Mogħdija tan-navigazzjoni

FAQ - Taxxi

  • Il-kumpanija Franċiża li attwalment tħaddimni qed tissekondani fid-Danimarka. Fejn se jkolli nħallas it-taxxi?

    Probabbilment se jkollok tagħmel dan fi Franza. Aktarx tibqa' resident taxxabbli hemmhekk, jekk:

    • is-sekondar mhux aktar minn 6 xhur
    • is-salarju tiegħek ma jitħallasx jew ma jingħatax f'isem kumpanija li tinsab fid-Danimarka
    • is-salarju tiegħek ma jitħallasx minn uffiċċju jew negozju permanenti ieħor li jagħmel parti mill-proprjetà ta' min iħaddmek fid-Danimarka.

    Madankollu, jekk dawn it-3 kondizzjonijiet mhumiex sodisfatti, tista' titqies bħala taxxabbli fid-Danimarka – tal-anqas għad-dħul ta' flus li tkun daħħalt matul is-sekondar tiegħek.

    Jekk toqgħod għal aktar minn 6 xhur fid-Danimarka, teżisti l-possibbiltà li tista' titqies bħala resident taxxabbli hemmhekk. Iżda, skont il-biċċa l-kbira tal-ftehimiet dwar it-taxxa, int normalment tibqa' resident taxxabbli f'pajjiżek – jekk iżżomm ir-residenza permanenti tiegħek hemm u r-rabtiet personali u ekonomiċi tiegħek ma' dak il-pajjiż li fih huma aktar b'saħħithom.

    F'dak il-każ, id-Danimarka ma jkollhiex dritt li tintaxxalek id-dħul ta' flus minn madwar id-dinja. Skont il-biċċa l-kbira tal-ftehimiet dwar it-taxxa doppja, aktarx li jkun hemm regoli differenti jekk min iħaddmek hu entità pubblika, u dan hu aktar minnu jekk int uffiċċjal maċ-Ċivil, billi l-minimizzazzjoni tat-taxxa minn dawk li jħaddmu hi anqas problema f'ċirkostanzi ta' din ix-xorta.

    Fil-każijiet kollha, għal tweġiba definittiva ara l-ftehim rilevanti dwar it-taxxa bejn il-pajjiżi involuti (f'dan il-każ Franza u d-Danimarka), jew ikkuntattja lill-awtoritajiet nazzjonali.

    Aktar tagħrif dwar:

  • Ngħix u naħdem (għal rasi) f'pajjiż A u "ssekondajt" lili nnifsi f'pajjiż B għal perjodu ta' sena ta' proġett hemmhekk. Preżumibbilment nibqa' resident taxxabbli f'pajjiż A, jekk nibqa' kopert mis-sigurtà soċjali hemmhekk?

    LE — Normalment issir resident taxxabbli f'pajjiż B jekk toqgħod aktar minn 6 xhur f'sena fiskali.

    Teoretikament hu possibbli li dan mhux il-każ – l-istatus tiegħek għal finijiet tat-taxxa jiddependi mil-liġijiet nazzjonali tal-pajjiżi A u B, u kwalunkwe ftehim dwar it-taxxa doppja bejniethom – iżda n-norma hi li takkwista residenza taxxabbli fil-pajjiż fejn qed taħdem wara 6 xhur fih.

    Din mhix ħlief taqsira tal-aktar regoli komuni. Għal tweġiba definittiva, ara l-ftehim dwar it-taxxa rilevanti jew ikkuntattja lill-awtoritajiet tat-taxxa nazzjonali jew konsulent dwar l-impjiegi Ewropej.

    Aktar tagħrif dwar:

  • Xi jfisser is-sekondar f'pajjiż barrani?

    Arranġament li jippermettilek toffri servizzi f'pajjiż barrani mingħajr ma tibdel is-sistemi tat-taxxa jew tas-sigurtà soċjali. Dan maħsub biex jagħmilha eħfef għalik li taħdem barra pajjiżek għal perjodu limitat taż-żmien.

    L-aktar fatturi importanti meta tintbagħat taħdem f'pajjiż barrani huma:

    • is-sigurtà soċjali — tista' normalment tibqa' kopert mis-sistema ta' pajjiżek, għal perjodu massimu ta' sentejn.
    • it-taxxa — ma jeżistu ebda liġijiet applikabbli għall-Ewropa kollha li jistipulaw liema pajjiż jista' jintaxxak fuq id-dħul ta' flus meta tkun issekondat.

    Dan jista' jkun stipulat fil-liġijiet nazzjonali jew il-ftehimiet dwar it-taxxa bejn il-pajjiżi – iżda dawn il-ftehimiet ma jkoprux l-eventwalitajiet kollha u jvarjaw b'mod konsiderevoli.

    Skont bosta ftehimiet dwar it-taxxa, int tkun intaxxat b'mod esklużiv fil-pajjiż fejn normalment tinsab ir-residenza tiegħek (f'"pajjiżek") jekk:

    • int toqgħod fil-pajjiż l-ieħor għal total ta' anqas minn 6 xhur f'sena (sena kalendarja jew perjodu ieħor ta' tnax-il xahar, dan jiddependi mill-ftehim applikabbli dwar it-taxxa doppja)
    • is-salarju (i) mhux imħallas jew mogħti f'isem persuna li tħaddmek li hi residenti fil-pajjiż l-ieħor u (ii) mhux konness ma uffiċċju jew negozju permanenti ieħor li min iħaddmek għandu fil-pajjiż l-ieħor.

    Din hija biss taqsira ta' dak li jiġri ġeneralment. Jista' jeżistu eċċezzjonijiet għar-regola ġenerali f'ċerti ftehimiet dwar it-taxxa, u ċ-ċirkostanzi speċifiċi tiegħek għandhom dejjem jitqiesu.

    Barra minn hekk, kull pajjiż għandu d-definizzjonijiet tiegħu ta' "sena" u ta' "perjodu ta' 12-il xahar" għal finijiet tat-taxxa.

    Għal tweġiba ddettaljata għas-sitwazzjoni tiegħek, ikkonsulta l-ftehim dwar it-taxxa kkonċernat bejn il-pajjiżi u kkuntattja l-uffiċċju tat-taxxa jew konsulent dwar l-impjiegi Ewropej.

    Aktar tagħrif dwar:

  • Din is-sena ntbgħatt naħdem għal 4 xhur f'pajjiż ieħor tal-UE. Fejn għandi nħallas it-taxxa fuq id-dħul?

    Billi s-sekondar dam anqas minn 6 xhur, probabbilment ikollok tkompli tħallas it-taxxa f'pajjiżek (il-pajjiż fejn normalment taħdem). Ma jkollokx normalment għalfejn tħallas taxxa fuq id-dħul fil-pajjiż ospitanti sakemm min iħaddmek ma għandux uffiċċju hemmhekk.

    Il-liġijiet tal-pajjiż ospitanti jistgħu jeħtieġu li min iħaddmek biex inaqqaslek it-taxxa mis-salarju li tirċievi matul il-perjodu li tkun mibgħut taħdem fil-pajjiż barrani – li jwasslu għat-tieni sett ta' tnaqqis mill-paga tiegħek.

    Iżda jekk iseħħ dan, għandek tkun tista' titlob rimborż mill-pajjiż ospitanti, biex tkun evitata t-taxxa doppja.

    Din mhix ħlief taqsira tal-aktar regoli komuni. Għal tweġiba definittiva, ara l-ftehim dwar it-taxxa rilevanti jew ikkuntattja lill-awtoritajiet tat-taxxa nazzjonali jew konsulent dwar l-impjiegi Ewropej.

    Aktar tagħrif dwar:

  • Inbgħatt naħdem f'pajjiż barrani għal sena u qed jitolbuni biex inħallas it-taxxa fuq id-dħul ta' flus fil-pajjiż ospitanti. Jien eliġibbli għal kwalunkwe tnaqqis/riduzzjoni hemmhekk?

    Wara li tkun ilek tgħix għal sena sħiħa f'pajjiż ieħor tal-UE, normalment titqies hemm bħala resident għal finijiet tat-taxxi. Dan ifisser li dak il-pajjiż għandu jagħtik l-istess tnaqqis jew riduzzjonijiet li japplikaw għaċ-ċittadini tiegħu – anki jekk dawn japplikaw għal infiq li jsir lil hinn mill-fruntieri tiegħu.

    Mela jekk il-pajjiż ospitanti jippermetti dan it-tnaqqis għal miżati taċ-childcare, pereżempju, tkun tista' tnaqqas kwalunkwe miżata għaċ-childcare li ħallast f'pajjiżek.

    Aktar tagħrif dwar:

Għad għandek bżonn l-għajnuna?