Kif nista’ nsib impjieg f’pajjiż Ewropew ieħor? It-titjira tiegħi ġiet ikkanċellata - x'inhuma drittijieti? Liema għotjiet tal-UE tista' tapplika għalihom l-organizzazzjoni tiegħi? Huwa sigur li tixtri minn fuq l-internet f’pajjiż ieħor tal-UE? Hemm xi regoli tal-UE li jiggarantixxu l-kwalità tal-ikel tagħna?

Dawn huma xi mistoqsijiet tipiċi li n-nies għandhom dwar l-UE. Aħna nistgħu nweġbuhom.

Skeda informattiva: Iċ-Ċentru ta’ Kuntatt Europe Direct, in-numru tat-telefown uniku Ewropew għaċ-ċittadini. (523.73 KB)

X'nagħmlu

Il-Kummissjoni Ewropea tmexxi ċ-Ċentru ta’ Kuntatt tal-Europe Direct. Aħna nwieġbu kwalunkwe mistoqsija mill-pubbliku dwar l-Unjoni Ewropea, permezz tat-telefown jew l-email. L-istaff tagħna jinkludi kelliema nattivi tal-24 lingwa uffiċjali tal-UE.

Nistgħu

• nagħtuk tweġiba immedjata għall-mistoqsijiet ġenerali dwar l-UE
• ngħinuk tinnaviga fuq il-paġni web ippubblikati mill-istituzzjonijiet tal-UE
• issib informazzjoni aktar speċjalizzata. Jekk meħtieġ, nistaqsu espert fil-Kummissjoni Ewropea f’ismek
• nagħtuk id-dettalji ta’ kuntatt għall-aħjar sorsi ta’ aktar informazzjoni u pariri
• nagħtuk informazzjoni li hija fattwalment korretta u aġġornata, skont l-istandards tas-servizz pubbliku ċivili. Madankollu, it-tweġibiet tagħna qatt ma jkunu legalment vinkolanti.

X'ma nistgħux nagħmlu

Sfortunatament, il-Europe Direct ma tistax tagħmel kwalunkwe waħda minn dawn li ġejjin:

• tirreġistra jew tibgħat ilmenti/problemi (iżda nistgħu ngħidulek lil min għandek tikkuntattja)
• tikkummenta dwar il-politiki tal-UE
• tagħti parir legali jew tinterpreta l-liġijiet tal-UE għalik
• tittratta dwar kwalunkwe kwistjoni li mhijiex fil-kompetenza tal-UE
• tgħin biex l-opinjonijiet politiċi tiegħek dwar il-kwistjonijiet tal-UE isiru magħrufa. Madankollu, tista’ tikkummenta dwar proposti speċifiċi tal-UE f’dan is-sit web jew tista’ ssegwina u tikkummenta fuq il-midja soċjali. Tista’ wkoll tinfluwenza l-politika tal-UE permezz tad-dibattitu politiku pubbliku mar-rappreżentanti eletti tiegħek fil-livell nazzjonali u Ewropew.

Kif tuża Europe Direct

Is-servizzi tagħna huma bla ħlas. Tista’ ċċempel minn fejn trid fl-UE, b’xejn fuq 00 800 6 7 8 9 10 11. Fi ftit każijiet, xi teleoperaturi ma jippermettux aċċess jew ħlas għal dan. Huwa għalhekk li tista’ taqbadna wkoll permezz tan-numri alternattivi f’kull pajjiż.

Tista’ tikteb jew iċċemplilna minn kull post fid-dinja. Jekk iċċempel minn barra l-UE, inti tħallas ir-rata standard tan-network. Tista’ wkoll tagħmel telefonati bl-internet.

Barra mis-sigħat tal-ftuħ tagħna – jiem tax-xogħol mid-9 a.m. sas-6 p.m. Ħin tal-Ewropa Ċentrali – tista’ tħalli messaġġ, jew titlobna biex inċemplulek fuq din il-formola.

Għall-mistoqsijiet bil-miktub, normalment aħna nwieġbu fi żmien tlitt ijiem Mistoqsijiet aktar kumplessi jistgħu jdumu aktar biex jitwieġbu. Bħala medja, inwieġbu t-telefonati fi żmien 15-il sekonda.

L-Ewropa Tiegħek

Tista’ ssib aktar tagħrif dwar id-drittijiet prattiċi tiegħek skont il-liġi tal-UE u f’xi każijiet, tikseb parir legali dwar kif japplikaw – mingħand l-Ewropa Tiegħek.