Ceisteanna Coitianta - Oibrithe - cearta cónaithe
Táim ag obair go dleathach i dtír eile den Aontas le breis agus 5 bliana. An féidir leis na húdaráis sa tír sin a iarraidh orm fós a chruthú go bhfuil mé fostaithe inti nuair a dhéanaim mo dheimhniú clárúcháin a athnuachan?
NÍ FÉIDIR - Tar éis 5 bliana, tá tú i dteideal buanchónaí a fháil go huathoibríoch i do thír nua. Níor cheart duit do dheimhniú clárúcháin a athnuachan ach iarratas a dhéanamh ar dhoiciméad buanchónaithe, rud a dhearbhaíonn go bhfuil sé de cheart agat fanacht ann fiú mura bhfuil tú ag obair nó má tá tacaíocht ioncaim de dhíth ort.
Taistealaím chuig Ballstát eile roinnt uaireanta sa bhliain chun obair a dhéanamh, agus fanaim ar feadh seachtain amháin ar a mhéad gach uair. An gá dom aon fhoirmiúlacht a chomhlíonadh?
NÍ GÁ - Má fhanann tú ar feadh níos lú ná 3 mhí gach uair, is é an t-aon fhoirmiúlacht a d’fhéadfadh a bheith ort a chomhlíonadh do láithreacht a thuairisciú, má éilíonn an tír sin.
Tá mé féinfhostaithe agus bhog mé go dtír eile den Aontas le déanaí. Ní gá dom clárú ansin laistigh de na chéad trí mhí. An féidir liom tosú ag obair sula gcláraím?
IS FÉIDIR - Tá an cead agat a bheith ag obair cibé acu atá deimhniú clárúcháin agat nó nach bhfuil.
Is oifigeach tionscadal ón Iodáil mé. Táim ar phostú 7 mí sa Bheilg, agus tiocfaidh deireadh leis i gceann 3 mhí. Táim ag fanacht in árasán mo chomhpháirtí Bheilgigh (saor in aisce). An bhfuil mé díolmhaithe ó chlárú éigeantach sa Bheilg, toisc nach bhfuil conradh cíosa agam nó nach n-íocaim aon fhóntas ann?
NÍL - Go fóill féin, is gá duit clárú a luaithe is féidir. Sa Bheilg, tá sé sin éigeantach do shaoránaigh uile an Aontais a bheidh ag fanacht ar feadh tréimhse níos faide ná 3 mhí. Ní féidir tú a dhíbirt mura gcláraíonn tú, ach d’fhéadfaí fíneáil a ghearradh ort.
Is as an Ostair dom agus fuair mé tairiscint poist i dtír eil den Aontas, ach is post páirtaimseartha é agus níl an pá go maith. An bhféadfadh na húdaráis áitiúla ceart fanachta a dhiúltú dom?
NÍ FHÉADFADH - Fad is atá tú in ann a chruthú gur fíorghníomhaíocht eacnamaíocht é do chuid oibre, tá ceart fanachta agat sa tír ina bhfuil tú ag obair. Mar oibrí ar ioncam íseal, tá an ceart céanna agat ar chúnamh sóisialta agus atá ag oibrithe náisiúnta atá ar ioncam íseal. Ní féidir do cheart cónaithe a dhiúltú toisc nach bhfuil acmhainní leordhóthanacha agat chun tacú leat féin agus le haon bhaill teaghlaigh atá ag brath ort. Tá feidhm ag na rialacha céanna más oibrí féinfhostaithe thú ag a bhfuil gníomhaíocht nach ngineann ioncam leordhóthanach.