Téarmaí fostaíochta

Más gá do d’fhostaí tréimhse phromhaidh a dhéanamh, ní bheidh sí níos faide ná sé mhí. I gcás caidreamh fostaíochta ar théarma seasta, ní mór an tréimhse phromhaidh a bheith i gcomhréir leis an bhfad a mheastar a mhairfidh an conradh agus leis an gcineál oibre. I gcás ina ndéantar conradh a athnuachan don fheidhm chéanna agus do na cúraimí céanna, ní chuirfidh tú é faoi réir tréimhse phromhaidh nua. Go heisceachtúil, is féidir le tíortha den Aontas tréimhsí promhaidh níos faide a bhunú i rialáil náisiúnta má tá údar leis sin de bharr chineál na fostaíochta nó ar mhaithe leis an oibrí.

Mar fhostóir, ní féidir leat cosc a chur ar d’oibrithe oibriú le fostóirí eile, lasmuigh den am oibre bunaithe, agus ní féidir leat caitheamh le d’oibrithe ar bhealach nach bhfuil chomh fabhrach céanna as déanamh amhlaidh. Is féidir le tíortha den Aontas dálaí a bhunú maidir le neamh-chomhoiriúnacht fostaíochta comhuainí, bunaithe ar chúiseanna oibiachtúla amhail sláinte agus sábháilteacht, rúndacht gnó, sláine seirbhíse poiblí nó coinbhleacht leasa a sheachaint.

Má thairgeann tú conradh a ngabhann sceideal oibre neamhrialta leis, ní mór duit an méid seo a leanas a dhéanamh:

• uaireanta agus laethanta tagartha réamhshocraithe a thabhairt do d’oibrí
• d’oibrí a chur ar an eolas faoi shannachán oibre laistigh de thréimhse fógra réasúnta arna bunú i gcomhréir leis an dlí náisiúnta, le comhaontuithe comhchoiteanna náisiúnta nó leis an gcleachtas náisiúnta.

Mura gcomhlíontar ceanglas amháin nó an dá cheanglas, tá sé de cheart ag d’oibrí sannachán oibre a dhiúltú gan iarmhairtí díobhálacha a bheith ann. Fiú nuair a cheadaítear faoin dlí náisiúnta duit sannachán oibre a chur ar ceal gan chúiteamh, tá d’oibrí i dteideal cúitimh i gcomhréir leis an dlí náisiúnta, le comhaontuithe comhchoiteanna náisiúnta nó leis an gcleachtas náisiúnta, má chuireann tú sannachán oibre a comhaontaíodh roimhe sin ar ceal tar éis sprioc-am réasúnach sonraithe.

Má cheadaítear le dlí náisiúnta na tíre den Aontas ina bhfuil tú conarthaí fostaíochta ar éileamh nó conarthaí fostaíochta comhchosúla a úsáid, agus más mian leat do bhaill foirne a fhostú leis na cineálacha sin conarthaí, ba cheart a fhios a bheith agat nach mór do dhlí náisiúnta na tíre den Aontas ina bhfuil tú bearta a bhunú chun a mhí-úsáid a chosc. Mar shampla, d’fhéadfadh an dlí náisiúnta teorainn a chur le húsáid agus fad conarthaí ar éileamh agus conarthaí comhchosúla, nó glacadh leis go bhfuil conradh fostaíochta ann lena ngabhann líon íosta uaireanta íoctha, rud a bheidh bunaithe ar mheánlíon na n-uaireanta oibre a dhéantar le linn tréimhse shonrach.

Tar éis sé mhí seirbhíse ar a laghad agus tréimhse phromhaidh a bheith curtha i gcrích go rathúil (más infheidhme), is féidir le hoibrí cineál fostaíochta a iarraidh lena mbaineann dálaí oibre níos intuartha agus níos sláine, más ann dóibh. Ní mór duit freagra réasúnaithe i scríbhinn a thabhairt don oibrí sin laistigh de mhí amháin tar éis an t-iarratas a fháil. Féadfaidh tíortha den Aontas minicíocht iarrataí den sórt sin a theorannú.

Más FBM thú, nó duine nádúrtha atá ag gníomhú mar fhostóir, i roinnt tíortha den Aontas d’fhéadfadh suas le trí mhí a bheith agat, agus is féidir leat freagra ó bhéal a thabhairt ar iarrataí comhchosúla ón oibrí céanna ina dhiaidh sin mura bhfuil aon athrú ar an réasúnú sin.

Má cheanglaítear ort le dlí an Aontais nó leis an dlí náisiúnta oiliúint a chur ar fáil do d’oibrithe le haghaidh a gcuid oibre, ní mór duit í a chur ar fáil saor in aisce. Thairis sin, ní mór an oiliúint a áireamh mar am oibre, agus, más féidir, ní mór í a dhéanamh le linn uaireanta oibre.

I roinnt tíortha den Aontas, d’fhéadfadh comhaontuithe comhchoiteanna a dhéantar i gcomhréir leis an dlí náisiúnta bearta a bhunú atá éagsúil leis na bearta thuasluaite, agus cosaint fhoriomlán oibrithe á hurramú ag an am céanna. Cuireann roinnt tíortha den Aontas scéimeanna oibre simplithe i bhfeidhm do bhaill foirne atá fostaithe go ceann uastréimhse míosa nó níos lú ná 8 n-uaire in aghaidh na seachtaine.