Il-Parlament Ewropew
Il-Parlament Ewropew
Ħarsa ġenerali
- Rwol: Korp tal-UE elett b’mod dirett b'responsabilitajiet leġiżlattivi, superviżorji u baġitarji
- Membri: 751 MPE (Membri tal-Parlament Ewropew)
- President: Antonio Tajani
- Stabbilit : fl-1952 bħala l-Assemblea Komuni tal-Komunità Ewropea tal-Faħam u l-Azzar, fl-1962 bħala Parlament Ewropew, l-ewwel elezzjonijiet diretti fl-1979
- Lokalitajiet: Strasburgu (Franza), Brussell (il-Belġju), il-Lussemburgu
- Sit web: Parlament Ewropew
Il-Parlament Ewropew hu l-korp tal-UE fejn jitfasslu l-liġijiet. Hu elett direttament mill-votanti tal-UE kull 5 snin. L-aħħar elezzjonijiet saru f’Mejju 2014.
X’jagħmel il-Parlament?
Il-Parlament għandu tliet rwoli prinċipali:
Rwol leġiżlattiv
- Jgħaddi l-liġijiet tal-UE, flimkien mal-Kunsill tal-UE, abbażi ta' proposti mill-Kummissjoni Ewropea.
- Jiddeċiedi dwar ftehimiet internazzjonali
- Jiddeċiedi dwar it-tkabbir
- Jeżamina mill-ġdid il-programm ta' ħidma tal-Kummissjoni u jitlobha biex tipproponi leġiżlazzjoni
Rwol superviżjorju
- Iwettaq skrutinju demokratiku tal-istituzzjonijiet kollha tal-UE
- Itella' l-President tal-Kummissjoni u japprova l-Kummissjoni bħala korp wieħed. Hemm il-possibbiltà ta’ votazzjoni ta’ mozzjoni ta’ ċensura, li tobbliga lill-Kummissjoni sabiex din tirriżenja
- Jagħti kwittanza, jiġifieri japprova l-mod li bih jintefqu l-baġits tal-UE
- Jeżamina l-petizzjonijiet taċ-ċittadini u jwaqqaf l-inkjesti
- Jiddiskuti l-politika monetarja mal-Bank Ċentrali Ewropew
- Ipoġġi mistoqsijiet lill-Kummissjoni u lill-Kunsill
- Iwettaq osservazzjonijiet tal-elezzjonijiet
Rwol Baġitarju
- Jistabbilixxi l-baġit tal-UE, flimkien mal-Kunsill
- Japprova l-baġit fit-tul tal-UE, il-“Qafas Finanzjarju Pluriennali”
L-ABĊ tal-Parlament Ewropew
L-MEPs huma l-vuċi ta' aktar minn 500 miljun Ewropew fil-livell tal-UE, iżda dawn kif jaħdmu u kif jorganizzaw lilhom infushom fil-Parlament Ewropew?
L-ABĊ tal-istituzzjonijiet tal-UE
X'jagħmel il-Parlament u x'inhuma r-responsabbiltajiet tal-Kummissjoni? X'nifhmu bil-Kunsill Ewropew u kif inhu differenti mill-Kunsill tal-Unjoni Ewropea?
Kompożizzjoni
L-għadd ta' MPE għal kull pajjiż hu bejn wieħed u ieħor proporzjonali mal-popolazzjoni tiegħu, iżda dan isir permezz ta' proporzjonalità digressiva: ebda pajjiż ma jista’ jkollu inqas minn 6 jew iżjed minn 96 MPE u l-għadd totali ma jistax jaqbeż is-751 (750 u l-President). Il-MPE huma miġbura skont l-affiljazzjoni politika, u mhux skont in-nazzjonalità.
Il-President jirrappreżenta l-Parlament mal-istituzzjonijiet l-oħra tal-UE u mad-dinja ta' barra u jagħti l-approvazzjoni finali għall-baġit tal-UE.
Kif jaħdem il-Parlament?
Ix-xogħol tal-Parlament huwa maqsum f’żewġ stadji ewlenin:
- Il- Kumitati - biex jippreparaw il-leġiżlazzjoni.
Fil-Parlament hemm 20 kumitat u żewġ sottokumitati, kull wieħed jittratta ma' qasam ta' politika partikolari. Il-kumitati jeżaminaw proposti għal-leġiżlazzjoni, u l-MPE u l-gruppi politiċi jistgħu jressqu emendi jew jipproponu r-rifjut ta' proposta. Dawn il-kwistjonijiet huma wkoll diskussi fi ħdan il-gruppi politiċi. - Is- Sessjonijiet plenarji - biex jgħaddu l-leġiżlazzjoni
Dan huwa meta jinġabru l-MPE kollha fil-Kamra biex jagħtu vot finali dwar il-leġiżlazzjoni proposta u l-emendi proposti. Normalment isiru fi Strasburgu għal erbat ijiem fix-xahar, iżda xi drabi jkun hemm sessjonijiet addizzjonali fi Brussell.
