Jum ir-Rebbiegħa għall-Ewropa huwa inizjattiva mmirata biex tħeġġeġ id-dibattitu, id-diskussjoni u r-riflessjoni fost l-istudenti tal-primarja u tas-sekondarja, dwar il-prinċipji, il-kisbiet u l-futur ta' l-UE. It-tema għal din is-sena se tkun "Flimkien mill-1957: l-iskejjel jiċċelebraw l-Ewropa"..
Jum ir-Rebbiegħa għall-Ewropa huwa opportunità unika sabiex it-tfal u ż-żgħażagħ jitgħallmu dwar kwistjonijiet Ewropej filwaqt li jsemmgħu leħenhom billi jaqsmu l-viżjoni Ewropea tagħhom ma' esperti u personalitajiet ta' l-UE.
L-edizzjoni ta' Jum ir-Rebbiegħa ta' din is-sena, li tibni fuq is-suċċess tas-snin l-imgħoddija, se tittella' mis-26 ta' Marzu - biex tiċċelebra l-50 anniversarju mit-Trattat ta' Ruma - sat-30 ta' Ġunju, b'attenzjoni speċjali fuq id-9 ta' Mejju, Jum l-Ewropa.
Fl-iskejjel madwar l-Ewropa kollha jittellgħu għadd ta' avvenimenti bħal dibattiti u laqgħat ma' l-esperti (personalitajiet ta' l-UE, awtoritajiet lokali, eċċ.), dibattiti onlajn , chats bejn tfal ta' l-iskola minn pajjiżi u reġjuni differenti, Jiem l-Ewropa, fieri Ewropej, eċċ. L-iskejjel huma mistiedna jipparteċipaw bil-mod li jixitiequ huma u skond ir-riżorsi tagħhom.
Is-sit web ta' Jum ir-Rebbiegħa għall-Ewropa se jipprovdi ideat u suġġerimenti lill-għalliema u l-istudenti dwar x'avveniment jistgħu jorganizzaw fl-iskola tagħhom, flimkien ma' ġabra ta' riżorsi pedagoġiċi.
