Ceadú le haghaidh tionscadail ghlan-nialasachta

Má tá sé beartaithe ag do ghnólacht saoráid a thógáil nó a leathnú ina monarófar teicneolaíochtaí glana san Aontas, cuir i gcás ceallraí, painéil ghréine nó tuirbíní gaoithe, seans go mbeidh ceadanna de dhíth ort. D’fhéadfadh cuid de na tionscadail sin a bheith incháilithe do stádas tionscadail straitéisigh, arb é atá i gceist leis próiseas ceadúcháin níos tapúla, rochtain ar sheirbhísí tacaíochta agus cuidiú chun deiseanna maoiniúcháin a shainaithint.

Cad is tionscadal glan-nialasachta ann?

Is éard is tionscadal glan-nialasachta ann tionscadal tionsclaíoch nó monaraíochta lena ndéantar an méid seo a leanas:

• teicneolaíochtaí a tháirgeadh lena laghdaítear astaíochtaí gás ceaptha teasa (e.g. ceallraí, painéil ghréine, tuirbíní gaoithe, teaschaidéil), nó
• cuidiú chun táirgeadh agus cur in úsáid na dteicneolaíochtaí sin san Eoraip a mhéadú

Cuimsítear leis na samplaí:

• saoráidí teicneolaíochta glaine a thógáil nó a leathnú
• trealamh a mhonarú le haghaidh fuinneamh in-athnuaite, stóráil fuinnimh, gabháil carbóin, nó eangacha leictreachais
• slabhraí soláthair a fhorbairt le haghaidh príomhtheicneolaíochtaí glan-nialasachta

Cad iad na cineálacha ceadanna atá ag teastáil?

Bíonn ceadanna de dhíth ar an gcuid is mó de thionscadail toisc go mbaineann siad le saoráidí tionsclaíocha agus bonneagar a thógáil, a leathnú nó a oibriú, dhá rud a mbíonn gá leo chun teicneolaíochtaí glan-nialasachta a tháirgeadh.

D’fhéadfadh an méid seo a leanas a bheith ag teastáil uait, ag brath ar do thionsadal:

• ceaduithe pleanála agus tógála
• ceadanna comhshaoil (e.g. astaíochtaí, torann, measúnuithe tionchair)
• ceaduithe a bhaineann le fuinneamh (e.g. cead chun nascadh leis an eangach leictreachais nó chun leictreachas a ghiniúint)
• ceadanna chun suiteálacha tionsclaíocha a mhodhnú nó a oibriú

An chaoi a n-oibríonn an próiseas ceadúcháin

Eisítear ceadanna ar an leibhéal náisiúnta (agus uaireanta ar an leibhéal réigiúnach nó áitiúil). Chun do thionscadal a bhogadh ar aghaidh, ba cheart duit teagmháil a dhéanamh leis an bPointe Teagmhála Aonair (SPC) chun cead a fháil i do thír féin den Aontas. Tá do SPC náisiúnta ann chun tú a threorú tríd an bpróiseas ceadúcháin.

Déanann SPC an méid seo a leanas:

• feidhmíonn sé mar phríomh-chomhéadan riaracháin
• cuireann sé in iúl duit cé na ceadanna a bhfuil feidhm acu maidir le do thionscadal
• míníonn sé nósanna imeachta agus amlínte le haghaidh formheasanna comhshaoil, tógála agus fuinnimh
• cuidíonn sé chun comhordú a dhéanamh ar na húdaráis a bhfuil baint acu le ceadanna agus formheasanna éagsúla a eisiúint

Aimsigh do Phointe Teagmhála Aonair glan-nialasachta náisiúnta:

Cad is tionscadal straitéiseach glan-nialasachta ann?

D’fhéadfaí a mheas go bhfuil tionscadail ghlan-nialasachta áirithe ríthábhachtach do thionscal teicneolaíochta glaine an Aontais. Is féidir le húdarás náisiúnta na tionscadail sin a ainmniú mar ‘thionscadail straitéiseacha ghlan-nialasachta’ agus is féidir leo tairbhe a bhaint as stádas tosaíochta.

Is féidir le tionscadail straitéiseacha ghlan-nialasachta tairbhe a bhaint as na nithe seo a leanas:

• go bpléifear leis an bpróiseas riaracháin go tapa agus go mbeidh an próiseas ceadúcháin níos tapúla (idir 9 mí agus 18 mí de ghnáth)
• tacaíocht ar leibhéal an Aontais tríd an Ardán um Ghlan-nialasacht na hEorpa, comhairle maidir le maoiniú san áireamh
• cóir phráinneach i nósanna imeachta breithiúnacha agus réitigh díospóidí
• nósanna imeachta um measúnú comhshaoil cuíchóirithe

Chun cáiliú, ní mór na nithe seo a leanas a bheith i gceist le do thionscadal:

• monaraíocht teicneolaíochta glan-nialasachta
• gabháil agus stóráil CO₂ nó
• bonneagar chun CO₂ gafa a iompar

Ní mór dó freisin ar a laghad ceann amháin de na critéir seo a leanas a chomhlíonadh go soiléir:

• acmhainneacht mhonaraíochta an Aontais le haghaidh teicneolaíochtaí glan-nialasachta a neartú
• spleáchas a laghdú ar iompórtálacha le haghaidh teicneolaíochtaí glan-nialasachta
• inbhuanaitheacht chomhshaoil a fheabhsú nó astaíochtaí a laghdú

Conas iarratas a dhéanamh

Más mian leat go n-aithneofaí do thionscadal mar thionscadal straitéiseach, tá feidhm ag nósanna imeachta iarratais éagsúla ag brath ar an gcineál tionscadail agus ar an tacaíocht a fhaigheann sé cheana féin.