Il-Parlament u int
Jekk tixtieq tistaqsi lill-Parlament biex jaġixxi dwar xi kwistjoni, tista' tibgħat petizzjoni dwarha (jew bil-posta jew onlajn)
Il-petizzjonijiet jistgħu jkopru kwalunkwe suġġett li jaqa' taħt il-kompetenza tal-UE.
Biex tressaq petizzjoni, trid tkun ċittadin ta’ Stat Membru tal-UE jew tkun resident fl-UE. Kumpaniji jew organizzazzjonijiet oħra jridu jkunu bbażati hawnhekk.
Modi oħra kif tikkuntattja lill-Parlament jinkludu l-kuntatt mal-MPE lokali tiegħek jew mal-Uffiċċju tal-Informazzjoni tal-Parlament Ewropew f'pajjiżek.
European Parliament
Għandek xi mistoqsijiet dwar il-Parlament? Qatt kellek aptit tirrifletti fuq kwistjonijiet tal-UE f'dibattiti? Kull Stat Membru għandu Uffiċċju tal-Informazzjoni lest biex jinvolvik.
Il-Parlament Ewropew, (Brussell)
Dettalji ta' kuntatt
Rue Wiertz/Wiertzstraat 60
B-1047 Bruxelles/Brussel
Belgique/België
Il-Parlament Ewropew huwa l-qalba tad-demokrazija fl-Unjoni Ewropea, u jirrappreżenta 500 miljun ruħ. Żjara fil-kampus ta' Brussell tispjega kif jaħdem il-Parlament Ewropew u x’jagħmel għaċ-ċittadini tal-Unjoni Ewropea.
Tip ta’ żjara: Hemm ħafna attivitajiet tal-Parlament Ewropew, bħal żjarat individwali u fi gruppi, sessjonijiet ta’ informazzjoni u logħba ta’ role play għal gruppi tal-iskola.
L-attivitajiet kollha huma bla ħlas u l-biċċa l-kbira minnhom huma disponibbli bil-lingwi uffiċjali Ewropej kollha.
Attivitajiet u postijiet li tista' żżur jinkludu:
- il-punt ta' informazzjoni u ta’ merħba ta' Station Europe
- is-sala tad-dibattiti tal-Emiċiklu
- dwar iċ-ċentru Parlamentarium tal-viżitaturi
- Il-mużew Dar l-Istorja Ewropea (minn Mejju 2017)
- il-membri tal-Parlament Ewropew logħba ta' role play.
Daqs tal-grupp: Individwi u gruppi, ara l-paġni web tal-attività.
Rekwiżit ta' riżervazzjoni bil-quddiem: Għal uħud mill-attivitajiet jeħtieġ li tibbukkja minn qabel, ara l-paġni web tal-attività għad-dettalji.
Età minima tal-viżitaturi: Ir-restrizzjonijiet ta' età jvarjaw, ara l-paġni web tal-attività.
Il-Parlament Ewropew (il-Lussemburgu)
Plateau du Kirchberg
B.P. 1601
L-2929 Luxembourg
Fil-Parlament Ewropew fil-Lussemburgu nsibu l-ewwel sala għad-dibattitu Emiċiklu. Il-kampus tal-Lussemburgu jintuża primarjament għal xogħol amministrattiv iżda huwa possibbli wkoll li żżuru.
Tip ta’ żjara: Sessjonijiet ta’ informazzjoni dwar il-Parlament Ewropew u l-istituzzjonijiet Ewropej, kif ukoll żjarat fl-Emiċiklu oriġinali. Iż-żjarat huma kollha bla ħlas.
Daqs tal-grupp: Gruppi biss ta' bejn 20 u 50 persuna.
Rekwiżit ta' riżervazzjoni bil-quddiem: Jekk jogħġbok irriżerva mill-inqas 8 ġimgħat bil-quddiem.
Età minima tal-viżitaturi: 14-il sena.
Il-Parlament Ewropew (Strasburgu)
1, avenue du Président Robert Schuman
CS 91024
F-67070 Strasbourg Cedex
Fi Strasburgu tinsab is-sede uffiċjali tal-Parlament Ewropew.
Tip ta’ żjara: sessjonijiet ta’ informazzjoni, u programmi edukattivi sħaħ jiġu offruti fi Strasburgu. Dawn huma:
- żjarat tal-Emiċiklu għall-individwi u l-gruppi meta jiltaqa' l-Parlament Ewropew;
- il-programm Euroscola fejn l-istudenti ta’ bejn 18 u 16-il sena u l-għalliema tagħhom jiskopru xi jfisser li tkun Membru tal-Parlament Ewropew għal ġurnata.
Daqs tal-grupp: il-gruppi għandhom ikunu bejn 15 u 50 persuna (gruppi akbar jistgħu jintlaqgħu fuq talba).
Rekwiżit ta' riżervazzjoni bil-quddiem: jekk jogħġbok irriżerva mill-inqas 12-il ġimgħa bil-quddiem.
Età minima tal-viżitaturi: 14-il sena: