X’jista’ jagħmel għalik il-EURES?

Tista’ tmur tgħix fi kwalunkwe pajjiż fl-UE, l-Iżvizzera, l-Iżlanda, il-Liechtenstein, in-Norveġja u r-Renju Unit biex tieħu impjieg bis-saħħa ta’ wieħed mid-drittijiet l-aktar importanti taċ-ċittadini tal-UE: il-moviment liberu tal-ħaddiema.

Il-EURES jgħin u jappoġġja lil dawk li qed ifittxu impjieg biex isibu impjiegi u lill-impjegaturi biex isibu kandidati xierqa fl-Ewropa kollha.

Hemm disponibbli firxa wiesgħa ta’ servizzi ta’ appoġġ fuq il-portal tal-EURES u permezz ta’ aktar minn elf Konsulent tal-EURES li jaħdmu fl-organizzazzjonijiet Membri u Sħab tal-EURES.

Is-servizzi tal-EURES għall-persuni li qed ifittxu impjieg u għall-impjegaturi jinkludu:

• Tqabbil tal-postijiet tax-xogħol battala u tas-CVs fuq il-portal tal-EURES;
• Informazzjoni, gwida u servizzi oħrajn ta’ appoġġ għall-ħaddiema u għall-impjegaturi;
• Informazzjoni dwar il-kundizzjonijiet tal-għajxien u tax-xogħol fil-pajjiżi tal-EURES;
• Servizzi ta’ appoġġ speċifiċi għall-ħaddiema fruntalieri u għall-impjegaturi f’reġjuni transfruntieri;
• Offerti ta’ xogħol personalizzati għal passi speċifiċi dwar il-karriera tiegħek bħal L-ewwel Impjieg EURES tiegħek u Reactivate;
• Opportunità biex tiltaqa’ ma’ impjegaturi u impjegati futuri tiegħek permezz ta’ pjattaforma Jiem l-Impjiegi Ewropej (Online); kif ukoll
• Assistenza wara li tikseb impjieg bħal taħriġ fil-lingwa u appoġġ b’integrazzjoni fil-pajjiż ta’ destinazzjoni.

Żur il-portal tal-EURES biex titgħallem aktar dwar is-servizzi disponibbli għalik. Sib id-dettalji ta’ kuntatt tal-Membri u tas-Sħab tal-EURES fuq EURES f’pajjiżek jew ikkuntattja Konsulent tal-EURES b’mod dirett bit-telefown, bil-posta jew biċ-chat.