It-tikketta tal-enerġija

It-tikketti tal-enerġija huma klassifikazzjonijiet ċari u li jinftiehmu faċilment, bl-użu ta’ lwien differenti, ibbażati fuq l-effiċjenza enerġetika tal-prodotti. Minbarra l-effiċjenza enerġetika tal-prodott, it-tikketti tal-enerġija jippermettu lill-konsumaturi jagħmlu għażliet infurmati billi jipprovdu informazzjoni, bħal kemm jagħmel ħoss, kemm jaħli ilma, kemm jirreżisti l-waqgħat jew l-ilma, kemm hu faċli biex jissewwa, u kemm isservi l-batterija.

Bħala manifattur, importatur, jew rivenditur, għandek tkun taf li r-regoli dwar it-tikketta tal-enerġija tal-UE japplikaw għall-apparat elettrodomestiku (eż. magni tal-ħasil tal-platti, televixins, bozoz tad-dawl, eċċ.) u prodotti bejn negozju u ieħor (eż. ħiters tal-ilma, kundizzjonaturi tal-arja, bojlers, eċċ.). Ir-regoli la japplikaw għall-prodotti użati u lanqas għall-mezzi tat-trasport tal-merkanzija u tal-persuni.

Is-sistema tal-klassifikazzjoni tat-tikketti

It-tikketti tal-enerġija jikklassifikaw l-apparat mill-klassi A (lewn aħdar skur), li jirrappreżenta l-aktar prodotti enerġetikament effiċjenti, sal-klassi G (lewn aħmar), li huma l-inqas effiċjenti.

Mill-2021 ’l hawn, l-iskala ssimplifikata minn A sa G (li ma baqgħetx tuża s-sinjal “+”) tapplika għal dawn il-kategoriji ta’ prodotti:

• Friġġijiet għal użu domestiku/fil-lukandi
• Friġġijiet għal użu kummerċjali
• Magni tal-ħasil tal-platti
• Magni tal-ħasil tal-ħwejjeġ
• Televixins, moniters tal-kompjuter, u unitajiet tal-wiri tas-sinjalar
• Bozoz tad-dawl u lampi

Sir af aktar dwar kif taħdem il-klassifikazzjoni tat-tikketti tal-enerġija.

Il-prodotti li jeħtieġu t-tikketti

It-tikketta tal-enerġija trid tkun tidher b’mod ċar fuq kull prodott fil-punt tal-bejgħ, inkluż fil-ħwienet online.

Aktar informazzjoni dwar ir-rekwiżiti tat-tikkettar tal-enerġija u tal-ekodisinn għal prodotti individwali.

L-obbligi tal-manifatturi u tar-rivendituri

Jekk timmanifattura jew timporta prodotti, jew tirrappreżenta manifattur mhux tal-UE, qabel tbigħ il-prodotti tiegħek fl-UE trid tirreġistrahom fil-bażi tad-data tal-EPREL. Imxi ma’ dawn il-passi:

Irreġistra l-kumpanija tiegħek

• Oħloq kont tal-EPREL u agħmel il-proċess tal-verifika bl-użu ta’ sistema tal-identità diġitali (eż. siġilli/firem elettroniċi tal-eIDAS). Dan jirrikjedi li jkollok kont tal-EU Login. Il-kont tal-EU Login jipprovdi wkoll aċċess għal-linji gwida tal-EPREL għal informazzjoni dwar il-proċess tar-reġistrazzjoni.

Irreġistra l-prodotti tiegħek

• Żid kull mudell mal-EPREL qabel ma tbigħ l-ewwel unità fl-UE.
• L-EPREL jiġġenera t-tikketta tal-enerġija (b’kodiċi QR jekk il-prodott jaqa’ taħt ir-regolamenti mill-2019 ’il quddiem).
• Waħħal it-tikketta tal-enerġija mal-prodotti jew mal-imballaġġ tagħhom (skont il-kategorija tal-prodott, eż. tajers, displays).
• Agħti n-numru tar-reġistrazzjoni tal-EPREL lin-negozjanti/lid-distributuri (eż. fl-offerti jew fil-fatturi) sabiex ikunu jistgħu jaċċessaw it-tikketta u l-iskeda tal-informazzjoni dwar il-prodott. Jeżistu għodod li jissimplifikaw dan il-proċess.

Ipprovdi l-informazzjoni mitluba

• Il-parametri ewlenin għall-ġenerazzjoni tat-tikketta tal-enerġija u tal-iskeda informattiva dwar il-prodott.
• Id-dokumentazzjoni teknika għall-kontrolli tal-konformità min-naħa tal-awtoritajiet.

Għal aktar informazzjoni, agħti ħarsa ġenerali lejn il-qafas regolatorju u lejn l-għodod addizzjonali għat-tikkettar tal-enerġija.

Bejgħ online jew bejgħ mill-bogħod ieħor

Għall-bejgħ online jew mill-bogħod, l-informazzjoni dwar it-tikketti tal-enerġija trid tkun tidher b’mod ċar qrib il-prezz. Tista’ tpoġġi t-tikketta tal-enerġija sħiħa jew inkella sempliċiment il-vleġġa tal-klassi tal-enerġija b’link għat-tikketta u għall-iskeda tal-informazzjoni dwar il-prodott. Tista’ ttella’ t-tikketta u l-iskeda lokalment, jew tagħti l-link għar-reġistrazzjoni tal-prodott fl-EPREL.

Żomm ruħek aġġornat

Meta t-teknoloġiji jevolvu, l-istess jagħmlu r-regoli. Ir-rekwiżiti li jistgħu jinbidlu jinkludu l-informazzjoni dwar il-prodott li għandek tagħmel disponibbli, l-indikaturi użati biex tikklassifika prodott, u fejn iridu jitqiegħdu t-tikketti. Għandek iżżomm għajnejk fuq:

• Il-portal tal-prodotti effiċjenti fl-użu tal-enerġija
• L-istandards tal-UE għall-ekodisinn u għat-tikkettar tal-enerġija

Ikseb aċċess għall-informazzjoni nazzjonali hawn taħt.