Rapport dwar l-edukazzjoni fl-UE: sar progress iżda hemm bżonn ta' sforz akbar biex jintlaħqu l-miri

IP/11/488

Brussell, id-19 ta’ April 2011

Rapport dwar l-edukazzjoni fl-UE: sar progress iżda hemm bżonn ta' sforz akbar biex jintlaħqu l-miri

Brussell, id-19 ta' April – Il-pajjiżi tal-UE tejbu s-sistemi tal-edukazzjoni tagħhom f'oqsma prinċipali fl-aħħar deċennju iżda laħqu biss wieħed mill-ħames valuri referenzjarji ffissati għall-2010, ir-rapport il-ġdid tal-Kummissjoni Ewropea dwar l-edukazzjoni u t-taħriġ jiżvela llum. L-UE rnexxielha tilħaq il-mira tagħha li żżid in-numru ta' gradwati tal-matematika, ix-xjenza u t-teknoloġija, b'żieda ta' 37 % mill-2000 – li faċilment qabżet il-mira ta' 15 %. Kien sinifikattiv iżda insuffiċjenti l-progress li sar fit-tnaqqis tar-rata ta' dawk bi tluq bikri mill-iskola, fiż-żieda tal-istudenti li jlestu l-edukazzjoni sekondarja għolja, fit-titjib fil-ħiliet tal-litteriżmu u l-qari u fiż-żieda fin-numru tal-adulti li jipparteċipaw fl-edukazzjoni jew it-taħriġ. Għal analiżi dettaljata taċ-ċifri għal kull pajjiż, ara l-anness ta' hawn taħt. L-istrateġija tal-impjiegi u t-tkabbir tal-Ewropa 2020 żżomm il-mira li titnaqqas ir-rata tal-istudenti bi tluq bikri mill-iskola għal 10 %, kif ukoll li jiżdied in-numru ta' gradwati għal mill-inqas 40 %.

Androulla Vassiliou, il-Kummissarju Ewropew għall-Edukazzjoni, il-Kultura, il-Multilingwiżmu u ż-Żgħażagħ, qalet: "L-aħbar it-tajba hi li l-livelli tal-edukazzjoni fl-Ewropa għolew b'mod konsiderevoli. Aktar żgħażagħ qed ilestu l-edukazzjoni sekondarja u jiggradwaw mill-edukazzjoni għolja meta mqabbel ma' għaxar snin ilu. Iżda t-tluq bikri mill-iskola għadu problema li taffettwa wieħed minn kull seba' żgħażagħ fl-Unjoni Ewropea u wieħed minn kull ħames studenti għad għandhom ħiliet fqar tal-qari fl-età ta' 15-il sena. Għal din ir-raġuni l-edukazzjoni u t-taħriġ jibqgħu fost il-miri ċentrali tal-Ewropa 2020. Għandna bżonn sforzi akbar mill-Istati Membri biex nilħqu l-miri konġunti tagħna Ewropej."

Il-Kummissarju qiegħda tħeġġeġ bil-qawwa kollha lill-Istati Membri biex ma jnaqqsux il-baġits tal-edukazzjoni minkejja r-restrizzjonijiet li qed jiffaċċjaw minħabba l-kriżi ekonomika. "L-infiq fuq l-edukazzjoni huwa investiment tajjeb fl-impjiegi u t-tkabbir ekonomiku u investiment fit-tul fl-edukazzjoni stess: Iżda fi żmenijiet ta' pressjonijiet baġitarji rridu niżguraw li r-riżorsi jintużaw bl-aktar mod effiċjenti possibbli," żiedet il-Kummissarju.

Ħames valuri referenzjarji għall-edukazzjoni għall-2020

Fl-2009, il-Ministri tal-Edukazzjoni tal-UE qablu fuq ħames valuri referenzjarji dwar l-edukazzjoni u t-taħriġ li jridu jinkisbu sal-2020.

• in-numru ta' dawk li jħallu l-edukazzjoni u t-taħriġ qabel iż-żmien għandu jkun anqas minn 10 % (ibbażat fuq ir-rata preżenti ta' 14.4 %, dan ifisser li mill-inqas 1.7 miljun student anqas jabbandunaw l-iskola qabel iż-żmien).

