Il-kuntratti konklużi mal-konsumaturi
Il-liġi tal-UE tistabbilixxi wħud mir-rekwiżiti ta' ġustizzja u trasparenza għall-kuntratti li int tiffirma mal-konsumaturi.
Liema termini kuntrattwali huma kkonċernati?
L-informazzjoni hawn taħt tikkonċerna biss il-bejgħ lil konsumaturi li jixtru barra mill-isfera professjonali tagħhom. Ma tapplikax jekk tbigħ lil negozji oħrajn.
Ir-rekwiżiti tal-UE japplikaw għal kwalunkwe terminu kuntrattwali li ma ġiex negozjat individwalment mal-konsumatur, bħal termini kuntrattwali standard tas-soltu abbozzati minn qabel. Kemm is-suġġett prinċipali tal-kuntratt tiegħek u l-aspetti ta' valur għall-flus huma speċifikament esklużi.
Ħu nota li jekk tixtieq tistrieħ fuq il-fatt li l-kuntratt ġie nnegozjat individwalment, jeħtieġ li tkun tista' turi dan.
Il-kuntratti għandhom ikunu ġusti
It-termini kuntrattwali standard użati matul in-negozju tiegħek, kemm jekk jissejħu "termini u kundizzjonijiet" u kemm jekk jagħmlu parti minn kuntratt dettaljat, għandhom ikunu ġusti.
Skont il-liġi tal-UE, it-termini kuntrattwali standard m'għandhomx:
- imorru kontra r-rekwiżit ta' bona fede;
- iqiegħdu lill- konsumaturi fi żvantaġġ (f'termini ta' drittijiet u obbligi), f'relazzjoni mal-bejjiegħa/fornituri.
Għandek taġixxi in bona fede, filwaqt li tqis l-interessi leġittimi tal-konsumaturi, billi tittrattahom b'mod ġust u ekwu.
Termini kuntrattwali inġusti mhumiex vinkolanti
Jekk termini speċifiċi f'kuntratt huma inġusti, dawn mhumiex vinkolanti għall-konsumaturi u ma tistax tistrieħ fuqhom, avolja l-konsumatur ikun iffirma l-kuntratt.
Sakemm it-terminu inġust mhux element essenzjali tal-kuntratt, il-bqija tal-kuntratt (iżda mhux it-terminu inġust) jibqa' jorbot lilek u lill-konsumatur.
Il-kuntratti għandhom ikunu trasparenti
It-termini kuntrattwali għandhom ikunu abbozzati f'lingwa ċara, li tinftiehem. It-termini kuntrattwali mhux biss iridu jkunu grammatikalment ċari iżda l-konsumatur irid ikun kapaċi jifhem il-konsegwenzi ekonomiċi tagħhom.
Twissija
Oqgħod attent li kwalunkwe ambigwitajiet se jiġu interpretati favur il-konsumatur.
Eżempji ta' termini potenzjalment inġusti
Minbarra r-rekwiżit ġenerali ta' "bona fede" u ta' "bilanċ", ir-regoli tal-UE fihom lista ta' termini kuntrattwali speċifiċi li jistgħu jitqiesu inġusti.
Dawn huma xi sitwazzjonijiet fejn it-termini kuntrattwali jistgħu jitqiesu inġusti skont ir-regoli tal-UE:
1. Responsabbiltà meta konsumatur imut jew iweġġa'
Termini li jeskludu/jillimitaw ir-responsabbiltà tiegħek jekk konsumatur imut jew iweġġa' minħabba att/ommissjoni min-naħa tiegħek.
2. Kumpens jekk ma tonorax dak li twiegħed
Termini li jeskludu/jillimitaw b'mod inadegwat id-drittijiet tal-konsumaturi għal kumpens jekk ma twettaqx il-parti tiegħek tal-kuntratt.
3. Klawsola li tippermettilek tiżloq mill-kuntratt
Termini li jippermettulek tiżloq milli tipprovdi servizz sempliċement għax ma jgħoddux għalik, iżda li xorta waħda jorbtu lill-konsumatur.
4. Kumpens lil naħa waħda għal kanċellazzjoni
Termini li jippermettulek iżżomm pagamenti li jkunu saru minn qabel jekk il-konsumatur jikkanċella l-kuntratt mingħajr ma tippermetti li jingħata kumpens ekwivalenti lill-konsumatur meta int (in-negozjant) tikkanċella.
