L-istituzzjonijiet u l-korpi tal-UE fil-qosor

• Il-Parlament Ewropew
• Il-Kunsill Ewropew
• Il-Kunsill tal-Unjoni Ewropea
• Il-Kummissjoni Ewropea
• Il-Qorti tal-Ġustizzja tal-Unjoni Ewropea (QtĠ-UE)
• Il-Bank Ċentrali Ewropew (BĊE)
• Il-Qorti Ewropea tal-Awdituri (QEA)
• Is-Servizz Ewropew għall-Azzjoni Esterna (SEAE)
• Il-Kumitat Ekonomiku u Soċjali Ewropew (KESE)
• il-Kumitat Ewropew tar-Reġjuni (KtR)
• Il-Bank Ewropew tal-Investiment (BEI)
• L-Ombudsman Ewropew
• Kontrollur Ewropew għall-Protezzjoni tad-Data (KEPD)
• Il-Bord Ewropew għall-Protezzjoni tad-Data (EDPB)
• Korpi Interistituzzjonali

Sistema istituzzjonali unika

Fl-istruttura istituzzjonali unika tal-UE:

• il-prijoritajiet wisgħin tal-UE huma stabbiliti mill-Kunsill Ewropew, li jgħaqqad flimkien lill-mexxejja nazzjonali fil-livell tal-UE
• Membri Parlamentari Ewropej eletti direttament jirrappreżentaw liċ-ċittadini Ewropej fil-Parlament Ewropew
• l-interess tal-UE kollha huma promossi mill-Kummissjoni Ewropea, li l-membri tagħha jinħatru mill-gvernijiet nazzjonali
• il-gvernijiet jiddefendu l-interessi nazzjonali ta' pajjiżhom fil-Kunsill tal-Unjoni Ewropea.

Twaqqif tal-aġenda

Il-Kunsill Ewropew jistabbilixxi d-direzzjoni politika ġenerali tal-UE – iżda m'għandux setgħat biex jgħaddi l-liġijiet. Immexxi mill-President tiegħu – bħalissa Charles Michel – u magħmul mill-kapijiet nazzjonali ta' stat jew gvern u l-President tal-Kummissjoni, jiltaqa' għal ftit jiem tal-anqas darbtejn kull 6 xhur.

Tfassil tal-liġijiet

Hemm 3 istituzzjonijiet ewlenin involuti fil-leġiżlazzjoni tal-UE:

• il-Parlament Ewropew, li jirrappreżenta ċ-ċittadini tal-UE u li hu direttament elett minnhom;
• il-Kunsill tal-Unjoni Ewropea, li jirrappreżenta l-gvernijiet tal-istati membri individwali; Il-Presidenza tal-Kunsill tinqasam bejn l-istati membri fuq bażi ta' rotazzjoni.
• il-Kummissjoni Ewropea, li tirrappreżenta l-interessi ġenerali tal-Unjoni.

Ilkoll flimkien, dawn it-tliet istituzzjonijiet, permezz tal- "Proċedura Leġiżlattiva Ordinarja", jipproduċu l-politiki u l-liġijiet li japplikaw fl-UE. Fil-prinċipju, il-Kummissjoni tipproponi liġijiet ġodda, u l-Parlament u l-Kunsill jadottawhom. Il-Kummissjoni u l-pajjiżi membri mbagħad jimplimentawhom, u l-Kummissjoni tiżgura li l-liġijiet jiġu applikati u implimentati b'mod tajjeb.

Teħid tad-deċiżjonijiet fl-UE – aktar tagħrif dwar il-proċeduri tat-tfassil tal-liġijiet

Lista ta' Presidenzi tal-Kunsill tal-UE – 2014-2020

Istituzzjonijiet u korpi oħra tal-UE

Żewġ istituzzjonijiet oħra għandhom rwol kruċjali:

• il-Qorti tal-Ġustizzja tinforza d-dritt tal-liġi Ewropea
• il-Qorti tal-Awdituri tivverifika l-finanzjament tal-attivitajiet tal-UE.

Is-setgħat u r-responsabbiltajiet ta’ dawn l-istituzzjonijiet huma stabbiliti fit-Trattati, li huma l-bażi ta' dak kollu li tagħmel l-UE. Dawn jistabbilixxu wkoll ir-regoli u l-proċeduri li għandhom isegwu l-istituzzjonijiet tal-UE. It-Trattati jaqblu dwarhom il-Presidenti u/jew il-Prim Ministri tal-pajjiżi kollha tal-UE, u huma ratifikati mill-parlamenti tagħhom.

L-UE għandha għadd ieħor ta' istituzzjonijiet u ta' entitajiet interistituzzjonali li għandhom rwoli speċjalizzati:

• is-Servizz Ewropew għall-Azzjoni Esterna (SEAE) jjassisti lir-Rappreżentant Għoli tal-Unjoni għall-Affarijiet Esterni u ta' Politika tas-Sigurtà, bħalissa Josep Borrell. Jippresiedi l-Kunsill Affarijiet Esterni u jmexxi l-politika esterna u ta' sigurtà komuni, u jiżgura wkoll il-konsistenza u l-koordinazzjoni tal-azzjoni esterna tal-UE.
• il-Bank Ċentrali Ewropew huwa responsabbli għall-politika monetarja Ewropea
• il-Kumitat Soċjali u Ekonomiku Ewropew jirrappreżenta s-soċjetà ċivili, lil min jimpjega u l-impjegati
• il-Kumitat Ewropew tar-Reġjuni jirrappreżenta l-awtoritajiet reġjonali u lokali
• il-Bank Ewropew għall-Investiment jiffinanzja proġetti ta’ investiment tal-UE, u jgħin in-negozji ż-żgħar permezz tal- Fond ta’ Investiment Ewropew
• l-Ombudsman Ewropew jinvestiga l-ilmenti dwar tmexxija ħazina mill-istituzzjonijiet u l-entitajiet tal-UE.
• il-Kontrollur tal-Protezzjoni tad-Dejta jissalvagwardja l-privatezza tad-dejta personali tan-nies
• l-Uffiċċju għall-Pubblikazzjonijiet jippubblika l-informazzjoni dwar l-UE
• l-Uffiċċju Ewropew għall-Għażla tal-Persunal jimpjega l-istaff għall-istituzzjonijiet tal-UE u entitajiet oħra
• l-Iskola Amministrattiva Ewropea għandha l-kompitu li tipprovdi taħriġ f'oqsma speċifiċi għal membri tal-istaff tal-UE
• għadd ta' aġenziji speċjalizzati u entitajiet deċentralizzati jwettqu firxa ta' kompiti tekniċi, xjentifiċi jew maniġerjali