Dokumenti meħtieġa

Aġġornat : 04/2013

Ċittadini tal-UE

Jekk int ċittadin tal-UE , jeħtieġlek turi l-ID kard nazzjonali jew il-passport meta tkun qed tivvjaġġa minn pajjiż għal ieħor tal-UE.

Iż-żona bla passaport ta' Schengen tinkludi:
L-Awstrija	L-Ungerija	In-Norveġja
Il-Belġju	L-Islanda	Il-Polonja
Ir-Repubblika Ċeka	L-Italja	Il-Portugall
Id-Danimarka	Il-Latvja	Is-Slovakkja
L-Estonja	Il-Liechtenstein	Is-Slovenja
Il-Finlandja	Il-Litwanja	Spanja
Franza	Il-Lussemburgu	L-Isvezja
Il-Ġermanja	Malta	L-Isvizzera
Il-Greċja	Il-Pajjiżi l-Baxxi

Xorta waħda għandek turi karta tal-identità valida jew passaport validu meta tivvjaġġa lejn jew lura mill-Bulgarija, Ċipru, l-Irlanda, ir-Rumanija jew ir-Renju Unit. Għalkemm parti mill-UE, dawn il-pajjiżi ma jagħmlux parti miż-żona bla passaport ta' Schengen.

X'tagħmel jekk:

• tlift il-passaport jew insteraqlek?
• tinduna li l-passaport skadielek matul il-vjaġġ tiegħek?

Hi liema hi minn dawn iż-żewġ ċirkostanzi, skont ir-regoli tal-UE tista' tivvjaġġa biss b'karta tal-identità valida jew b'passaport validu. Iżda l-għajnuna ma' tonqosx, billi l-pajjiżi tal-UE għandhom sistema fil-post li ssolvi każijiet bħal dawn.

Il-kundizzjonijiet u l-proċeduri jvarjaw bil-bosta minn pajjiż għal ieħor. Għalhekk jekk int tinsab fl-UE, l-ewwel post li jeħtieġlek tmur fih għandu jkun il-konsulat jew l-ambaxxata ta' pajjiżek. (Jekk għandek problema simili f'pajjiż barrani li mhux fl-UE, fejn pajjiżek ma għandux konsulat jew ambaxxata, għandek id-dritt li titlob protezzjoni konsulari minn kwalunkwe pajjiż ieħor tal-UE.)

Dokumenti għat-tfal

Barra milli jkollhom il-passaport validu jew il-karta tal-identità valida tagħhom, it-tfal kollha li jkunu qed jivvjaġġaw:

• weħidhom; jew
• ma' adulti li mhumiex il-kustodji legali tagħhom; jew
• ma' ġenitur wieħed biss

jista' jkun jeħtiġilhom dokument (uffiċjali) ieħor iffirmat mill-ġenituri, mit-tieni ġenitur jew mill-kustodju(i) legali tagħhom li jawtorizzahom li jivvjaġġaw.

L-ewwel għandek tikkonsulta l-ambaxxata lokali tal-pajjiż li t-tfal se jivvjaġġaw fih għall-informazzjoni dwar liema, jekk inhu l-każ, dokumenti oħrajn se jkunu jeħtieġu biex jagħmlu l-vjaġġ.

Rifjut ta' dħul

F'każijiet rari ħafna, pajjiż tal-UE jista' jirrifjuta d-dħul tiegħek jew ta' membri tal-familja tiegħek minħabba "politika pubblika, sigurtà pubblika u saħħa pubblika".

Dan ifisser li l-awtoritajiet għandhom jippruvaw li int jew il-membri tal-familja tiegħek huma "ta' theddida ġenwina, preżenti u biżżejjed serja".

Għandek id-dritt li tingħata din id-deċiżjoni bil-miktub, fejn ikunu ddikjarati r-raġunijiet, u li fiha jiġi speċifikat kif tista' tappella u ż-żmien li għandek biex tkun tista' tagħmel dan.

Għad għandek bżonn l-għajnuna?

Footnote