L-Ekotikketta tal-UE
L-Ekotikketta tal-UE tgħin lill-konsumaturi, lill-bejjiegħa bl-imnut, u lin-negozji jagħmlu għażliet sostenibbli. Madwar 100,000 prodott u servizz madwar l-UE diġà għandhom l-Ekotikketta tal-UE, li jfisser li jikkonformaw ma’ kriterji ekoloġiċi rigorużi u jħallu inqas impatt fuq l-ambjent.
Il-kriterji tal-Ekotikketta tal-UE huma ddefiniti għal firxa wiesgħa ta’ gruppi ta’ prodotti. Ara jekk il-prodott jew is-servizz tiegħek huwiex eliġibbli en .
Il-benefiċċji
L-Ekotikketta tal-UE toffri benefiċċji ċari lin-negozji:
- Tirbaħ il-fiduċja: L-Ekotikketta tal-UE hija ċertifikazzjoni affidabbli u vverifikata minn parti terza.
- Turi impenn: Agħti prova li l-prodott tiegħek jissodisfa standards ambjentali stretti.
- Tgawdi minn opportunitajiet għan-negozji u tiffranka l-ispejjeż: L-Ekotikketta tal-UE, li hija rrikonoxxuta fil-pajjiżi kollha tal-UE, toħloq opportunitajiet filwaqt li tippromwovi l-effiċjenza fl-użu tar-riżorsi.
- Issaħħaħ ir-reputazzjoni tiegħek: Uri d-dedikazzjoni tiegħek favur is-sostenibbiltà.
Storja bħala eżempju
Azzjoni favur is-sostenibbiltà: negozju żgħir u l-Ekotikketta tal-UE
Carlos għandu negozju żgħir tas-sapun fi Spanja u jixtieq li n-nies isiru jafu bil-prattiki tiegħu favur l-ambjent. Huwa jiskopri l-Ekotikketta tal-UE u jiddeċiedi li japplika. L-ewwel nett, jivverifika jekk is-sapun tiegħu jissodisfax il-kriterji u jikkuntattja lill-entità li għandha l-kompetenza tal-Ekotikketta tal-UE f’pajjiżu biex jibda l-proċess tal-applikazzjoni.
Jipprovdi informazzjoni dettaljata dwar il-prodotti tiegħu u jittestjahom f’laboratorju ċċertifikat biex jagħti prova tal-konformità mal-istandards stretti tal-Ekotikketta tal-UE. Wara li l-applikazzjoni tiegħu tiġi studjata u approvata, Carlos jiffirma ftehim tal-liċenzja. Bl-Ekotikketta tal-UE fuq l-imballaġġ tiegħu, huwa jinnota li l-fiduċja tal-klijenti u l-bejgħ jiżdiedu, u b’hekk isaħħaħ ir-reputazzjoni tal-marka tiegħu bħala waħda favur is-sostenibbiltà.
Kif tapplika?
Hemm proċess tal-applikazzjoni li fih 7 stadji en . It-tikketta tingħata mill-organizzazzjoni nazzjonali rilevanti en (l-entità kompetenti) li tipproċessa l-applikazzjoni tiegħek.
It-tariffi
It-tariffi jvarjaw skont il-pajjiż tal-UE fejn tiġi sottomessa l-applikazzjoni u skont id-daqs tan-negozju tiegħek. Trid tiċċekkja t-tariffi speċifiċi li japplikaw f’pajjiżek en , iżda dan huwa x’tista’ tistenna b’mod ġenerali:
Tariffa ta’ darba mal-applikazzjoni
- €200 – €350 għall-mikrointrapriżi;
- €200 – €600 għall-SMEs u għal kumpaniji minn pajjiżi li qed jiżviluppaw;
- €200 – €2,000 għall-kumpaniji l-oħrajn kollha.
Tariffa annwali
Tista’ tħallas rata fissa:
- €18,750 għall-mikrointrapriżi, l-SMEs, u kumpaniji minn pajjiżi li qed jiżviluppaw.
- €25,000 għall-kumpaniji l-oħrajn kollha.