• in-numru ta' dawk bl-età bejn 30-34 b'livell miksub ta' edukazzjoni terzjarja għandu jkun ta' mill-inqas 40 % (abbażi tar-rata preżenti ta' 32.3 %, dan ifisser 2.6 miljun gradwat ieħor);

• ta' mill-inqas 95 % tat-tfal bejn l-età ta' erba' u l-età tal-bidu tal-edukazzjoni primarja obbligatorja għandhom jipparteċipaw fl-edukazzjoni tat-tfulija bikrija (issa 92.3 % iżda meta tinkiseb din il-mira se jfisser 250,000 tfal żgħar aktar fl-edukazzjoni);

• in-numru ta' żgħażagħ ta' 15-il sena b'ħiliet insuffiċjenti ta' qari, matematika u xjenza għandu jkun ta' anqas minn 15 % (minn xi 20 % għat-tlieta li huma bħalissa. Il-kisba ta' din il-mira se tfisser 250,000 persuna b'livell baxx anqas);

• għandu jkun hemm parteċipazzjoni medja minima ta' 15 % tal-adulti (grupp tal-età 25-64) fit-tagħlim tul il-ħajja (in-numru bħalissa hu ta' 9.3 %. Il-kisba ta' din il-mira se tfisser 15-il miljun adult aktar fl-edukazzjoni u t-taħriġ).

Ir-rapport annwali dwar il-progress lejn il-valuri referenzjarji

Fir-rapport annwali tagħha dwar l-indikaturi u l-valuri referenzjarji, il-Kummissjoni tanalizza l-prestazzjoni tal-Istati Membri skont dawn il-miri, filwaqt li tagħmel reviżjoni ta' kif marru l-pajjiżi meta mqabbel ma' sett preċedenti ta' valuri referenzjarji maqbul għall-2010.

Riżultati ewlenin

• Il-valuri referenzarji tal-2020: minkejja li għadu kmieni għal projezzjoni preċiża, xejriet tal-passat jissuġġerixxu li ħafna mill-valuri referenzjarji għall-2020 għandhom jinkisbu jekk l-Istati Membri jibqgħu jagħtuhom prijorità għolja u jinvestu b'mod effiċjenti fl-edukazzjoni u t-taħriġ. Dan hu minnu, b'mod partikolari, għal żewġ miri titolari tal-edukazzjoni dwar it-tluq bikri mill-iskola u l-gradwati.

• Il-valuri referenzarji tal-2010: il-pajjiżi tal-UE għamlu progress iżda kisbu biss il-mira tan-numru ta' gradwati tal-matematika, ix-xjenza u t-teknoloġija. (Id-dejta kollha għall-2010 se tkun disponibbli kmieni s-sena d-dieħla).

• Il-parteċipazzjoni u l-kisbiet: mill-2000: il-parteċipazzjoni ġenerali fl-edukazzjoni żdiedet kif żdiedu wkoll il-livelli tal-kwalifiki tal-adulti. In-numru ta' tfal fl-edukazzjoni preprimarja żdied ukoll.

• Id-differenzi bejn is-sessi għadhom sinifikattivi kemm fil-prestazzjoni kif ukoll fl-għażla tas-suġġetti. Pereżempju, il-bniet jaqraw aħjar mis-subien u s-subien huma l-aktar li jitilqu kmieni mill-iskola. Hemm aktar irġiel minn nisa fost il-gradwati fis-suġġetti tal-matematika, ix-xjenza u t-teknoloġija.

Ir-rapport, li jkopri l-Istati Membri kollha tal-UE, flimkien mal-Kroazja, Dik li kienet ir-Repubblika Jugoslava tal-Maċedonja, l-Islanda, it-Turkija, in-Norveġja u Liechtenstein, fih ħarsiet ġenerali u statistika dettaljata li jidentifikaw liema pajjiżi marru aħjar jew agħar mill-medja tal-UE u liema minnhom qed jirnexxu jew li qed ifallu meta mqabbla mal-oħrajn.

