Merkanzija

Aġġornat 05/2011

Permezz tas-suq uniku effettiv li hemm fis-seħħ bħalissa, l-intrapriżi tal-UE jistgħu jbigħu u jixtru prodotti mill-Unjoni Ewropea kollha.

Moviment ħieles tal-prodotti

L-UE neħħiet l-ostakli kollha li darba kienu jfixklu l-importazzjonijiet u l-esportazzjonijiet, u issa n-negozji jistgħu jittrasportaw u jbigħu prodotti fl-UE kollha.

Moviment ħieles tal-prodotti (artikoli 34 sa 36 tat-Trattat dwar il-Funzjonament tal-UE) [842 KB]
Gwida għall-artikoli tat-Trattat dwar il-moviment ħieles tal-prodotti [458 KB]
Is-suq intern tal-prodotti

Restrizzjonijiet

Il-pajjiżi tal-UE jistgħu jillimitaw il-moviment ħieles tal-prodotti f'każijiet straordinarji biss, li jkunu ġġustifikati mill-interess pubbliku, pereżempju għal raġunijiet ta' saħħa u sigurtà pubblika, il-protezzjoni ambjentali jew il-benessri tal-konsumaturi. Ir-restrizzjonijiet għandhom ikunu proporzjonati.

Il-moviment ħieles tal-prodotti jista' jkun ristrett ukoll bħala prekawzjoni meta dejta xjentifika tissuġġerixxi li l-prodotti jistgħu jkunu ta' theddida għall-bniedem, l-annimali, il-pjanti jew l-ambjent.

Qafas leġiżlattiv ġdid

L-UE adottat regoli ġodda biex tneħħi l-ostakoli li baqa' għall-moviment ħieles tal-prodotti, permezz ta':

infurzar iktar b'saħħtu tal-leġiżlazzjoni tas-suq tal-UE;
regoli aħjar dwar is-sorveljanza tas-suq;
qafas komuni għall-prodotti ta' kummerċjalizzazzjoni;
iktar kredibilità għall-marka CE;
rikonoxximent reċiproku operattiv għal kollox;
qafas leġiżlattiv ġdid.

Armonizzazzjoni

Peress li differenzi fir-regoli tekniċi nazzjonali jistgħu jfixklu l-kummerċ, l-UE adottat miżuri ta' armonizzazzjoni għal diversi prodotti - partikolarment prodotti kkunsidrati ta' riskju għoli, bħal pereżempju prodotti farmaċewtiċi, vetturi, ġugarelli, kimiċi, tagħmir tal-elettriku u mekkaniku kif ukoll apparat mediku. Il-prodotti manifatturati skont dawn ir-regoli jistgħu jitpoġġew fis-suq ta' kwalunkwe pajjiż tal-UE.

Setturi tal-industrija

Standardizzazzjoni

Minn nofs is-snin tmenin 'il quddiem, l-UE żviluppat metodu ġdid għall-armonizzazzjoni bbażata fuq l-istandardizzazzjoni.

Il-leġiżlazzjoni tal-UE, magħrufa bħala d-direttivi b'metodu ġdid, tistabbilixxi r-rekwiżiti essenzjali li l-prodotti jridu jilħqu sabiex ikunu jistgħu jinbiegħu fl-UE. Huwa l-kompitu tal-manifatturi li jeqilbu dawn ir-rekwiżiti importanti fi speċifikazzjonijiet tekniċi.

Sabiex ikunu jistgħu jagħmlu dan, madwar 20,000 standard Ewropew s'issa ġew ippubblikati. Il-prodotti li jkunu konformi mal-istandards Ewropej jitqiesu li huma konformi mar-rekwiżiti importanti stabbiliti mid-direttivi tal-UE. Madankollu, dawn huma volontarji u, jekk iridu, il-manifatturi jistgħu jagħżlu soluzzjonijiet tekniċi oħra biex jilħqu dawn ir-rekwiżiti.

L-istandards armonizzati tal-UE tfasslu mill-Kumitat Ewropew għall-Istandardizzazzjoni (CEN), il-Kumitat Ewropew għall-Istandardizzazzjoni Elettroteknika (CENELEC) u l-Istitut Ewropew għall-Istandards tat-Telekomunikazzjoni (ETSI) - wara li ntlaħaq qbil bejn il-partijiet interessati kollha (l-industrija, l-awtoritajiet pubbliċi, il-konsumaturi, l-organizzazzjonijiet ambjentali, l-unjins tal-ħaddiema).

