Miżati tal-universitajiet u għajnuna finanzjarja
Miżati u għotjiet ta’ flus għall-korsijiet
Il-miżati tal-universitajiet en huma differenti madwar l-UE, minn edukazzjoni għolja b’xejn f’xi pajjiżi għal kostijiet għoljin f’oħrajn. L-appoġġ finanzjarju f’forma ta’ boroż ta’ studju, għotjiet ta’ flus u self jiddependu wkoll minn kriterji differenti. Se jkollok bżonn issegwi r-regoli tal-pajjiż li qed tistudja fih.
Ħarsa ġenerali lejn l-istrutturi tal-miżati u tal-għotjiet ta’ flus
Bħala ċittadin tal-UE li jkun qed jistudja f’università f’pajjiż ieħor tal-UE:
- int ma tistax tkun meħtieġ tħallas miżati ogħla għall-korsijiet.
- int intitolat għall-istess għotjiet ta’ flus biex tkopri l-miżati tal-korsijiet bħaċ-ċittadini ta’ dak il-pajjiż.
Twissija
Dan it-trattament mhux neċessarjament japplika għall-għotjiet ta’ sostenn jew ta’ manteniment u self li jkopru spejjeż oħra minbarra l-miżati tal-korsijiet. Madankollu wħud mill-pajjiżi jistgħu jagħżlu li jipprovdu għotjiet ta’ manteniment lill-istudenti barranin, fuq inizjattiva tagħhom.
Studenti barranin li diġà huma residenti
Anke jekk m’intix ċittadin tal-pajjiż fejn trid tistudja, jekk int resident permanenti, eliġibbli wara 5 snin ta’ residenza kontinwa fil-pajjiż, int intitolat għal għotja ta’ manteniment bl-istess kundizzjonijiet bħaċ-ċittadini ta’ dak il-pajjiż. Jekk tiddeċiedi li tistudja f’pajjiż ieħor tal-UE, u ġej minn pajjiż mhux tal-UE, jistgħu japplikaw regoli u kundizzjonijiet speċjali; ivverifika l-portal tal-UE dwar l-immigrazzjoni għal iktar informazzjoni.
Għajnuna finanzjarja skont il-pajjiż
Agħżel il-pajjiż
Għal informazzjoni dwar l-għotjiet ta’ flus biex tistudja barra mill-pajjiż, tista’ wkoll tikkuntattja lill-ministeru għall-edukazzjoni nazzjonali tiegħek.
Jekk tagħżel li tistudja barra mill-pajjiż, xorta waħda tista’ tikseb għotja ta’ manteniment minn pajjiżek, li jaf tkun possibbli għal perjodu limitat.
Storja bħala eżempju
Ivverifika l-kundizzjonijiet marbutin mal-għotjiet għall-istudenti ta’ pajjiżek
Johs hu Daniż li ddeċieda li jibda kors ta’ Master’s ta’ sentejn fin-Netherlands wara 4 snin jistudja fil-Bulgarija. Madankollu, hemm limitu ta’ 4 snin għan-numru ta’ snin li student Daniż jista’ jirċievi għotjiet ta’ manteniment mill-gvern jekk l-istudji tiegħu ma sarux fil-pajjiżi Nordiċi. Johs ma kienx jaf b’din il-kundizzjoni u sfortunatament tħalla mingħajr għotja ta’ flus matul il-kors tiegħu fin-Netherlands peress li kien diġà ilu jirċievi waħda għal 4 snin barra mill-Bulgarija.