I bhformhór na gcásanna, beidh ort an fhoirm iarratais chaighdeánach a chuireann an Coimisiún Eorpach ar fáil a líonadh isteach agus a chur isteach. I gcásanna áirithe, féadfaidh feidhm a bheith ag nós imeachta simplithe.

Nós imeachta caighdeánach maidir le hiarratas a dhéanamh

D’iarratas a ullmhú

Beidh ort an méid seo a leanas a dhéanamh:

• cur síos a thabhairt ar do thionscadal (suíomh, teicneolaíocht, céim forbartha)
• míniú a thabhairt ar an gcaoi a gcuireann sé le cuspóirí glan-nialasachta an Aontais
• breac-chuntas a thabhairt ar an tionchar tionsclaíoch agus aeráide a mheastar a bheidh ag an tionscadal
• fianaise a sholáthar go gcomhlíonann sé na critéir le haghaidh tionscadail straitéiseacha

I gcás fhormhór na n-iarratas, ní mór duit an méid seo a leanas a chur ar fáil freisin:

• plean gnó ina leagtar amach an inmharthanacht airgeadais
• amlíne tháscach an tionscadail
• doiciméid tacaíochta

D’iarratas a chur isteach

Chun d’iarratas a chur isteach, ní mór duit cuntas EU Login a chruthú ar dtús agus an fhoirm iarratais ar líne atá le fáil ar leathanach gréasáin an Choimisiúin maidir le tionscadail straitéiseacha ghlan-nialasachta a líonadh isteach.

Nuair a bheidh an t-iarratas réidh, is féidir leat é a chur isteach trí ardán slán an Choimisiúin chuig an tír ábhartha den Aontas lena mheasúnú.

Fanacht ar an measúnú

• Déanfar d’iarratas a sheiceáil ar dtús le haghaidh iomláine
• Déanfaidh an Ballstát ina mbeidh an tionscadal lonnaithe measúnú ar an iarratas
• Ba cheart go bhfaighfeá cinneadh laistigh d’aon mhí amháin tar éis dóibh a mheas go bhfuil d’iarratas iomlán

Mura nglactar le d’iarratas

Mura nglactar le d’iarratas, féadfaidh tú a iarraidh ar an gCoimisiún Eorpach measúnú a dhéanamh ar an tionscadal. Ní thagann measúnú an Choimisiúin in ionad chinneadh an Bhallstáit ach d’fhéadfadh sé treoir nó tacaíocht bhreise a chur ar fáil.

Tá tuilleadh eolais, foirmeacha iarratais agus treoraíocht le fáil ar leathanach gréasáin an Choimisiúin maidir le tionscadail straitéiseacha ghlan-nialasachta.

Nós imeachta simplithe

D’fhéadfadh roinnt tionscadal a bheith incháilithe le haghaidh nós imeachta simplithe. D’fhéadfadh feidhm a bheith aige sin i gcás ina ndearnadh measúnú ar thionscadal cheana féin faoi chláir mhaoiniúcháin nó tionscnaimh straitéiseacha áirithe de chuid an Aontais. D’fhéadfadh feidhm a bheith aige sin freisin maidir le tionscadail áirithe mhonaraíochta teicneolaíochta ghlan-nialasachta atá lonnaithe i réigiúin bheagfhorbartha nó i réigiúin trasdula.

In ionad an pacáiste iomlán iarratais a chur isteach, féadfaidh tú foirm iarratais i scríbhinn a chur isteach tríd an gcóras iarratais céanna de chuid an Aontais.

D’fhéadfadh tionscadail a fhaigheann tacaíocht ó na foinsí seo a leanas a bheith i measc na samplaí:

• an Ciste don Nuálaíocht
• Tionscadal Thábhachtacha ar mhaithe le Leas na hEorpa i gCoitinne (IPCEI).
• An Banc Eorpach Hidrigine en
• An Ciste um Aistriú Cóir
• tionscnaimh thionsclaíocha nó teicneolaíochta glaine incháilithe eile de chuid an Aontais

Tá tuilleadh eolais, foirmeacha iarratais agus treoraíocht le fáil ar leathanach gréasáin an Choimisiúin maidir le tionscadail straitéiseacha ghlan-nialasachta.

Maoiniú agus tacaíocht

Baineann tionscadail ghlan-nialasachta tairbhe as raon leathan beart cistiúcháin, maoiniúcháin agus tacaíochta ar féidir teacht orthu tríd an Treoraí Glan-Nialasachta.

Cuidíonn an uirlis sin leat na nithe seo a leanas a aithint:

• foinsí cistiúcháin ábhartha de chuid an Aontais agus foinsí cistiúcháin ábhartha náisiúnta
• seirbhísí comhairleacha
• tacaíocht forbartha tionscadail