Caitheann an AE tuairim is 6% dá bhuiséad bliantúil ar fhoireann, ar riarachán agus ar chothabháil fhoirgnimh an AE.

Foireann

Tá an Coimisiún Eorpach roinnte i ranna ar a dtugtar Ard-stiúrthóireachtaí (A-Snna), arb ionann iad agus aireachtaí, nó geall leis. Cumhdaíonn gach ceann díobh réimse beartais nó seirbhís ar leith, ar nós na trádála nó an chomhshaoil, agus é faoi cheannas Ard-Stiúrthóra a thuairiscíonn don Choimisinéir. Fostaíonn an Coimisiún Eorpach tuairim is 32 000 duine.

I bParlaimint na hEorpa tá tuairim agus 7 500 duine ag obair san ardrúnaíocht agus sna grúpaí polaitiúla. In éineacht leo tá Feisirí na Parlaiminte agus foireann na bhFeisirí. I gComhairle an Aontais Eorpaigh, oibríonn tuairim is 3 500 duine sa rúnaíocht ghinearálta.

Teangacha

Thart ar 4300 aistritheoir agus 800 ateangaire atá fostaithe ar buanchonradh ag institiúidí an Aontais Eorpaigh. Is ionann costas measta na seirbhísí teanga go léir (aistriúchán agus ateangaireacht) i ngach ceann d'institiúidí an Aontais Eorpaigh agus níos lú ná 1% de bhuiséad ginearálta bliantúil an Aontais Eorpaigh. Má roinntear an costas sin ar dhaonra an Aontais, is ionann sin agus thart ar €2 in aghaidh an duine in aghaidh na bliana.

Suímh

Sa Bhruiséil atá foirgnimh na Comhairle, ina dtionóltar formhór a cuid cruinnithe. Anois is arís, tionóltar cruinnithe ag Comhairle an Aontais Eorpaigh i Lucsamburg. Sa Bhruiséil a thionóltar cruinnithe idir na ceannairí stáit agus rialtais – an Chomhairle Eorpach.