European Youth Portal

Information and opportunities for young people across Europe.

Skotvopnaleyfi og veiðikort
Skotvopnaleyfi og veiðikort

Skotvopnaleyfi og veiðikort

Til þess að öðlast skopvopnaleyfi þarf fólk að sitja námskeið á vegum Umhverfisstofnunar. Námskeiðin eru yfirleitt kennd 1-2 sinnum í mánuði. Þau kosta 20.000 krónur.

 

Hvað er skotvopnaleyfi?

Eins og nafnið gefur til kynna veitir skotvopnaleyfi fólki rétt til að eiga og meðhöndla haglabyssur og riffla. Það eitt og sér dugir þó ekki til að fara á veiðar, því einnig verður fólk að verða sér úti um veiðikort.
 

Hvernig fær fólk skotvopnaleyfi?

Til þess að öðlast skopvopnaleyfi þarf fólk að sitja námskeið á vegum Umhverfisstofnunar. Námskeiðin eru yfirleitt kennd 1-2 sinnum í mánuði. Þau kosta 20.000 krónur. Til að geta farið á veiðar þarf fólk þó einnig að sitja veiðikortanámskeið.
 

Hversu löng eru skotvopnanámskeiðin?

Skotvopnanámskeiðin taka þrjá daga. Þar af fara tveir dagar, eða átta tímar, í bóklega kennslu. Þessi bóklegi hluti námskeiðsins er yfirleitt kenndur á kvöldin. Auk þess þurfa nemendur að taka nokkra tíma í verklegum hluta, en sá hluti er iðulega kenndur um helgar.
 

Hverjir geta fengið skotvopnaleyfi?

Ákveðin skilyrði eru fyrir því að fólk geti fengið skotvopnaleyfi.
 
Umsækjendur þurfa að vera 20 ára eða eldri.
Þeir þurfa að hafa hreint sakavottorð.
Þeir þurfa að standast skotvopnaleyfisnámskeiðið.
Þeir þurfa að fá vottorð frá lækni.
Hvað kostar að fá skotvopnaleyfi?
Skotvopnaleyfisnámskeiðið eitt og sér kostar 20.000 krónur. Veiðikortsnámskeiðið kostar 11.000 krónur. Við þessa upphæð bætist svo kaup á byssum og árgjöld fyrir veiðikort, hafi fólk hug á að verða sér úti um slíkt.
 

Hvað eru veiðikortsnámskeið?

Veiðikortsnámskeiðin eru ætluð þeim sem hyggjast stunda veiðar á Íslandi. Til að stunda fugla-, refa-, minnka- og hreindýraveiðar þarf fólk að verða sér úti um veiðikort. Veiðikortsnámskeiðið tekur sex tíma, eða eina kvöldstund, og kostar það 11.000 krónur.
 
Þessi grein er unnin í samstarfi við Áttavitann