L-użu tal-mowbajls mit-tfal u ż-żgħażagħ żdied bil-kbir fl-aħħar snin. Fil-Ġermanja, iċ-ċifri għall-2005 juru li 92% ta' dawk li għandhom bejn it-12 u d-19-il sena u 47% ta' dawk bejn is-6 u t-13-il sena kellhom mowbajl. Imma filwaqt li l-mowbajls għandhom bosta benefiċċji, qed joħorġu wkoll riskji ġodda.
Stħarriġ li sar fir-Renju Unit skopra li 14% tat-tfal sfaw il-mira ta' bullying permezz tal-mowbajl tagħhom - 10% minn dawk li rrispondew qalu li ttieħdulhom xi rittratti xejn gradevoli u 17% beżgħu li dawn ir-ritratti tqiegħdu fuq l-internet jew intbagħtu lil ħaddieħor.
Huwa ċar li n-nies jeħtieġu jkunu aktar konxji tal-kwistjonijiet li jirrigwardjaw is-sigurtà fl-użu ta' l-internet u tal-mowbajls, fatt enfassizzat riċentament mill-UE f'konsulta pubblika dwar is-sigurtà tat-tfal. Il-kampanja għall-internet akar sikur għandha l-għan li twieġeb għal din il-ħtieġa u tispera li tilħaq il-ġenituri, carers u għalliema, kif ukoll lit-tfal infushom.
Il-qofol tal-jum ikunu r-riżultati ta' kompetizzjoni biex jinħoloq materjal dwar is-sigurtà fuq l-internet li jinfirex waqt blog maratona dinjija. Il-kompetizzjoni tinvolvi 'l fuq minn 200 skola f'29 pajjiż, kollha akkoppjati biex joħolqu materjal dwar is-sigurtà rigward waħda minn tliet temiet - il-privatezza onlajn, l-hekk imsejjaħ netiquette u l-potenzjal ta' l-istampi.
Il-jum iddedikat għas-sigurtà fuq l-internet huwa avveniment annwali organizzat minn-netwerk Ewropea għas-sigurtà fuq l-internet 
INSAF, imwaqqfa konġuntament mill-programm dwar is-sigurtà fuq l-internet ta' l-UE u appoġġjata mill-Kummissarju ta' l-UE għall-midja Viviane Reding.
