll kwalunkwe kundizzjoni meta terġa’ lura pajjiżek. Fl-aħħar nett, ara li tiċċekkja l-aktar pariri riċenti en tal-pajjiż tal-UE tiegħek (mogħtijin mill-awtoritajiet nazzjonali) għall-ivjaġġar fid-destinazzjoni tiegħek, u rreġistra l-vjaġġ tiegħek mal-pajjiż tal-UE tiegħek jekk dan jipprovdi pjattaforma biex tagħmel dan.
Ara wkoll:
Skeda informattiva dwar il-protezzjoni konsulari en
Protezzjoni konsulari – Il-Kummissjoni Ewropea
Protezzjoni konsulari – EEAS en