Reġistrazzjoni fl-EMAS
Billi timmonitorja u sistematikament ittejjeb il-prestazzjoni ambjentali tan-negozju tiegħek, tista’ tgħin tnaqqas il-konsum tal-enerġija tiegħek, tiżgura li r-riżorsi li tuża jħarsu l-ambjent, u ttejjeb ir-reputazzjoni tiegħek. Bħala kumpanija, tista’ titlob ir-reġistrazzjoni fl-ambitu tal-Iskema ta’ Ġestjoni u Verifika Ambjentali (EMAS) tal-UE.
Benefiċċji tar-reġistrazzjoni fl-EMAS għall-kumpanija tiegħek
L-EMAS tista’ tgħin lill-kumpanija tiegħek:
- tnaqqas il-kostijiet marbuta mal-ġestjoni tar-riżorsi u l-iskart
- tnaqqas ir-riskji ambjentali u l-periklu ta’ multi marbuta mal-leġiżlazzjoni ambjentali
- tikkonforma mar-rekwiżiti regolatorji
- tibbenefika minn serħan regolatorju ambjentali (pereżempju, rekwiżiti ta’ rappurtar u spezzjonijiet)
- ittejjeb ir-relazzjonijiet mal-partijiet ikkonċernati interni u esterni
- ittejjeb kontinwament il-prestazzjoni ambjentali tiegħek
- tikseb vantaġġ kompetittiv billi ttejjeb il-kredibbiltà, it-trasparenza u r-reputazzjoni tiegħek fost il-klijenti tiegħek
Il-proċess tar-reġistrazzjoni fl-EMAS hu trasparenti u s-sistema ta’ ġestjoni ambjentali hi vverifikata minn parti terza indipendenti, li tiggarantixxi l-kredibbiltà tal-iskema. L-organizzazzjonijiet irreġistrati biss jistgħu jużaw il-logo tal-EMAS.
Rekwiżiti għar-reġistrazzjoni fl-EMAS
Biex tikseb ir-reġistrazzjoni fl-EMAS, trid tieħu diversi passi, bħal:
- twettaq rieżami ambjentali komprensiv biex tivvaluta l-impatt tal-kumpanija tiegħek
- tadotta politika u programm ambjentali fejn tinvolvi l-impjegati u l-partijiet ikkonċernati esterni
- tistabbilixxi u timplimenta sistema ta’ ġestjoni ambjentali
- tħejji dikjarazzjoni ambjentali
- tara li s-sistema ta’ ġestjoni ambjentali tiġi vverifikata u d-dikjarazzjoni ambjentali tiġi vvalidata minn verifikatur ambjentali
Għall-appoġġ tekniku u għall-informazzjoni dwar kif timplimenta l-EMAS, tista’ tikkuntattja l-awtorità kompetenti f’pajjiżek:
Agħżel il-pajjiż
L-EMAS għall-SMEs
Jekk inti SME, tista’ tibbenefika minn diversi vantaġġi meta tirreġistra fl-EMAS:
- Tista’ twettaq il-verifika sħiħa tal-EMAS kull erba’ snin, minflok kull tliet snin. Dan inaqqas il-piżijiet amministrattivi u jippermetti perjodi itwal bejn il-verifiki.
- Il-perjodu taż-żmien għal verifika interna jista’ jiġi estiż minn sena għal sentejn.
- Tista’ tippubblika d-dikjarazzjoni ambjentali tiegħek kull sentejn minflok kull sena, jekk tgħaddi d-dikjarazzjoni ambjentali mhux validata u aġġornata lill-Korp Kompetenti kull sena.
- Il-verifikaturi ambjentali jqisu l-karatteristiċi speċifiċi tal-SMEs meta jevalwaw is-sistema u r-rapport ta’ ġestjoni ambjentali tagħhom.
- It-tariffi huma ddisinjati biex ikunu proporzjonati għad-daqs tal-organizzazzjoni.
Xi reġjuni u pajjiżi tal-UE joffru appoġġ finanzjarju għall-applikazzjoni tal-EMAS tiegħek. Biex tara jekk dan japplikax għal pajjiżek, tista’ tikkuntattja lill-awtorità kompetenti.
Storja bħala eżempju
Mod faċli biex insiru aktar ekoloġiċi: L-esperjenza ta’ Sofia fl-EMAS
Sofia tmexxi negozju żgħir tal-manifattura fil-Portugall u hija impenjata bis-sħiħ
li tnaqqas l-impatt li dan iħalli fuq l-ambjent. Biex turi l-impenn tagħha għas-sostenibbiltà,
hija ddeċidiet li tirreġistra l-kumpanija tagħha mal-Iskema ta’ Ġestjoni u Verifika
Ambjentali (EMAS) tal-UE.
Għall-bidu, Sofia kienet imħassba dwar il-ħin u l-kostijiet, iżda malajr skopriet
li l-EMAS għamlet l-affarijiet eħfef għan-negozji ż-żgħar bħal tagħha. Pereżempju,
il-kumpanija ta’ Sofia kellu jsirilha biss rieżami maġġuri kull erba’ snin minflok
kull tlieta, il-kontrolli interni setgħu jinfirxu fuq perjodu ta’ sentejn, u r-rapport
ambjentali tagħha kien jeħtieġlu jiġi aġġornat biss kull sentejn.
Anki t-tariffi ġew aġġustati abbażi tad-daqs tal-kumpanija tagħha. Barra minn hekk, Sofia skopriet li r-reġjun tagħha kien qed joffri appoġġ finanzjarju għar-reġistrazzjoni fl-EMAS, u saħansitra kien aktar affordabbli għaliha li tagħżel prattiki aktar ekoloġiċi.
Uża l-għodod u l-appoġġ disponibbli
Jekk qed tippjana li tapplika għar-reġistrazzjoni fl-EMAS, tista’ tuża l-EMAS Easy, li hi għodda komprensiva għall-implimentazzjoni tal-EMAS. L-EMAS Easy tgħin lill-kumpanija tiegħek timplimenta l-EMAS b’mod li tqis id-daqs, il-kapaċità finanzjarja u l-kultura organizzazzjonali ta’ negozji żgħar. Ikkonsulta l-gwida tal-EMAS Easy u segwi l-passi għar-reġistrazzjoni fl-EMAS.
Għal aktar appoġġ għall-SMEs, iċċekkja r-rokna tal-EMAS għall-SMEs.