Mistoqsijiet frekwenti - Il-familja ta’ min qed ifittex xogħol
Jien Franċiż u marti Ċiniża. Tista’ tingħaqad miegħi fl-Italja, fejn bħalissa qed infittex impjieg?
Iva. Bħala l-konjuġi ta’ ċittadin tal-UE, hija intitolata li tingħaqad miegħek fl-Italja, diment li inti tkun qed issegwi r-regoli għall-persuni li qed ifittxu impjieg. Issib iktar informazzjoni fit-taqsima dwar ir-regoli dwar ir-residenza għall-persuni li qed ifittxu impjieg.
Jiena Belġjana u rrid immur il-Ġermanja biex ningħaqad ma’ żewġi Ġermaniż, li mhux qed jaħdem. Jien m’għandix impjieg lanqas. X’inhuma drittijieti?
Drittijietek huma l-istess bħal ta’ żewġek għax inti ċittadina tal-UE. Jaf ikollok tirrapporta l-preżenza tiegħek meta tasal. Jaf ikollok tirreġistra wkoll bħala persuna li qed tfittex impjieg u tippreżenta evidenza li turi li qed tfittex xogħol. Aqra iktar dwar id-drittijiet ta’ residenza tiegħek bħala persuna li qed tfittex impjieg u l-benefiċċji tas-sigurtà soċjali kif ukoll ir-regoli ġenerali dwar ir-residenza għaċ-ċittadini tal-UE.
Jiena Niġerjana u żewġi Ġermaniż. It-tnejn li aħna qiegħda u rrid ningħaqad miegħu fil-Ġermanja.
Fil-każ tiegħek japplikaw ir-regoli nazzjonali dwar l-immigrazzjoni minħabba li żewġek qed jgħix fil-pajjiż tal-oriġini tiegħu (nota: kienu japplikaw regoli differenti li kieku żewġek kien qed jgħix f’pajjiż ieħor tal-UE li mhuwiex il-pajjiżi tal-oriġini tiegħu). Tistax tingħaqad ma’ żewġek fil-Ġermanja jiddependi mil-liġi nazzjonali Ġermaniża.
Jiena mill-Vjetnam u l-għarus tiegħi huwa Daniż. It-tnejn li aħna qiegħda u rrid ningħaqad miegħu fid-Danimarka.
Fil-każ tiegħek japplikaw ir-regoli nazzjonali dwar l-immigrazzjoni minħabba li m’intix miżżewġa jew fi sħubija ċivili. F’idejn l-awtoritajiet nazzjonali li jiġġudikaw l-applikazzjonijiet għal residenza għal sħab fit-tul fuq bażi ta’ każ b’każ. Ir-regoli tal-UE jiggarantulek id-dritt li l-applikazzjoni tiegħek tiġi vvalutata, li tirċievi deċiżjoni bil-miktub mill-iktar fis, u d-dritt li tappella jekk l-applikazzjoni tiegħek tinċaħad. Aqra iktar dwar ir-regoli għas-sħab fit-tul li jingħaqdu ma’ persuni li qed ifittxu impjieg fil-pajjiżi tal-UE.
Bħalissa qed infittex xogħol fil-Portugall (jiena Finlandiża). Iż-żwieġ tiegħi bejn persuni tal-istess sess se jiġi rikonoxxut hawnhekk? Irrid li marti Ġappuniża tingħaqad miegħi.
Iva, iż-żwieġ tiegħek jiġi rikonoxxut fil-Portugall u martek se tkun tista’ tgħix hemmhekk bħala l-konjuġi ta’ persuna li qed tfittex impjieg (diment li tkun qed taderixxi mar-regoli għall-persuni li qed ifittxu impjieg). Madankollu, dan mhuwiex il-każ fil-pajjiżi kollha tal-UE. Ir-regoli rigward iż-żwiġijiet bejn persuni tal-istess sess, kif ukoll is-sħubijiet reġistrati u l-unjonijiet ċivili bejn persuni tal-istess sess, ivarjaw minn pajjiż għal ieħor. Aqra iktar dwar ir-rikonoxximent tal-unjonijiet ċivili u s-sħubijiet reġistrati fl-UE.
Jien mill-Afrika t’Isfel u oħti ċittadina Kroata. Hi qiegħda. Nista’ ningħaqad magħha fil-Kroazja?
Jien mill-Brażil u binti Spanjola. Hi qiegħda. Nista’ ningħaqad magħha fi Spanja?
Jaf tkun tista’ tikseb drittijiet ta’ residenza jekk inti dipendenti fuq bintek. Madankollu, jaf ikollha tagħti prova li għandha biżżejjed riżorsi finanzjarji biex twieżnek. Ittawwal lejn ir-regoli nazzjonali Spanjoli dwar l-immigrazzjoni biex issir taf iktar.
Jien mill-Brażil u binti Spanjola, iżda qed tgħix fl-Iżvezja. Hi qiegħda. Nista’ ningħaqad magħha?
Tista’ tingħaqad ma’ bintek fi Spanja u tapplika għad-drittijiet ta’ residenza bħala membru tal-familja ta’ ċittadin tal-UE. Trid tapplika għal karta tar-residenza fi żmien 3 xhur mill-wasla tiegħek.
Kemm jien kif ukoll żewġi Kongoliżi, u hu se jfittex xogħol fil-Bulgarija. Se ningħaqad miegħu, iżda mhux se jkolli impjieg lanqas. X’inhuma drittijieti?
Fil-każ tiegħek japplikaw ir-regoli nazzjonali dwar l-immigrazzjoni minħabba li l-Kongo mhuwiex pajjiż tal-UE, u m’għandekx membri tal-familja li huma Bulgari, jew ċittadini ta’ pajjiż ieħor tal-UE.