Għodod tas-servizz

Selettur tal-lingwa

Il-bandiera tal-UE

Mogħdija tan-navigazzjoni

Menu

Aġġornat : 11/08/2017

Prezzijiet u pagamenti

Meta tixtri xi ħaġa, trid tkun informat b'mod ċar dwar il-prezz totali tal-oġġetti jew tas-servizzi inklużi t-taxxi kollha u l-miżati addizzjonali.

Għal xiri onlajn, trid tirrikonoxxi espliċitament, pereżempju billi tagħfas buttuna, li inti konxju li meta tagħmel l-ordni tiegħek għandek l-obbligu li tħallas.

Soprataxxi: tariffi għall-użu tal-karti tal-kreditu u mezzi oħra ta' pagament

Jekk negozjant jixtieq jiċċarġjak aktar talli tuża mezzi speċifiċi ta' pagament, pereżempju karta tal-kreditu, it-tariffa ma tistax tkun ogħla milli fil-fatt tiġi tiswa lin-negozjant biex jipproċessa l-pagament tiegħek. F'xi pajjiżi miżati bħal dawn jistgħu jkunu projbiti għal kollox.

Miżati għal servizzi addizzjonali

Trid tagħti l-kunsens tiegħek għal kwalunkwe pagament addizzjonali mitlub min-negozjant, pereżempju kunsinna express, tgeżwir f'karta tar-rigali jew assigurazzjoni tal-ivvjaġġar.

Negozjant ma jistax jitolbok ħlas għal dawn is-servizzi sakemm inti ma tagħażilhomx espliċitament. L-użu ta' kaxxa ttikkjata minn qabel fis-sit web tan-negozjant ma tikkostitwixxix kunsens ta' din ix-xorta, għalhekk se tkun intitolat għal rimborż ta' kwalunkwe pagament li jkun inġabar b'dan il-mod.

Storja bħala eżempju

Ewa mill-Polonja xtrat xi kotba minn bejjiegħ onlajn, iżda l-karta tal-kreditu tagħha ġiet iċċarġjata iktar mill-ammont totali muri fil-punt tal-bejgħ tas-sit web tan-negozjant.

Minħabba li r-regoli tal-UE jobbligaw lin-negozjanti juru l-informazzjoni dwar il-prezz korrett u totali qabel ma konsumatur jagħmel akkwist onlajn, Ewa rrapportat il-kwistjoni kemm lill-kumpanija kif ukoll lill-awtoritajiet Pollakki. Wara intervent mill-awtoritajiet, ingħatat lura d-differenza.

Diskriminazzjoni fil-prezz

Bħala ċittadin tal-UE ma tistax tiġi ċċarġjat prezz ogħla meta tixtri prodotti jew servizzi minħabba n-nazzjonalità jew il-pajjiż ta' residenza tiegħek. Xi differenzi fil-prezzijiet jistgħu jkunu ġustifikati, sakemm dawn ikunu bbażati fuq kriterji oġġettivi minbarra n-nazzjonalità.

Storja bħala eżempju: kultant xi differenzi fil-prezzijiet jistgħu jkunu ġustifikati

Bart, min-Netherlands, żar lil sieħbu l-Ġermanja u mar il-pixxina. Hu kellu jħallas prezz ogħla mir-residenti ta' hemm u ħaseb li din hija diskriminazzjoni illegali tal-prezz.

F'dan il-każ, id-differenza fil-prezz hija ġustifikata. Il-pixxina hija mmexxija minn awtorità u ffinanzjata mit-taxxi lokali, għalhekk ir-residenti lokali diġà taw il-kontribut tagħhom għat-tmexxija tal-pixxina u għalhekk igawdu minn prezz irħas tad-dħul.

Ir-regoli tal-prezzijiet tal-biljetti tal-ivvjaġġar

Ir-regoli tal-UE dwar il-prezzijiet japplikaw ukoll meta tixtri biljetti tal-ivvjaġġar, bħal titjiriet jew biljetti tal-ferrovija, onlajn jew personalment. Dan ifisser li meta tixtri l-biljetti tiegħek, it-taxxi, it-tariffi u l-miżati kollha għandhom ikunu inklużi u jidhru fil-prezz totali mill-bidu tal-proċess tal-ibbukkjar. Dan jagħmilha aktar faċli għalik biex tqabbel il-prezzijiet ma' operaturi oħra tal-ivvjaġġar. 

Kwalunkwe suppliment fakultattiv (bħall-assigurazzjoni tal-ivvjaġġar) għandu jkun indikat b'mod ċar u rrikkmandat biss bħala għażla ħielsa.

Għall-akkwist ta' biljetti tal-ajru, jekk tiskopri prezzijiet onlajn li ma jkunux ċari meta tibbukkja titjira, tista' tirrapporta għand l- awtoritajiet nazzjonali fil-pajjiż ta' residenza tal-UE tiegħek.

Teħtieġ l-għajnuna mis-servizzi ta’ assistenza?
Sib għajnuna u pariri