Is-sikurezza fit-toroq: l-aċċidenti fatali tat-traffiku fl-UE jonqsu bi 11 % fl-2010

Il-Kummissjoni Ewropea – Stqarrija għall-Istampa

Is-sikurezza fit-toroq: l-aċċidenti fatali tat-traffiku fl-UE jonqsu bi 11 % fl-2010

Brussell, il-5 ta' Lulju 2011 – Il-Kummissjoni Ewropea llum ippubblikat statistiki ġodda li juru li l-aċċidenti fatali tat-traffiku fl-UE naqsu bi 11 % fl-2010. Madankollu, l-istatistiki pajjiż b'pajjiż (ara t-tabella aktar 'l isfel) juru li l-għadd ta' mwiet għadu jvarja ħafna madwar l-UE. Il-maġġoranza tal-pajjiżi kisbu tnaqqis ta' 10 % jew aktar fl-għadd ta' mwiet fit-toroq matul is-sena li għaddiet, bl-ikbar tnaqqis ikun fil-Lussemburgu (33 %), f'Malta (29 %), fl-Isvezja (26 %) u fis-Slovakkja (26 %). Madankollu, xorta għad hemm ħafna xogħol xi jsir.

Il-Viċi President tal-Kummissjoni Ewropea Siim Kallas, responsabbli għat-Trasport, qal: "Il-fatt li kważi l-Istati Membri kollha rnexxielhom inaqqsu b'mod sinifikanti l-għadd ta' mwiet fit-toroq huwa ta' inkoraġġiment kbir, iżda m'hemmx lok li wieħed jissodisfa ruħu b'daqshekk. Mijiet ta' nies għadhom imutu kuljum fit-toroq tal-Ewropa. Għamilna progress tajjeb ħafna mill-2001 'l hawn u rnexxielna nsalvaw kważi 100,000 ħajja. Iżda l-għadd ta' aċċidenti fatali u korrimenti fit-toroq tagħna għadu inaċċettabbli. Irridu nnaqqsu l-għadd ta' mwiet bin-nofs sal-2020. Minħabba dan, se nkunu qed naraw it-tip ta' karozzi li jsuqu n-nies, fejn isuqu u kif isuqu."

It-tabella mehmuża bl-isem "Aċċidenti fatali tat-traffiku għal kull pajjiż" turi l-progress li sar skont il-Pjan ta' Azzjoni għas-Sikurezza fit-Toroq 2001-10, biċ-ċifri tal-pajjiżi kollha madwar l-UE u bit-tqassim skont il-pajjiż. Tinkludi l-aktar ċifri riċenti tal-2010.

Il-pjan ta' azzjoni għas-sikurezza fit-toroq tal-UE

F'Lulju 2010, il-Kummissjoni adottat pjanijiet ta' sfida biex tnaqqas bin-nofs l-għadd ta' mwiet fit-toroq Ewropej fl-10 snin li ġejjin. L-inizjattivi proposti fl-"Orjentazzjonijiet ta' Politika Ewropea għas-Sikurezza tat-Triq 2011-2020" ivarjaw minn standards ogħla stabbiliti għas-sikurezza tal-vetturi, sat-titjib fit-taħriġ tal-utenti tat-triq u ż-żieda fl-infurzar tar-regoli tat-triq. Il-Kummissjoni qed taħdem mill-qrib mal-Istati Membri sabiex timplimenta dan il-programm.

Programm ta' azzjoni għas-sikurezza fit-toroq 2011-20:

Il-programm ta' azzjoni għas-Sikurezza fit-Toroq jistabbilixxi taħlita ta' inizjattivi li jikkonċentraw fuq it-titjib tal-vetturi, l-infrastruttura u l-imġiba tal-utenti tat-triq.

Hemm seba' għanijiet strateġiċi:

• Miżuri tas-sikurezza mtejba għat-trakkijiet u l-karozzi

• Bini ta' toroq iktar sikuri

• Żvilupp ta' vetturi intelliġenti

• Tisħiħ fl-għoti tal-liċenzji u t-taħriġ

• Infurzar aħjar

• Konċentrazzjoni fuq il-korrimenti

• Konċentrazzjoni ġdida fuq is-sewwieqa tal-muturi.

Il-miżuri dettaljati għal kull għan strateġiku jinsabu elenkati fil-MEMO/10/343 mehmuża.

Ara wkoll: MEMO/11/483

Aċċidenti fatali tat-traffiku għal kull pajjiż (għal kull miljun abitant)