Ir-regoli tal-kompetizzjoni fl-UE
L-UE għandha regoli stretti li jipproteġu l-kompetizzjoni ħielsa. Skont dawn ir-regoli, ċerti prattiki huma pprojbiti.
Jekk tikser ir-regoli tal-kompetizzjoni tal-UE, tista' tispiċċa mmultat sa 10% tal-fatturat globali annwali tiegħek. F'xi pajjiżi tal-UE, maniġers individwali ta' impriżi li jiksru r-regoli jistgħu jiffaċċjaw penali serji, inkluż il-ħabs.
Ir-regoli tal-kompetizzjoni tal-UE japplikaw direttament fil-pajjiżi kollha tal-UE - il-qrati f'pajjiżek se jimxu magħhom. Dawn ir-regoli japplikaw mhux biss għan-negozji iżda għall-organizzazzjonijiet kollha involuti f'attività ekonomika (bħall-assoċjazzjonijiet tan-negozju, ir-raggruppamenti industrijali, eċċ).
Tista' taqra dwar xi eżempji ta' każijiet tal-kompetizzjoni tal-UE fil-Portal tad-DĠ Kompetizzjoni.
Kuntatti u ftehimiet illegali
Dawn il-ftehimiet huma magħrufa bħala kartelli. Huma projbiti minħabba li jirrestrinġu l-kompetizzjoni. Dawn jistgħu jieħdu bosta suriet, u m'hemmx għalfejn ikunu approvati uffiċjalment mill-kumpaniji involuti. L-aktar eżempji komuni ta' dawn il-prattiki huma:
- L-iffissar tal-prezzijiet
- Il-qsim tas-suq
- Ftehim dwar l-allokazzjoni tal-konsumaturi
- Ftehim dwar il-limitazzjoni tal-produzzjoni
- Il- ftehimiet ta' distribuzzjoni bejn il-fornituri u l-bejjiegħa fejn, pereżempju, il-prezz mitlub lill-konsumaturi huwa impost mill-fornitur.
Il-ftehimiet kollha u l-iskambji ta' informazzjoni bejnek u l-kompetituri tiegħek li jnaqqsu l-inċertezza strateġika fis-suq tiegħek (dwar l-ispejjeż tal-produzzjoni tiegħek, il-fatturat, il-kapaċità, il-pjanijiet ta' kummerċjalizzazzjoni, eċċ.) jistgħu jitqiesu bħala antikompetittivi.
Twissija
Anki l-iżvelar ta' din it-tip ta' informazzjoni strateġika b'mod unilaterali permezz tal-posta elettronika, it-telefown jew laqgħat jista' jitqies bħala ksur ta' din ir-regola.
Biex tkun fiż-żgur:
- Tiffissax il-prezzijiet jew kundizzjonijiet kummerċjali oħrajn
- Tillimitax il-produzzjoni
- Taqsamx is-swieq
- Tiskambjax informazzjoni strateġika dwar il-kumpanija tiegħek
Xi ftehimiet mhumiex ipprojbiti - jekk ikunu jistgħu jiġu ġġustifikati bħala ta' benefiċċju għall-konsumatur u l-ekonomija b'mod ġenerali. Eżempju ta' dan huwa ftehim dwar ir-riċerka u l-iżvilupp u t-trasferiment tat-teknoloġija. Dawn il-każijiet huma koperti bir- Regolamenti dwar l-Eżenzjoni ta' Kategorija en .
Abbuż minn pożizzjoni dominanti
Jekk il-kumpanija tiegħek għandha sehem kbir fis-suq, għandha pożizzjoni dominanti u għandek toqgħod attent li:
- ma tiċċarġjax prezzijiet għoljin iżżejjed li jistgħu jisfruttaw il-konsumaturi
- ma tiċċarġjax prezzijiet baxxi li ma jirrappreżentawx ir-realtà li jistgħu jitfgħu lill-kompetituri barra mis-suq
- ma tiddiskriminax bejn il-konsumaturi
- ma tinfurzax ċerti kundizzjonijiet ta' kummerċ lin-negozji sieħba miegħek.