Tikketti tat-Tessuti

Jekk qed tippjana li tbigħ prodotti tat-tessuti fl-UE, dawn għandhom jikkonformaw mar- rekwiżiti tat-tikkettar tal-UE. B'mod ġenerali, dawn għandu jkollhom fuqhom tikketta li tidentifika b'mod ċar il- kompożizzjoni tal-fibri tat-tessuti użati u jindikaw kwalunkwe parti mhux magħmula mit-tessuti li toriġina mill-annimali.

X'inhi tikketta tat-tessuti?

Kull prodott tat-tessuti għandu jkun ittikkettjat jew immarkat biex juri l-kompożizzjoni tal-fibri tiegħu kull meta l-prodott jitqiegħed fis-suq fl-UE. Dawn it-tikketti għandhom jitwaħħlu sew mal-prodott, pereżempju, jinħietu fih.

Dan ir-rekwiżit jikkonċerna l-prodotti kollha magħmulin minn tal-anqas 80% ta' fibri tat-tessuti, ikkalkulati skont il-piż, bħal:

• ħwejjeġ
• għatjiet għall-għamara
• għatjiet għas-saqqijiet
• tined tal-kampijiet

It-tikketti tat-tessuti huma mandatorji?

It-tikketti tat-tessuti huma mandatorji fl-UE għat-tessuti maħsuba għall-bejgħ lill-konsumatur aħħari. Fil-każ ta' bejgħ minn negozju għal negozju, it-tikketti tat-tessuti jistgħu jinbidlu jew jiġu ssupplimentati minn dokumenti kummerċjali li jakkumpanjawhom.

L-awtoritajiet nazzjonali jistgħu jivverifikaw il-prodotti tat-tessuti għall-konformità mal-informazzjoni murija fuq it-tikketta fi kwalunkwe stadju tal-katina tat-tqegħid fis-suq, bħal:

• meta tintalab l-approvazzjoni doganali
• fl-imħażen tad-distributur
• fi ħwienet bl-ingrossa jew bl-imnut

X'għandu jinkiteb fuq it-tikketta?

It-tikketta għandha:

• tispjega l-kompożizzjoni tal-fibri – miktuba f'ordni ta' perċentwal li jiċkien
• tuża test ċar u li jinqara, inkluż ittri uniformi (l-istess font, daqs, u stil)
• ikollha separazzjoni ċara bejn l-informazzjoni dwar il-kompożizzjoni tat-tessuti u informazzjoni oħra, bħall-kura tal-prodott

Jekk qed tippjana li tbigħ il-prodotti tiegħek f'pajjiż wieħed jew aktar tal-UE, għandek tittraduċi t-test fil-lingwi nazzjonali uffiċjali kollha fejn il-prodotti tat-tessuti jkunu disponibbli għall-konsumatur.

Tista' tiddeskrivi biss prodott tat-tessuti bħala "100%", "pur", jew "kollu" jekk hu magħmul b'mod esklużiv minn tip ta' fibra waħda. Tista' tagħżel jekk tużax dawk it-termini jew jekk tirreferix, pereżempju, għal qmis 100% tal-qoton sempliċiment bħala "qoton".

It-tipi u l-ismijiet tal-fibri tat-tessuti li tista' tuża huma limitati għal-lista fl-Anness I tar-Regolament tal-UE dwar l-ismijiet tat-tessuti u t-tikkettar relatat. Jekk il-prodott tiegħek fih fibra tat-tessut li mhix fost dawk elenkati fir-Regolament, tista' tapplika għat-tip ta' fibra ġdida li għandu jiżdied. Skopri aktar dwar din il-proċedura fuq il-paġna tal-Kummissjoni Ewropea dwar il-leġiżlazzjoni dwar it-tessuti u l-ħwejjeġ en .

Jekk tixtieq li tagħti l-prodotti tat-tessuti tiegħek sinjal rikonoxxut ta' eċċellenza ambjentali, iċċekkja jekk tistax tapplika wkoll għal Ekotikketta tal-UE.