Il-passi li jmiss

Fil-ġimgħat li ġejjin, l-Istati Membri se jissottomettu l-programmi ta' riforma nazzjonali tagħhom lill-Kummissjoni, li fihom huma jiffissaw il-miri nazzjonali dwar l-istudenti bi tluq bikri mill-iskola u l-gradwati tal-edukazzjoni għolja, filwaqt li jagħtu dettalji kif se jiksbu l-miri tagħhom. Il-Kummissjoni dalwaqt se tippreżenta valuri referenzjarji proposti għall-impjiegi u l-mobilità tat-tagħlim.

Biex tkun taf aktar:

Link għall-MEMO/11/253

Ir-rapport tal-Kummissjoni sħiħ "Progress towards the Lisbon objectives in education and training - Indicators and benchmarks, 2010/11"

Fuljett: Education benchmarks for Europe [bid-dejta speċifika għal kull pajjiż]

Il-Kummissjoni Ewropea: European strategy and co-operation in education and training

ANNESS

Progress lejn il-valuri referenzjarji tal-edukazzjoni tal-2010, Evoluzzjoni 2000-2009

Progress lejn il-valuri referenzjarji tal-edukazzjoni tal-2020, Evoluzzjoni 2000-2009

1. Parteċipazzjoni preprimarja

Il-valur referenzjarju 2020: Sal-2020, mill-inqas 95 % tat-tfal bejn l-4 snin u l-età tal-bidu tal-edukazzjoni primarja obbligatorja għandhom jipparteċipaw f'edukazzjoni bikrija.

Xejriet: Il-parteċipazzjoni fl-iskola preprimarja żdiedet b'aktar minn 6 punti perċentwali mill-2000. Franza. Il-Belġju. Il-Pajjiżi l-Baxxi, l-Italja u Spanja għandhom l-ogħla rata ta' parteċipazzjoni.

L-aħjar pajjiżi tal-UE: Il-Belġju, Franza, il-Pajjiżi l-Baxxi

Sors: Eurostat (LFS) L-aħjar pajjiżi l-agħar pajjiżi. b = waqfa fis-serje. p = provviżorja. (01) = 2001. (02) = 2002.

*MK = Dik li kienet ir-Repubblika Jugoslava tal-Maċedonja.

2. Persuni b'livelli baxxi

Il-valur referenzjarju 2010/2020: Sal-2010 n-numru ta' persuni b'livelli baxxi ta' qari għandu jonqos b'20 % (għal 17 %). Sal-2020 in-numru ta' persuni b'livelli baxxi ta' qari, matematika u xjenza għandu jkun anqas minn b'15 %.

Xejriet: Fl-UE (dejta komparabbli disponibbli għat-18-il pajjiż) il-prestazzjoni tjiebet minn 21.3 % għal dawk b'livell baxx ta' qari fl-2000 għal 20.0 % (bniet: 13.3%, subien: 26.6 %) fl-2009.

L-aħjar pajjiżi tal-UE: Il-Finlandja, il-Pajjiżi l-Baxxi u l-Estonja

Sors: OECD (PISA) L-aħjar pajjiżi l-agħar pajjiżi ( ) = mhux komparabbli.

Ċipru u Malta għadhom ma pparteċipawx fl-istħarriġ. Ir-riżultat tal-UE: għat-18-il pajjiż b'dejta komparabbli.

*MK = Dik li kienet ir-Repubblika Jugoslava tal-Maċedonja.

3. Studenti bi tluq bikri mill-iskola

Il-valur referenzjarju 2010/2020 (mira titolari tal-2020 tal-UE wkoll): Sal-2010/2020 in-numru ta' studenti bi tluq bikri mill-iskola ta' mhux aktar minn 10 % għandu jintlaħaq.

Xejriet: Fl-UE-27 in-numru ta' studenti bi tluq bikri mill-iskola (popolazzjoni 18-24) naqas minn 17.6 % fl-2000 għal 14.4 % fl-2009 (nisa: 12.5%. rġiel: 16.3 %).

L-aħjar pajjiżi tal-UE: Il-Polonja, ir-Repubblika Ċeka u s-Slovakkja,

Sors: Eurostat (LFS) L-aħjar pajjiżi l-agħar pajjiżi. b = waqfa fis-serje. p = provviżorja, u=mhix affidabbli, (01) = 2001. (02)= 2002.

