Il-bilanċ bejn il-ġeneri fil-bordijiet tal-kumpaniji

Jekk il-kumpanija tiegħek għandha aktar minn 250 impjegat, fatturat annwali ta’ aktar minn €50 miljun, jew total tal-karta tal-bilanċi ta’ ’l fuq minn €43 miljun, għandek tapplika r-regoli tal-UE dwar il-bilanċ bejn il-ġeneri fil-bord tad-diretturi tiegħek.

Ir-rekwiżiti għall-bilanċ bejn il-ġeneri

Mit-30 ta’ Ġunju 2026 ’il quddiem, kumpaniji kbar elenkati tal-UE jridu jiżguraw li kemm in-nisa kif ukoll l-irġiel ikollhom mill-inqas 40% tal-pożizzjonijiet mhux eżekuttivi fil-bordijiet (jew 33% fost il-pożizzjonijiet kollha tal-bordijiet).

Jekk dawn il-miri ma jintlaħqux, iridu jiġu applikati proċeduri tal-għażla ġusti u trasparenti bl-użu ta’ kriterji ċari u newtrali għall-ġeneru. Il-mertu jibqa’ l-fattur ewlieni, u l-ġeneru jrid jiġi kkunsidrat biss jekk żewġ kandidati jkunu kkwalifikati ndaqs. Fil-każ tal-membri tal-bordijiet eżekuttivi, trid tidħol għal impenji individwali biex ittejjeb il-bilanċ bejn il-ġeneri, iżda ma tapplika l-ebda kwota speċifika.

Il-konformità u r-rapportar

Jekk ma tilħaqx il-miri, trid tispjega għaliex u tiddeskrivi l-miżuri li se tieħu biex il-qagħda titjieb. L-awtoritajiet nazzjonali se jinfurzaw il-konformità permezz ta’ penali li jistgħu jinkludu multi jew annullament tal-ħatra tad-direttur ikkontestat.

L-awtoritajiet nazzjonali huma obbligati jippubblikaw informazzjoni dwar il-kumpaniji li jkunu qed jilħqu l-miri, u dan iservi ta’ pressjoni bejn il-pari li tikkomplementa l-infurzar.