Inkella, tista’ tagħżel li tħallas perċentwal tal-bejgħ:
- 0.15% tal-valur tal-bejgħ annwali tal-prodott iċċertifikat fl-UE (għall-kategoriji kollha tal-kumpaniji).
Twissija
It-tariffa annwali għandha limitu massimu. Dan ifisser li r-rata fissa (€18,750 jew €25,000) tirrappreżenta t-tariffa annwali massima. Jekk 0.15% tal-bejgħ tiegħek ikun inqas minn dan l-ammont b’rata fissa, tħallas it-tariffa aktar baxxa bbażata fuq il-perċentwali. Jekk ikun ogħla, tħallas biss ir-rata fissa.Skontijiet
- Tnaqqis ta’ 25% għall-SMEs, għall-mikrointrapriżi, u għal kumpaniji minn pajjiżi li qed jiżviluppaw.
- Tnaqqis ta’ 30% għall-kumpaniji rreġistrati fl-EMAS (l-Iskema ta’ Ġestjoni u Verifika Ambjentali).
- Tnaqqis ta’ 15% għall-kumpaniji ċċertifikati skont l-ISO 14001.
Twissija
L-iskontijiet tal-EMAS u tal-ISO mhumiex kumulattivi — japplika biss l-ogħla skont.Storja bħala eżempju
L-applikazzjoni tal-iskont ta’ 25%
Liam huwa s-sid ta’ kumpanija żgħira tal-kożmetiċi u jrid jiċċertifika x-xampujiet ekoloġiċi tiegħu. Wara li applika u ġie approvat, huwa jikkalkula t-tariffa annwali tiegħu abbażi ta’ 0.15% taż-€2 miljun bejgħ li jagħmel fl-UE, u b’hekk tiġi €3,000. Madankollu, bħala SME, Liam jikkwalifika għall-iskont ta’ 25%, u b’hekk it-tariffa tiegħu tinżel għal €2,250. Il-flus li jiffranka jagħmluha aktar faċli għal Liam biex jinvesti f’aktar titjib favur is-sostenibbiltà, xi ħaġa li l-klijenti tiegħu jagħtuha valur.
Storja bħala eżempju
Biex tikseb tnaqqis tal-EMAS
Sofia tmexxi kumpanija tal-manifattura tat-tessuti li reċentement kisbet ir-reġistrazzjoni tal-EMAS għall-prattiki ta’ ġestjoni ambjentali eċċezzjonali tagħha. Meta tapplika għall-Ekotikketta tal-UE għall-purtieri sostenibbli tagħha, issir taf li l-iskont ta’ 30% li tibbenefika minnu minħabba li hi rreġistrata mal-EMAS japplika kemm għall-ħlasijiet tal-applikazzjoni kif ukoll għal dawk annwali.
Għat-tariffa tal-applikazzjoni tagħha, li normalment hija €2,000, hija tħallas biss €1,400. Bl-istess mod, għat-tariffa annwali bbażata fuq 0.15% tal-bejgħ tal-prodotti tagħha (€10,000), l-iskont iniżżlilha l-ħlas għal €7,000. Il-flus li tiffranka jippermettu lil Sofia tinvesti mill-ġdid fl-isforzi tagħha favur is-sostenibbiltà, filwaqt li ċ-ċertifikazzjoni doppja tagħti spinta lir-reputazzjoni tal-marka tagħha fost dawk ix-xerrejja li huma impenjati biex jipproteġu l-ambjent.
Tariffi tal-ispezzjonijiet
Jista’ jkollok tħallas ukoll tariffi għall-ispezzjonijiet, li jkopru l-ittestjar fil-laboratorju, l-awditi, jew kontrolli oħrajn imwettqin minn partijiet terzi biex tiġi żgurata l-konformità mal-kriterji tal-ekotikketta. Dawn it-tariffi trid tħallashom direttament lill-fornituri tas-servizzi li jwettqu l-ispezzjonijiet. L-ammont speċifiku jiddependi fuq il-kategorija tal-prodott u fuq il-kumplessità tal-ittestjar li jkun meħtieġ.
Ikseb aċċess għal informazzjoni fuq bażi nazzjonali minn hawn taħt.