Ir-reġistrazzjoni tas-sustanzi kimiċi fl-UE (ir-regolament REACH)
Jekk timmanifattura jew timporta tunnellata jew aktar fis-sena ta' sustanza kimika fiż-ŻEE, jeħtieġlek tirrekordja dan fil-bażi tad-data ta' REACH. REACH ifisser ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta' Sustanzi Kimiċi.
REACH japplika għas-sustanzi kimiċi kollha, kemm dawk meħtieġa għal proċessi industrijali kif ukoll dawk li nużaw matul il-ġurnata ta' kuljum tagħna, fiż-żebgħa, fil-prodotti tat-tindif, fil-ħwejjeġ, fl-għamara u l-appliances tal-elettriku, pereżempju. B'hekk hu jaffettwa l-parti l-kbira tan-negozji fiż-Żona Ekonomika Ewropea (ŻEE).
Is-sustanzi mhux reġistrati ma għandhomx jiġu kkummerċjalizzati jew użati.
REACH japplika għalik jekk fin-negozju tiegħek int:
- manifattur - tagħmel sustanzi kimiċi għall-bejgħ mill-kumpanija tiegħek jew tissupplixxi lill-oħrajn.
- importatur - tixtri sustanzi kimiċi individwali, taħlitiet ta' sustanzi kimiċi jew prodotti bħal ħwejjeġ, għamara jew oġġetti tal-plastik minn barra l-UE.
- distributur - taħżen u tikkummerċjalizza sustanzi kimiċi jew taħlitiet ta' sustanzi kimiċi.
- utent lil hinn mis-sors - tuża sustanzi kimiċi jew taħlitiet ta' sustanzi kimiċi fl-industrija jew l-okkupazzjoni tiegħek.
Biex tikkonforma mar-regolament, għandek tidentifika u tikkontrolla r-riskji assoċjati mas-sustanzi li timmanifattura u tikkummerċjalizza fl-UE/fiż-ŻEE.
Bħala manifattur jew importatur li tirreġistra dawn is-sustanzi, jeħtieġlek turi lill-Aġenzija Ewropea għas-Sustanzi Kimiċi (ECHA) kif dawn jistgħu jintużaw b'mod sikur u tuża folja ta' data dwar is-sikurezza biex tinforma l-utenti potenzjali fil-katina tal-provvista dwar kwalunkwe miżura ta' mmaniġġjar tar-riskju li għandu mnejn ikun jeħtiġilhom jieħdu.
Jekk in-negozju tiegħek hu ta' utent lil hinn mis-sors, għandek obbligi differenti x'tissodisfa. Dak ewlieni hu li tieħu kwalunkwe miżura ta' mmaniġġjar tar-riskju ddettaljata fil-folji ta' data dwar is-sikurezza. Iċċekkja li l-użi tiegħek huma koperti fid-dossiers ta' reġistrazzjoni u kkuntattja lill-fornituri u l-utenti tiegħek fil-katina tal-provvista.
Ibbrawżja t-taqsima ta’ appoġġ għall-SMEs dwar l-ECHA biex titgħallem dwar il-kwistjonijiet rilevanti għan-negozji ż-żgħar.
Kif jaħdem REACH
REACH introduċa regoli ġodda għall-kummerċjalizzazzjoni, li jkopru s-sustanzi f'iżolament, f'taħlitiet u f'sustanzi użati fl-oġġetti. Hu jiżgura li l-industrija tassumi r-responsabbiltà:
- għall-immaniġġjar ta' kwalunkwe riskju li s-sustanzi kimiċi jistgħu jippreżentaw għas-saħħa u għall-ambjent
- li tipprovdi lill-utenti fil-katina tal-provvista b'informazzjoni adatta dwar is-sikurezza.
Hu jagħmilha possibbli għall-Unjoni Ewropea biex tieħu miżuri addizzjonali jekk azzjoni komplementari hi meħtieġa fil-livell tal-UE. L-Aġenzija Ewropea għas-Sustanzi Kimiċi (ECHA) tgħin sabiex jiġu kkoordinati u implimentati l-passi kollha neċessarji:
- Ir-reġistrazzjoni hi obbligatorja fejn kumpanija beħsiebha timmanifattura jew timporta tunnellata jew aktar fis-sena ta' sustanza partikulari.
- Bħala parti mill-evalwazzjoni, l-Aġenzija Ewropea għas-Sustanzi Kimiċi (ECHA) teżamina l-informazzjoni fid-dossiers ta' reġistrazzjoni u l-proposti kollha ta' ttestjar biex ikun evitat ittestjar mhux neċessarju, b'mod speċjali fuq l-annimali. L-awtoritajiet nazzjonali jivvalutaw is-sustanzi fid-dawl ta' preokkupazzjonijiet speċifiċi dwar is-saħħa umana u l-ambjent.
- Meħtieġa awtorizzazzjoni għal ċerti sustanzi li joħolqu preokkupazzjonijiet partikulari, biex jiġi żgurat li kwalunkwe riskju li jippreżentaw hu kkontrollat kif xieraq, u sustanzi ta' din ix-xorta huma gradwalment sostitwiti b'alternattivi meta dawn huma ekonomikament u teknikament vijabbli.
- Ir-restrizzjoni tista' tillimita jew tipprojbixxi l-produzzjoni, il-kummerċjalizzazzjoni jew l-użu ta' ċerti sustanzi jekk dawn jippreżentaw riskju inaċċettabbli għas-saħħa jew l-ambjent.
Tariffi u imposti
REACH jitlob tariffi u imposti li għandhom jitħallsu. L-ammonti mitlubin u l-limiti taż-żmien għall-ħlas jiddependu mit-tip ta' sottomissjoni kkonċernata. Intraprizi żgħar u ta' daqs medju jħallsu tariffi mnaqqsin. In-negozju tiegħek jeħtieġlu wkoll jikkunsidra spejjeż oħrajn assoċjati ma' REACH, inklużi:
- l-iskambjar tad-data
- il-valutazzjonijiet tas-sikurezza kimika
- ir-riċerka dwar sostituti għal sustanzi partikolari
Tista' tnaqqas l-ispejjeż tiegħek b'mod sinifikanti permezz ta' kooperazzjoni mill-qrib mal-partijiet l-oħrajn involuti, inkluża l-preparazzjoni fiż-żmien xieraq.
Ara wkoll: