Id-drittijiet taċ-ċittadini jsiru realtà tanġibbli 500 ċentru ta’ informazzjoni jinfurmaw liċ-ċittadini madwar l-Ewropa

Il-Kummissjoni Ewropea

Stqarrija għall-istampa

Brussell, it-18 ta’ Marzu 2013

Id-drittijiet taċ-ċittadini jsiru realtà tanġibbli 500 ċentru ta’ informazzjoni jinfurmaw liċ-ċittadini madwar l-Ewropa

Illum, Viviane Reding, Viċi President tal-Kummissjoni Ewropea u Othmar Karas, l-Viċi President tal-Parlament Ewropew nedew ġenerazzjoni ġdida ta’ “Ċentri ta’ Informazzjoni Europe Direct”. In-netwerk il-ġdid se jestendi l-possibbiltajiet għaċ-ċittadini biex jiksbu informazzjoni u pariri prattiċi dwar kif jeżerċitaw id-drittijiet fl-Unjoni Ewropea. Issa hemm 500 ċentru fl-Ewropa, għall-500 miljun ruħ fl-Unjoni Ewropea. Il-Kroazja se tissieħeb man-netwerk aktar tard fl-2013. It-tħabbira waslet hekk kif rappreżentanti miċ-ċentri qed jiltaqgħu fi Brussell għal-Laqgħa Ġenerali Annwali tan-Netwerk Europe Direct.

“Iċ-Ċentri ta’ Informazzjoni Europe Direct huma quddiem nett biex ikunu l-wiċċ pubbliku, l-għajnejn, il-widnejn u l-leħen tal-politiki tagħna u tad-drittijiet taċ-ċittadini fl-Ewropa," qalet il-Viċi President Viviane Reding, il-Kummissarju għall-Ġustizzja, id-Drittijiet Fundamentali u ċ-Ċittadinanza. “Iċ-ċifri huma impressjonanti: Is-sena l-oħra biss iċ-Ċentri rċevew fuq miljun mistoqsija. Għalhekk illum qed inkabbru n-netwerk biex iċ-ċentri jkunu jistgħu jkomplu jagħtu sehemhom biex iwieġbu l-mistoqsijiet taċ-ċittadini u jgħinu biex jistimulaw dibattitu Ewropew fil-livell lokali.”

Iċ-ċentri l-ġodda ntgħażlu mill-Kummissjoni Ewropea għal perjodu ta’ ħames snin fuq il-bażi ta’ kompetizzjoni miftuħa. Kandidati li jikkwalifikaw, ikkofinanzjati mill-Kummissjoni Ewropea, issa jistgħu jużaw it-tikketta ta’ “Ċentru ta’ Informazzjoni Europe Direct”. Ħafna ċentri huma mmexxija minn awtoritajiet reġjonali jew lokali, assoċjazzjonijiet jew kmamar tal-kummerċ.

L-ewwel ġenerazzjoni ta’ ċentri tnediet fl-2005. Minn dak iż-żmien 'l hawn in-nies madwar l-Ewropa qed jużawhom aktar u aktar. F'dawn l-aħħar erba’ snin biss tat-tieni ġenerazzjoni, iċ-ċentri rċevew madwar 3.3 miljun domanda personali, organizzaw aktar minn 41,000 avvenimenti u wieġbu aktar minn miljun email.

In-Netwerk Europe Direct għandu rwol kruċjali x’jaqdi biex jipprovdi rabta diretta mal-persuni f’pajjiżhom stess, ikellimhom b’mod li huwa kemm rilevanti lilhom u li jinftiehem ukoll. It-tħabbira tal-lum ġiet matul is-Sena Ewropea taċ-Ċittadini 2013, sena ddedikata għaċ-ċittadini Ewropej u għad-drittijiet tagħhom. Bħala parti mill-isforzi ta' sensibilizzazzjoni, matul is-sena 2013, il-Viċi President Reding u l-Kummissarji l-oħrajn se jingħaqdu mal-politiċi nazzjonali u lokali biex jagħmlu dibattiti maċ-ċittadini madwar l-Ewropa kollha – biex jisimgħuhom u jwieġbu l-mistoqsijiet tagħhom.

Kuntest:

In-Netwerk ta’ informazzjoni Europe Direct tneda għall-ewwel darba fl-2005. Iċ-Ċentri fl-Istati Membri huma wieħed mill-mezzi tal-Kummissjoni Ewropea li tipprovdi komunikazzjoni għall-pubbliku ġenerali f'livell lokali. Is-servizzi taċ-ċentri huma bla ħlas għall-pubbliku ġenerali.

Iċ-ċentri huma kofinanzjati u jirċievu massimu ta’ EUR 25 000 kull sena mill-Kummissjoni Ewropea għal attivitajiet tagħhom ta’ informazzjoni dwar l-UE. Il-baġit totali tal-UE għaċ-ċentri kollha jibqa’ l-istess, jiġifieri massimu ta’ EUR 11.4 miljun fis-sena.

Hemm erba’ servizzi differenti disponibbli għal nies taħt il-kappa ta’ “Europe Direct”. Kollha kemm huma jaqdu liċ-ċittadini, kollha kemm huma huma bla ħlas.

• Iċ-Ċentru ta’ Kuntatt Europe Direct (EDCC) joffri servizz ta’ informazzjoni bit-telefown u bil-posta madwar l-UE dwar il-kwistjonijiet kollha tal-UE;

• Iċ-Ċentri ta’ Informazzjoni Europe Direct (EDICs) huma punt ta’ kuntatt lokali. Huma jipprovdu informazzjoni u jwieġbu mistoqsijiet dwar kull tip ta’ kwistjoniji Ewropeja. U jwieġbu personalment u jiqisu l-kuntest lokali. Persunal imħarreġ sew jinteraġixxi man-nies billi jorganizzaw avvenimenti fi skejjel, dibattiti ma’ politiċi lokali u reġjonali u jippreżentaw l-Ewropa fil-fieri. B’aktar minn miljun inkjesta fis-sena, dawk li jieħdu d-deċiżjonijiet fl-Ewropa jkollhom il-possibbiltà li jitgħallmu direttament dwar il-ħtiġijiet u t-tħassib tan-nies.

• Iċ-Ċentri ta’ Dokumentazzjoni Ewropej jippromwovu l-edukazzjoni u r-riċerka dwar l-integrazzjoni mal-UE. Huma joffru firxa wiesgħa ta’ dokumenti dwar l-affarijiet Ewropej u jħeġġu lill-komunità akkademika biex tinvolvi ruħha fid-dibattitu dwar l-Ewropa.

• Il-kelliema tat-Team Europe dwar l-affarijiet tal-UE. Speċjalisti fid-diversi suġġetti marbuta mal-UE, jitkellmu f’konferenzi, f’universitajiet u skejjel dwar kwistjonijiet Ewropej.

Għal aktar informazzjoni

Link diretta ma’ Europe Direct:

http://europa.eu/europedirect/index_en.htm

Mappa biċ-“Ċentri ta’ Informazzjoni Europe Direct":

http://europa.eu/europedirect/meet_us/interactive_map/index_en.htm

Dibattiti maċ-ċittadini dwar il-futur tal-Ewropa:

http://ec.europa.eu/european-debate

Is-Sena Ewropea taċ-Ċittadini:

http://europa.eu/citizens-2013

Il-paġna ewlenija tal-Viċi President u l-Kummissarju tal-UE għall-Ġustizzja, Viviane Reding:

http://ec.europa.eu/reding

Segwi lill-Viċi President fuq Twitter: @ vivianeredingeu

ANNESS

1 Il-ġenerazzjoni l-ġdida taċ-Ċentri ta’ Informazzjoni Europe Direct (EDICs)

2 Attivitajiet taċ-Ċentri ta’ Informazzjoni Europe Direct (EDICs) fl-2012

3 Aktar minn miljun kuntatt personali fl-2012 — Deskrizzjoni

1036953 personal contacts (visits, email requests, telephone calls etc.)