Jekk għandek diżabbiltà li twassal għal mobbiltà mnaqqsa, tista’ tkun intitolat għal kard għall-parkeġġ tal-UE fil-pajjiż ta’ residenza tiegħek, li għandha tkun rikonoxxuta fil-pajjiżi kollha tal-UE.
Meta tkun qed tivvjaġġa f’pajjiż barrani, din il-kard għall-parkeġġ tal-UE għandha tagħtik aċċess għal numru ta’ drittijiet u ta’ faċilitajiet għall-parkeġġ li huma speċifiċi għall-pajjiż li tkun qed iżżur.
L-awtorità rilevanti fil-pajjiż ta’ residenza tiegħek hi responsabbli għall-ħruġ tal-kard, abbażi tal-mudell standardizzat tal-kard għall-parkeġġ tal-UE, skont il-proċeduri lokali.
L-użu tal-kard għall-parkeġġ tal-UE
Meta tuża l-kard tiegħek trid turiha fuq quddiem tal-vettura. In-naħa ta’ quddiem tal-kard għandha tkun viżibbli b’mod ċar għall-finijiet ta’ ċċekkjar.
Barra minn hekk, meta tuża l-kard tiegħek f’pajjiż ieħor tal-UE tista’ turi l-avviż li joqgħod wieqaf waħdu maġenbha, li juri n-naħa bil-lingwa(i) mitkellma fil-pajjiż li qed iżżur.
Twissija
Qabel ma tivvjaġġa f’pajjiż ieħor tal-UE, għandek tiċċekkja l-kundizzjonijiet applikabbli f’dak il-pajjiż.
Ara wkoll
Sib informazzjoni dwar il-proposta tal-Kummissjoni għal Kard tal-UE tad-Diżabbiltà u Kard Ewropea għall-Parkeġġ għall-persuni b’diżabbiltà. Din il-kard il-ġdida għall-parkeġġ se tiggarantixxi l-użu ta’ spazji għall-parkeġġ u faċilitajiet riżervati għall-persuni b’diżabbiltà fil-pajjiżi kollha tal-UE u se tissostitwixxi l-kards tal-parkeġġ nazzjonali.