L-identifikazzjoni tar-rekwiżiti tal-prodotti

Fil-każ ta’ numru ta’ kategoriji ta’ prodotti jeżistu standards u speċifikazzjonijiet tekniċi li jgħoddu għall-UE kollha. Qabel ma tikkummerċjalizza l-prodotti tiegħek b’mod ħieles fl-UE trid tiżgura li jkunu jikkonformaw ma’ kwalunkwe regola rilevanti tal-UE.

Fejn ma tkun teżisti l-ebda regola li tgħodd għall-UE kollha, jistgħu japplikaw speċifikazzjonijiet differenti f’pajjiżi differenti tal-UE. F’każijiet bħal dawn, trid tikkonforma biss mar-regoli validi fil-pajjiż tal-UE tiegħek.

X’inhuma r-rekwiżiti tal-prodotti?

Il-liġi tal-UE tistabbilixxi rekwiżiti essenzjali biex jiġi żgurat li l-prodotti kkummerċjalizzati fl-UE jissodisfaw standards għoljin fir-rigward tas-saħħa, tas-sikurezza, u tal-ambjent.

Ir-rekwiżiti jistgħu jkopru:

• il-prodott innifsu: pereżempju l-fjammabbiltà, il-proprjetajiet elettriċi, jew l-iġjene
• il-proċess tal-manifattura tal-prodott
• il-prestazzjoni tal-prodott: pereżempju, l-effiċjenza enerġetika tiegħu.

Fil-biċċa l-kbira tal-każijiet, il-liġi tiddefinixxi r-riżultati li għandhom jinkisbu jew il-perikli li għandhom jiġu ttrattati, iżda ma tispeċifikax soluzzjonijiet tekniċi.

Kultant l-istandards jistgħu jgħinuk turi li qed timxi mal-liġi.

Fejn issib ir-rekwiżiti tal-prodotti tal-UE

Bħalissa, il-biċċa l-kbira tar-regoli dwar il-prodotti huma bbażati fuq il-liġi tal-UE. Dan ifisser li japplikaw l-istess regoli fil-pajjiżi kollha tal-UE. Ir-regoli huma applikati għal gruppi ta’ prodotti, bħall-ġugarelli, jew għal karatteristiċi tal-prodott, bħall-kompatibbiltà elettromanjetika.

Prodotti li mhumiex soġġetti għal-leġiżlazzjoni tal-UE, jew riskji, jaqgħu taħt ir-regolament dwar is-sikurezza ġenerali tal-prodotti.

Tista’ tiċċekkja r-rekwiżiti għall-prodott tiegħek fuq Access2Markets. Din il-bażi tad-data toffri informazzjoni dwar:

• ir-regoli u r-regolamenti għall-prodott tiegħek
• l-awtoritajiet kompetenti li tista’ tikkuntattja għar-rekwiżiti ta’ prodott speċifiku
• ir-rati tal-VAT u tad-dazju tas-sisa applikati fuq il-prodott tiegħek fil-pajjiż tal-UE fejn jinbiegħ.

Il-bażi tad-data Access2Markets hi strutturata fuq il-kodiċijiet doganali: biex tara r-rekwiżiti għall-prodott tiegħek l-ewwel trid tidentifika l-kodiċi doganali tiegħu. Jekk ma tafx il-kodiċi doganali, tista’ tfittxu bl-isem tal-prodott tiegħek b’magna tat-tiftix integrata.

Fejn għandek issib ir-rekwiżiti tal-prodotti nazzjonali

Hemm ukoll regoli dwar il-prodotti li mhumiex armonizzati fl-UE u dan ifisser li l-ispeċifikazzjonijiet jistgħu jvarjaw f’kull pajjiż tal-UE. F’każijiet bħal dawn, trid tikkonforma biss mar-regoli applikabbli fil-pajjiż tal-UE li fih beħsiebek tikkummerċjalizza l-prodott tiegħek fis-suq.

Jekk il-prodotti tiegħek jissodisfaw dawn ir-rekwiżiti fil-pajjiż tal-UE tiegħek, pajjiżi oħrajn tal-UE ma jistgħux:

• jimpedixxu l-bejgħ tal-prodotti tiegħek
• jobbligawk timmodifikahom
• iġiegħluk tagħmel testijiet addizzjonali

sakemm ma jkunux jistgħu jippruvaw li l-prodotti tiegħek ma jissodisfawx ir-rekwiżiti tekniċi u ta’ kwalità ta’ pajjiżek u ma joffrux livell simili ta’ sikurezza. Dan hu magħruf bħala l-prinċipju tar-rikonoxximent reċiproku.

Jekk qed tiffaċċja problema relatata mar-regoli dwar il-prodotti f’pajjiż ieħor tal-UE li huma inkompatibbli mal-prinċipju tar-rikonoxximent reċiproku, tista’ titlob l-assistenza mingħand is-SOLVIT.

Ir-regoli nazzjonali

Il-gvernijiet tal-pajjiżi tal-UE huma obbligati jippubblikaw ir-regoli nazzjonali tagħhom. Tista’ ssir taf aktar dwar ir-regoli nazzjonali u dwar il-prinċipju tar-“rikonoxximent reċiproku” fil-bażi tad-data TRIS għar-regoli tal-prodotti mhux armonizzati.

B’mod partikolari, ir-rekwiżiti skont ir-regoli nazzjonali jistgħu jvarjaw f’dawk li huma:

• id-daqs/id-dimensjonijiet
• il-piż
• il-kompożizzjoni
• it-tikkettar
• l-ippakkjar
• l-ittestjar.

Biex issib liema regoli tekniċi japplikaw għal prodotti speċifiċi f'kull pajjiż tal-UE jew id-dettalji tal-awtoritajiet kompetenti f'dak il-pajjiż tal-UE tista' tikkonsulta l-lista ta' Punti ta' Kuntatt għall-Prodotti.

Restrizzjonijiet abbażi tar-regoli nazzjonali

Jekk il-prodotti tiegħek huma ta’ riskju għall-interess tal-pubbliku, abbażi tal-liġijiet fis-seħħ f’pajjiżi oħrajn tal-UE li jaffettwaw:

• is-saħħa u l-ħajja tal-bnedmin, tal-annimali, jew tal-pjanti
• il-ħarsien tal-ambjent
• is-sigurtà pubblika jew il-moralità pubblika

għandu mnejn ma titħalliex tesportahom b’mod liberu.

Il-prodotti tiegħek jistgħu jiġu pprojbiti jekk il-pajjiż tal-UE li trid tesporta fih jagħti prova li r-rekwiżiti tekniċi tiegħu huma essenzjali jew mandatarji, u li l-prodotti tiegħek mhumiex ekwivalenti f’termini tal-livell ta’ sikurezza mitlub.

Biex issib liema regoli nazzjonali japplikaw għal prodotti speċifiċi f'kull pajjiż tal-UE jew id-dettalji tal-awtoritajiet kompetenti f'dak il-pajjiż tista' tikkonsulta l-lista ta' Punti ta' Kuntatt għall-Prodotti.