"Fl-Unjoni Ewropea, qed insawru l-ideali komuni tagħna f'realtà", tgħid id-dikjarazzjoni ta' Berlin, iffirmata mill-mexxejja miġbura f'Berlin għall-50 anniversarju mit-Trattat ta' Ruma. Hija viżjoni għall-UE li terġa' tasserixxi valuri komuni u tħares lejn l-ambizzjonijiet għall-ġejjieni.
Il-valuri komuni tar-rispett għall-individwu, it-tolleranza, is-solidarjetà u l-opportunitajiet ugwali qed jiġu affermati mill-ġdid fid-dikjarazzjoni ta' Berlin adottata fil-25 ta' Marzu. Is-sehem tas-suq komuni u ta' l-euro huma rikonoxxuti wkoll għax jippermettu lill-unjoni toħloq rabtiet ekonomiċi u jżommuha kompetittiva fil-kuntest tal-globalizzazzjoni.
Skond id-dikjarazzjoni, il-mudell Ewropew jgħaqqad is-suċċess ekonomiku mar-responsabbiltà soċjali, u juri l-kuntrast bejn il-gwerra u d-diviżjoni ta' qabel ma eżistiet l-UE, ma' l-istabbiltà u t-tkabbir ekonomiku li jgawdu ċ-ċittadini tagħha fil-preżent.
Barroso, il-President tal-Kummissjoni faħħar dak li kisbet l-UE f'dawn l-aħħar 50 sena: "Paċi, libertà u prosperità lill-hinn mill-ħolm saħansitra ta' l-aktar missier fundatur ottimist ta' l-Ewropa."
Imma m'hemmx lok għall-għażż - l-unjoni trid tevolvi maż-żminijiet, b'tiġdid kostanti tal-qagħda politika Ewropea. "Li nieqfu jkun ifisser li qed naqgħu lura", qalet il-Kanċillier Ġermaniż Angela Merkel.
Dwar is-suġġett jaħraq tal-kostituzzjoni għall-Ewropa, id-dikjarazzjoni hija kawta: "ninsabu magħqudin fl-għan tagħna li nqiegħdu lill-Unjoni Ewropea fuq bażi komuni mġedda qabel l-elezzjonijiet għall-Parlament Ewropew fl-2009."
"Ikun meta jkollna il-ħila ngħaqqdu l-forzi tagħna, li aħna l-Ewropej ikollna l-potenzjal sħiħ li negħlbu l-isfidi ewlenin ġodda u nħarsu lejn l-anniversarji tal-futur bil-kunfidenza", qalet Angela Merkel.
Aqra d-dikjarazzjoni 
[64 KB] 
shiha.
Segwi l-konferenza stampa
Siltiet iffilmjati 
(04:35) mid-dikjarazzjoni
