Immarkar CE

Ħafna prodotti jeħtieġu l-markatura CE qabel ma jkunu jistgħu jinbiegħu fl-UE. B’din il-markatura, il-manifattur jindika li prodott ikun jissodisfa r-rekwiżiti stabbiliti fir-regoli tal-UE dwar il-prodotti. Dan jippermetti li l-prodott jiġi ċċirkulat u kkummerċjalizzat liberament fl-UE irrispettivament minn fejn ikun ġie mmanifatturat.

Il-markatura CE meta hi obbligatorja?

Il-markatura CE hija meħtieġa biss għall-prodotti koperti minn regoli armonizzati tal-UE li jesiġuha speċifikament. Jekk ma jeżistux rekwiżiti tal-UE bħal dawn fil-każ tal-prodott tiegħek, il-markatura CE m’għandhiex tintuża.

Din hija lista mhux eżawrjenti ta’ prodotti li huma inklużi fil-liġijiet tal-UE dwar il-markatura CE:

• Ġugarelli, droni, tagħmir elettriku u elettroniku, prodotti pirotekniċi, opri tal-baħar rikreattivi, u inġenji tal-ilma
• Xi tipi ta’ apparat ta’ pressjoni, apparat tal-gass, batteriji, u makkinarju
• Tagħmir għall-użin u l-kejl
• Tagħmir protettiv personali
• Apparati mediċi, inkluż tagħmir dijanjostiku.

Għal informazzjoni aktar dettaljata, ara din il-lista sħiħa tal-leġiżlazzjoni tal-UE li tkopri l-kategoriji tal-prodotti soġġetti għar-rekwiżiti tal-markatura CE en.

Xi prodotti jistgħu jkunu soġġetti għal diversi rekwiżiti tal-UE fl-istess ħin. F’dawn il-każijiet, trid tiżgura konformità sħiħa mar-rekwiżiti rilevanti kollha qabel ma twaħħal il-markatura CE.

Min hu responsabbli għall-markatura CE?

Il-manifattur huwa responsabbli biex jiżgura li prodott ikun jissodisfa r-rekwiżiti applikabbli kollha tal-UE u biex iwaħħal il-markatura CE.

Titqies bħala l-manifattur jekk tagħmel prodott inti stess, jew jekk jagħmluh għalik u tbigħu taħt ismek jew bil-marka tiegħek. Bħala l-manifattur, inti responsabbli għall-konformità tal-prodott kollu, inklużi kwalunkwe komponent jew sistema fornuti minn oħrajn.

Sir af aktar dwar l-obbligi tal-manifattur skont ir-regoli tal-UE dwar il-prodotti. Jekk ma tkunx il-manifattur, hemm rwoli oħrajn li jistgħu jkollhom marbutin magħhom responsabbiltajiet speċifiċi, bħal dawk tal-importaturi u tar-rappreżentanti awtorizzati.

Kif tikseb il-markatura CE

M’hemm l-ebda korp ċentrali tal-UE li jagħtik permess jew ċertifikat li jippermettilek tuża l-markatura CE. Madankollu, qabel ma tkun tista’ twaħħal il-markatura CE mal-prodotti tiegħek, trid:

• tidentifika r-rekwiżiti rilevanti kollha tal-prodotti madwar l-UE
• tiddeċiedi jekk tistax tivvaluta l-konformità tal-prodott tiegħek waħdek jew jekk tridx tinvolvi korp notifikat
• tiġbor evidenza biex turi li l-prodott tiegħek jikkonforma mar-regoli: sir af dwar id-dokumentazzjoni teknika
• tabbozza u tiffirma dikjarazzjoni ta’ konformità tal-UE

Ladarba l-prodott tiegħek ikollu l-markatura CE, tkun tista’ tqiegħdu fis-suq tal-UE u l-awtorità nazzjonali kompetenti tkun tista’ twettaq il-kontrolli tal-konformità. Trid tipprovdi lill-awtorità kompetenti bl-informazzjoni u d-dokumentazzjoni teknika ta’ sostenn kollha dwar il-konformità tal-prodott jekk tintalab tagħmel dan.

Għandek bżonn ta’ valutazzjoni indipendenti?

Trid tiċċekkja jekk il-prodott tiegħek ikollux bżonn jiġi vvalutat minn korp notifikat. Korp notifikat huwa organizzazzjoni indipendenti awtorizzata minn pajjiż tal-UE biex tivvaluta l-konformità tal-prodotti meta dan ikun rikjest mil-leġiżlazzjoni. Jintuża għall-valutazzjoni tal-konformità minn parti terza — tipikament għal prodotti b’riskju ogħla bħall-apparat mediku, il-prodotti tal-kostruzzjoni, jew il-makkinarju.

Biex issir taf jekk għandekx bżonn waħda, iċċekkja l-proċedura tal-valutazzjoni tal-konformitàfil-liġijiet applikabbli tal-UE en:

• Jekk il-liġi tippermetti awtovalutazzjoni, tista’ tevalwa l-prodott tiegħek mingħajr ma tinvolvi korp tal-valutazzjoni tal-konformità.
• Jekk il-liġi titlob l-ittestjar minn parti terza, trid tinvolvi korp notifikat.

Jekk ikun meħtieġ, fittex għal korpi notifikati fil-bażi tad-data NANDO en:

• fittex skont il-kategorija tal-prodott jew skont il-leġiżlazzjoni
• kun ċert li l-korp notifikat li tagħżel ikun awtorizzat biex iwettaq il-proċedura speċifika tal-valutazzjoni tal-konformità meħtieġa għall-prodott tiegħek skont il-liġi tal-UE

Jekk jintuża korp notifikat, in-numru tal-ID b’erba’ ċifri tiegħu jrid jidher ħdejn il-markatura CE.

Trid tħallas xi tariffi?

Trid tħallas l-ispejjeż tal-valutazzjoni tal-konformità, iżda m’hemmx tariffa għat-twaħħil tal-markatura CE. L-ispejjeż jiddependu fuq il-kumplessità tal-prodott u fuq il-proċedura tal-valutazzjoni applikabbli.

Kif twaħħal il-markatura CE?

Il-markatura trid tkun tidher, tista’ tinqara, u ma titħassarx. Trid tikkonforma wkoll mar-rekwiżiti tad-disinn u tat-tqegħid.

Niżżel il-fajl tal-immaġni uffiċjali tal-markatura CE minn hawnhekk en.

Il-markatura CE għandha perjodu ta’ validità?

Il-markatura CE tirreferi għall-konformità tal-prodott fil-mument meta jkun tqiegħed fis-suq tal-UE. Bit-twaħħil tal-markatura CE inti tiddikjara li l-prodott tiegħek kien konformi mar-regoli rilevanti tal-UE dwar il-prodotti f’dak il-mument. Madankollu, id-Dikjarazzjoni tal-Konformità (DoC)tal-UE u d-dokumentazzjoni teknika li tappoġġjaha jridu

• jinżammu aġġornati
• jinżammu għal mill-inqas 10 snin wara li l-prodott ikun tqiegħed fis-suq

Jekk ikunu saru xi bidliet, bħal fil-leġiżlazzjoni applikabbli, fil-prodott innifsu, jew fid-dettalji tal-kuntatt tal-manifattur jew tar-rappreżentant awtorizzat — id-DoC trid tiġi rieżaminata u aġġornata kif xieraq. Jekk jintalab minn awtorità nazzjonali kompetenti, il-manifattur irid ikun kapaċi jipprovdi d-DoC u d-dokumentazzjoni kollha ta’ appoġġ tal-konformità.