*MK = Dik li kienet ir-Repubblika Jugoslava tal-Maċedonja.

4. Il-livell milħuq fl-edukazzjoni għaż-żgħażagħ

Il-valur referenzjarju 2010: Sal-2010 mill-inqas 85 % ta’ dawk li għandhom 22 sena fl-UE għandhom ikunu spiċċaw l-edukazzjoni sekondarja għolja.

Xejriet: Mill-2000 il-livell milħuq fl-edukazzjoni sekondarja għolja għaż-żgħażagħ fl-UE żdied bi ftit minn 76.6 % tal-popolazzjoni b'età 20-24 għal 78.6 % fl-2009 (nisa 81.4 %, rġiel 75.9 %).

L-aħjar pajjiżi tal-UE: Is-Slovakkja, ir-Repubblika Ċeka u l-Polonja

Sors: Eurostat (LFS) L-aħjar pajjiżi l-agħar pajjiżi. b = waqfa fis-serje. p = provviżorja. (01) = 2001. (02)= 2002

*MK = Dik li kienet ir-Repubblika Jugoslava tal-Maċedonja.

5. Il-gradwati tal-matematika, ix-xjenza u t-teknoloġija

Il-valur referenzjarju 2010: Sal-2010 n-numru totali tal-gradwati tal-matematika, ix-xjenza u t-teknoloġija fl-UE għandu jiżdied b'mill-inqas 15 %, id-differenza bejn is-sessi għandha tonqos.

Xejriet: In-numru ta' gradwati tal-matematika, ix-xjenza u t-teknoloġija żdied b'37.2 % mill-2000 u n-numru ta' nisa minn 30.7 % għal 32.6 % fl-2008.

L-aħjar pajjiżi tal-UE: Tkabbir mill-2000: Il-Portugall, is-Slovakkja u r-Repubblika Ċeka

Sors: Eurostat (UOE). *= Tkabbir kumulattiv estrapolat mis-snin disponibbli.

*MK = Dik li kienet ir-Repubblika Jugoslava tal-Maċedonja.

6. Il-livell milħuq fl-edukazzjoni terzjarja

Il-valur referenzjarju 2020 (mira titolari tal-2020 tal-UE wkoll): Sal-2020 il-livell milħuq fl-edukazzjoni terzjarja ta' dawk bl-età 30-34 għandu jilħaq ta' mill-anqas 40 %.

Xejriet: Il-livell milħuq fl-edukazzjoni terzjarja ta' dawk bl-età bejn 30-34 żdied minn 22.4 % fl-2000 għal 32.3 % (nisa: 35.7%, irġiel 28.9%) fl-2009 u għalhekk bi kważi 10 punti perċentwali.

L-aħjar pajjiżi tal-UE: L-Irlanda, id-Danimarka u l-Lussemburgu.

Sors: Eurostat (UOE), (02) = 2002.

*MK = Dik li kienet ir-Repubblika Jugoslava tal-Maċedonja, u = dejta mhux affidabbli

7. Il-parteċipazzjoni tal-adulti fit-tagħlim tul il-ħajja

Il-valur referenzjarju 2010/2020: Il-livell medju fl-UE tal-parteċipazzjoni tal-adulti fit-tagħlim tul il-ħajja tal-popolazzjoni tal-età tax-xogħol għandha ta' mill-inqas tilħaq 12.5 % fl-2010 u 15 % fl-2020.

Xejriet: Fuq il-livell tal-UE, il-parteċipazzjoni żdiedet minn 7.1 % fl-2000 għal 9.3 % fl-2009 (popolazzjoni 25-64: irġiel 8.5 %. nisa: 10.2%). Madankollu parti konsiderevoli ta' din iż-żieda kienet riżultat ta' waqfien fis-serje ta' żmien viċin l-2003. Mill-2005 l-parteċipazzjoni naqset xi ftit.

L-aħjar pajjiżi tal-UE: Id-Danimarka, l-Isvezja u l-Finlandja

Sors: Eurostat (LFS) L-aħjar pajjiżi l-agħar pajjiżi. b = waqfa fis-serje. p = provviżorja.
*MK = Dik li kienet ir-Repubblika Jugoslava tal-Maċedonja.