Standards Ewropej
Standards armonizzati

L-istandardizzazzjoni hija strument strateġiku għall-innovazzjoni u l-kompetittività. L-UE għandha l-għan li tiżgura li l-istandards jibqgħu jiġu aġġornati b'rikonoxximent ġdid u li tħeġġeġ lill-partijiet interessati - partikolarment in-negozji ż-żgħar - biex ikunu involuti fl-istandardizzazzjoni.

Komunikazzjoni dwar l-istandardizzazzjoni bħala forza għall-innovazzjoni [214 KB]

Marka CE

Il-marka CE fuq prodott tfisser li dan huwa konformi mar-rekwiżiti rilevanti kollha tal-UE. Il-pajjiżi tal-UE ma jistgħux jillimitaw l-aċċess tas-suq għall-prodotti li jkollhom il-marka CE, sakemm ikun hemm evidenza li l-prodott ma jkunx konformi ma' dawn ir-regoli.

Deċizjoni tal-Kunsill tal-UE dwar il-marka ta' konformità CE

Ir-rikonoxximent reċiproku

F'setturi fejn ma kien hemm ebda armonizzazzjoni, il-kummerċ jistrieħ fuq il-prinċipju tar-rikonoxximent reċiprioku: prodotti manifatturati legalment jew kummerċjalizzati f'pajjiż tal-UE jistgħu jinbiegħu f'oħrajn, anke jekk ma jkunux konformi b'mod sħiħ mar-regoli tekniċi ta' dawn il-pajjiżi, pereżempju fir-rigward tal-forma, id-daqs, il-piż, il-kompożizzjoni, it-tikketti jew l-ippakkjar. Dan ifisser li l-kumpaniji jistgħu jinnegozjaw fl-UE sakemm dawn ikunu konformi mar-regolamenti ekwivalenti f'pajjiżhom stess.

Ir-rikonoxximent reċiproku
Ir-regolament dwar l-applikazzjoni ta' ċerti regoli tekniċi nazzjonali għal prodotti li legalment jitqiegħdu fis-suq f'pajjiż ieħor tal-UE [89 KB]

Punti ta' Kuntatt tal-Prodott

Biex jinformaw lin-negozji u lill-awtoritajiet dwar l-applikazzjoni tal-prinċipju tar-rikonoxximent reċiproku u r-regolamenti nazzjonali speċifiċi u tekniċi eżistenti, il-Punti ta' Kuntatt tal-Prodott ġew stabbiliti f'kull Stat Membru.

Il-Puniti ta' Kuntatt tal-Prodott ta' Stat Membru għandhom:

jinformaw lin-negozji u lill-awtoritajiet dwar regoli tekniċi partikulari li huma applikabbli għal tip speċifiku ta' prodott f'pajjiżhom meta dan il-prodott ma jkunx regolat u armonizzat fil-livell tal-UE
jgħaddu lin-negozji d-dettalji ta' kuntatt tal-awtoritajiet kompetenti li għandhom x'jaqsmu mal-implimentazzjoni tar-regoli tekniċi kkonċernati.
jinformaw lin-negozji dwar remedji possibbli f'pajjiżhom meta tinqala' tilwima bejniethom u l-awtorità kompetenti

Il-Punti ta' Kuntatt tal-Prodott għandhom iwieġbu fi żmien 15-il ġurnata ta' xogħol wara li jkunu rċevew kull talba ta' informazzjoni u ma għandhomx jitolbu ħlas għall-informazzjoni li tingħata.

Lista tal-Punti ta' Kuntatt fl-Istati Membri kollha

Riżorsi

Il-Kummissjoni Ewropea qed tipproponi websajt b'informazzjoni dwar kif għandu jitressaq ilment kontra pajjiż tal-UE għal kwalunkwe miżura (liġi, regolament jew azzjoni amministrattiva) jew prattika li ma tkunx kompatibbli ma' dispożizzjoni jew prinċipju tal-liġi tal-UE.

Eżerċita drittijietek!

Ara wkoll il-leġiżlazzjoni fuq dan is-suġġett fi: