Viżjonijiet ta' l-Ewropa

X'taf dwar l-"Ewropej il-ġodda" li dan l-aħħar issieħbu ma' l-UE? Vjaġġ permezz ta' esibizzjoni ta' ritratti  li turi l-ħajja, it-tradizzjonijiet, il-kwalitajiet u l-paradossi tagħhom mil-lenti ta' wieħed mill-aktar fotografi famużi mill-aġenzija rinomata Magnum Photos. Wara Pariġi, Milan, Budapest u Varsavja, issa jmiss li l-esebizzjoni "Ewro-Viżjonijiet" iżżur Brussell.

Fi Brussell ukoll, l-esebizzjoni avant-garde Viżjoni għal Brussell  tippreżenta proġett arkitettoniku għall-belt kapitali ta' l-Ewropa minn tim ta' arkitetti internazzjonali. Il-proġett ambizzjuż jipproponi t-tfassil mill-ġdid ta' serje ta' bini simboliku, li jinkludi l-Parlament Ewropew u l-kwartieri ġenerali tal-Kummissjoni, sabiex iwassal l-istituzzjonijiet ta' l-UE aktar viċin taċ-ċittadini.

'Il fuq minn 40 ritratt enormi ta' wħud mill-aktar nisa viżjonarji Ewropej mill-oqsma tal-kultura, ix-xjenza, l-ekonomija u l-politika, jinsabu fl-atriju ta' l-ispazju għall-wirjiet tal-Brussels Tour & Taxi. Matul il-vjaġġi tagħha tul tliet snin, il-fotografu Bettina Flitnet iltaqgħet ma' kważi 70 mara li f'pajjiżhom saru mudelli għall-oħrajn. Dawn jinkludu l-Kanċillier Ġermaniż Angela Merkel, il-kittieba ta' stejjer kriminali Liza Marklund u l-avukatessa Taljana Ilda Bocassini, simbolu tal-ġlieda kontra l-mafja.

‘Eurocircus’ feġġ f'Palermo bejn it-30-31 ta' Marzu. Il-qalb tal-belt saret palk għal numru ta' wirijiet interattivi u għadd ta' shows li rawhom aktar minn 60,000 persuna. Dan l-avveniment indirizza wħud mill-kwistjonijiet jaħarqu mill-ħajja ta' kuljum ta' l-Ewropej, li jinkludu d-drittijiet taċ-ċittadini u l-impatt tal-liġijiet ta' l-UE.

Inħarsu lura lejn il-passat tagħna mill-perspettiva ta' l-istampa, il-Litwanja , id- Danimarka u l-Belġju ospitaw tliet "wirjiet ta' gazzetti" mhux konvenzjonali. Dawn il-gazzetti ewlenin ta' kuljum offrew perspettiva oriġinali ta' l-avvenimenti li sawru lill-Ewropa bejn l-1957 u l-2007.