5. Kumpens eċċessiv
Termini li jeżiġu lil konsumatur li ma josservax obbligu li jħallas ammont għoli u irraġonevoli ta' kumpens.
6. Kanċellazzjoni magħmula minn naħa waħda
Termini li jippermettulek tħoll kuntratt b'mod unilaterali iżda fejn il-konsumatur ma jgawdix mill-istess dritt.
7. Kanċellazzjoni fl-aħħar minuta
Termini li jawtorizzawk li ttemm kuntratt fl-aħħar minuta mingħajr data ta' tmiem fissa, ħlief meta jkun assolutament iġġustifikat.
8. Estensjonijiet awtomatiċi ta' kuntratti b'limitu ta' żmien fiss
Termini fejn konsumatur għandu jinnotifika intenzjoni biex itemm kuntratt iżda fejn il-limitu ta' żmien biex jagħmel dan hu minn qabel irraġonevolment.
9. Termini moħbijin
Termini li jorbtu l-konsumaturi anki jekk huma ma setgħux ikunu konxji minnhom qabel ma ffirmaw il-kuntratt.
10. Tibdiliet unilaterali fil-kuntratt
Termini li jippermettulek tbiddel kuntratt b'mod unilaterali sakemm il-kuntratt ma jiddikjarax raġuni valida biex isir dan.
11. Tibdiliet unilaterali lil prodott jew lil servizz
Termini li jippermettulek tagħmel tibdiliet lill-prodott jew lis-servizz li għandu jingħata b'mod unilaterali u mingħajr raġuni valida.
12. Varjazzjonijiet fil-prezzijiet
Termini fejn tista' tiffissa jew iżżid il-prezz finali tal-kunsinna — mingħajr ma tagħti l-konsumaturi l-għażla li jikkanċellaw il-kuntratt — jekk l-ammont ikun bil-wisq ogħla milli miftiehem fil-bidu.
13. Interpretazzjoni unilaterali tal-kuntratt
Termini fejn int waħdek għandek id-dritt li tinterpreta kwalunkwe klawsola tal-kuntratt u li tiddeċiedi jekk il-prodott jew is-servizz jikkonformax mal-kuntratt.
14. Meta ma tonorax dikjarazzjonijiet magħmulin mill-persunal tiegħek
Termini li bis-saħħa tagħhom tipprova tiżgiċċa mill-impenji magħmulin mill-persunal tiegħek jew fejn tali impenji huma soġġetti għal kundizzjonijiet oħrajn.
15. Konformità unilaterali mal-obbligi
Termini li jobbligaw lill-konsumaturi li josservaw l-obbligi tagħhom meta int ma tonorax l-obbligi tiegħek.
16. Trasferimenti ta' kuntratti lejn negozjanti oħrajn b'kundizzjonijiet anqas vantaġġużi
Termini li jippermettulek tittrasferixxi l-kuntratt mingħajr il-kunsens tal-konsumatur u li jistgħu jagħtu lill-konsumatur ftehim anqas vantaġġuż.
17. Drittijiet limitati għal azzjoni legali
Termini li jirrestrinġu kif u fejn il-konsumaturi jistgħu jieħdu azzjoni legali u li jobbligawhom li jagħtu prova li hi r-responsabbiltà tal-parti l-oħra tal-kuntratt.
Dettalji dwar regoli nazzjonali
Jekk jogħġbok ftakar li r-regoli tal-UE dwar termini kuntrattwali inġusti jistabbilixxu standard minimu li jista' jissaħħaħ aktar jew jiġi estiż permezz ta' liġijiet nazzjonali.
Għal informazzjoni dettaljata dwar ir-regoli applikabbli jekk jogħġbok ikseb parir minn Netwerk Enterprise Europe en f'pajjiżek.
Consumer Law Ready
Consumer Law Ready hu programm madwar l-UE, li joffri korsijiet ta' taħriġ bla ħlas fil-liġi tal-konsumatur għall-mikrointrapriżi u l-SMEs. Tista' tapplika biex tattendi kors ta' taħriġ f'pajjiżek biex tiżgura li l-SME tiegħek hi Consumer Law Ready.
Jekk tippreferi titgħallem bir-ritmu tiegħek, agħmel is-sign up biex taċċessa l-materjal edukattiv. Imbagħad tista' tagħmel test elettroniku u tivvalida t-taħriġ tiegħek b'ċertifikat.
Iċċekkja l-portal tal- Consumer Law Ready en biex tiskopri kif tagħmel is-sign up.